މަސްތުވާތަކެތީގެ ބަލިމަޑުކަމުގައި ޖެހިފައިވާ މީހުންގެ ވާހަކަތަކާއިއެކު 'އަނދިރީގައި' މިރޭ!
މި ޕްރޮގްރާމްގެ ހަތަރު އެޕިސޯޑެއް ގެނެސްދިނުމަށްވަނީ ނިންމާފައި
އަނދިރީގައި - މި ޕްރޮގްރާމް އާދީއްތަ ދުވަހުގެ 23:00 ގައި ދައްކާނެ
މަސްތުވާތަކެތީގެ ބަލިމަޑުކަމުގައި ޖެހިފައިވާ މީހުންގެ ހަގީގީ ވާހަކަތަކަކާއިއެކު 'އަނދިރީގައި' ޕްރޮގްރާމް އާދީއްތަ ދުވަހުގެރޭ 23:00 ގައި ރާއްޖެ ޓީވީން ދައްކާނެއެވެ.
މި ޕްރޮގްރާމަކީ ރާއްޖެއަށް ކުރިމަތިވެފައިވާ މަސްތުވާތަކެތީގެ މައްސަލައާ ގުޅުވައިގެން ތައްޔާރު ކޮށްފައިވާ ޕްރޮގްރާމެކެވެ. މި ޕްރޮގްރާމްގެ ހަތަރު އެޕިސޯޑެއް ގެނެސްދިނުމަށް ހަމަޖެހިފައިވާއިރު، މިއިން ކޮންމެ އެޕިސޯޑެއްގައި ގެނެސްދޭނީ އައު ހާދިސާތަކެކެވެ. އަދި މި ޕްރޮގްރާމުގެ ޒަރިއްޔާއިން މި މައްސަލަތައް ހައްލުކޮށް މަސްތުވާތަކެތީގެ ވަބާގައި ޖެހިފައިވާ މީހުންނަށް އެހީތެރިކަން ފޯރުކޮށްދޭނެ ގޮތްތަކާ ގުޅޭގޮތުން މައުލޫމާތު ހިއްސާކުރެވިގެންދާނެއެވެ.
މިކަންކަމުގެ މައުލޫމާތު ބެލުންތެރިންނަށް ގެނެސްދޭނީ، މިދާއިރާއިން ބައިނަލްއަގުވާމީ ސެޓްފިކެޓް ހާސިލްކޮށްފައިވާ ފަރާތެއް ކަމަށްވާ އަލީ އަދީބުއެވެ. އަދީބަކީ އިންޓަނޭޝަނަލީ ސެޓިފައިޑް އެޑިކްޝަން ޕްރޮފެޝަނަލް އެންޑް ގްލޯބަލް ޑްރަގް ރިޑަކްޝަން ޓްރެއިނަރެކެވެ.
މި ޕްރޮގްރާމްގެ ޕްރޮޑިއުސަރ، ރާއްޖެޓީވީގެ އެސިސްޓަންޓް ކްރިއޭޓިވް ޑިރެކްޓަރ، އަޙްމަދު ސިރާޖް ބުނީ މި ޕްރޮގްރާމަކީ މި ރަމަޟާންމަހު ރާއްޖެޓީވީން ގެނެސްދޭ އެންމެ ތަފާތު އެއް ޕްރޮގްރާމަށްވާނެ ކަމަށާއި، މި ޕްރޮގްރާމަކީ، މަސްތުވާތަކެތީގެ މައްސަލަތަކާއި ގުޅުވައިގެން އުފައްދާފައިވާ ޕްރޮގްރާމެއް ކަމަށެވެ. އަދި މި ޕްރޮގްރާމްގައި ގިނަ އަދަދެއްގެ ޓިކްޓޮކް ސްޓާރުންގެ ހުނަރު ފެނިގެންދާނެ ކަމަށެވެ. ސިރާޖް ބުނީ މި ޕްރޮގްރާމުގެ ޒަރިއްޔާއިން މި ފަންނާނުންނަށް ހާއްސަ ޕްލެޓްފޯމެއް ގާއިމުކޮށްދީ، އެ ފަންނާނުންގެ ހުނަރު ބެލުންތެރިންނަށް ދައްކައިދިނުން އެއީ އަމާޒެއް ކަމަށެވެ. އަދި ޕްރޮގްރާމުގެ ކޮންމެ އެޕިސޯޑަކުންވެސް ކުޅަދާނަ، ހުނަރުވެރި ފަންނާނުން ފެނިގެންދާނެ ކަމަށްވެސް ސިރާޖް ބުންޏެވެ.
މީގެ އިތުރުން ސިރާޖް ވަނީ މި ޕްރޮގްރާމް އުފެއްދުމުގެ މަސައްކަތުގައި އެހީތެރިވި ފަރާތްތަކަށް ޝުކުރުއަދާކޮށްފައެވެ.
މި ޕްރޮގްރާމްގެ ކޯ ޕްރޮޑިއުސަރ، ރާއްޖެޓީވީގެ ގްރެފިކް ޑިޒައިނަރ އިބްރާހީމް ވިޝާލް ބުނީ ޕްރޮގްރާމް އުފެއްދުމުގެ ހިޔާލު އައީ މިދިޔަ އަހަރުގެ އޮކްޓޯބަރު މަހު، އޮފީސް ލޮކްޑައުންކުރި ދުވަސްވަރުކަމަށާއި، ޕްރޮގްރާމް އުފެއްދުމުގެ މަސައްކަތް ރާވަން ފަށާފައި ވަނީ ލޮކްޑައުންގެ ތެރޭގައި ކަމަށެވެ. އަދި ޕްރޮގްރާމްގެ ހުރިހާ މަސައްކަތެއް ނިންމާލެވުނީ ގާތްގަނޑަކަށް ހަ މަސް ދުވަހުންކަމަށް ވިޝާލް ބުންޏެވެ.
މި އަހަރުގެ ރަމަޟާންމަހަށް ހާއްސަކޮށް ރާއްޖެޓީވީން ދަނީ ތަފާތު ޕްރޮގްރާމުތައް އުފައްދާ ބެލުންތެރިންނާ ހަމައަށް ގެނެސްދެމުންނެވެ. އޭގެ ތެރޭގައި އިޖުތިމާއީ ކަންކަމާ ގުޅޭ ޕްރޮގްރާމާއި، މުނިފޫހިފިލުވުމުގެ ތަފާތު ޕްރޮގްރާމުތަކުގެ އިތުރުން ދީނީ ޕްރޮގްރާމުތައްވެސް ހިމެނެއެވެ.
