ރޯދަ މަސް ފެށުމާއެކު ކުނި ޖަމާކުރުމުގެ ގިނަ މައްސަލަތަކެއް
15 އެޕްރީލު 2021 | ބުރާސްފަތި 03:19ވެމްކޯއިން ވަނީ ގޭބިސީތަކުން ދައްކަންޖެހޭ އުޖޫރަ މަހުން މަހަށް ދައްކަމުން ދިއުމަށް ހަނދާންކޮށްދީފައި
ވެމްކޯ މުވައްޒަފުން ކުނި ނެގުމުގެ މަސައްކަތުގައި
ރޯދަ މަސް ފެށުމާއެކު ކުނި ޖަމާކުރުމުގެ ގިނަ މައްސަލަތަކެއް ފެންމަތިވެއްޖެއެވެ.
މިކަމާ ގުޅޭގޮތުން ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ނެރުނު ނޫސްބަޔާނެއްގައި ވަނީ މާލެ ސަރަހައްދުގެ މަގުތަކަށް ކުނި ޖަމާކުރުމާ ގުޅޭ މައްސަލަތަކެއް ފާއިތުވި އޭޕްރިލް 12 އަދި 13 ވަނަ ދުވަހުން ފެށިގެން ލިބެމުންދާކަމަށް ބުނެފައެވެ. އެގޮތުން މާލެ ސަރަހައްދުގެ އެކި މަގުތަކަށް ގިނަ އަދަދެއްގެ ކުނި ޖަމާކޮށްފައިވާ މައްސަލަތަކެއް ވެމްކޯއަށް ލިބިފައިވާކަމަށް ވަނީ ބުނެފައެވެ.
މި ކުންޏަކީ ވެމްކޯއިން ގޭބިސީތަކަށް ފޯރުކޮށްދޭ ދުވަހު ކުނި ނެގުމުގެ އުސޫލަށް ނުފެތޭ، ބަރު އަދި ބޮޑެތި ކުނިކަން ވެމްކޯއިން ވަނީ ފާހަގަކޮށްފައެވެ. ވެމްކޯއިން މާލެ ސަރަހައްދުގެ ގޭބިސީތަކުގެ އިމާރާތުގެ ތިރީ ފަންގިފިލާއިން ކުނި ނެގުމުގެ ޚިދުމަތް ފޯރުކޮށްދެމުން ދަނީ، މިސަރަހައްދުގައި މިވަގުތު އޮތް ކޮވިޑް-19ގެ ކޮމިޔުނިޓީ ސްޕްރެޑްއާ ގުޅިގެން، ޚިދުމަތް ހޯއްދަވާ އެންމެހާ ފަރުދުންގެ ރައްކާތެރިކަމަށް ބެލުމަށްފަހުގައި ކަމަށް ވަނީ ބުނެފައެވެ. ކަންމިހެން ހުރުމާ އެކުވެސް، ޚާއްސަ އުސޫލުގެ ނާޖައިޒު ފައިދާ ވެމްކޯގެ ޚިދުމަތަށް ރަޖިސްޓްރީ ނުކޮށް ހުރި ވިޔަފާރިތަކުންނާއި ގޭބިސީތަކުން ނަގަމުންދާކަން ވެމްކޯއިން ވަނީ ފާހަގަކޮށްފައެވެ. އަދި މިފަދަ އަމަލުތަކަކީ ނުހަނު ކަންބޮޑުވާ، އަދި ހަރުކަށި އިބާރާތުން ކުށްވެރިކުރާކަމެއްކަމަށް ވަނީ ބުނެފައެވެ.
ވެމްކޯއިން ވަނީ ވެމްކޯގެ މަސައްކަތަށް ގޭބިސީތަކުން ދައްކަންޖެހޭ އުޖޫރަ މަހުން މަހަށް ދައްކަމުން ދިއުމަށް ހަނދާންކޮށްދީފައެވެ. ރަމަޟާންމަހަކީ އެހެން މަސްތަކާ ޚިލާފަށް ކުނި ގިނަވާ ދުވަސްވަރެއްކަމުން، މިމުއްދަތުގައި ގޭބިސީތަކަށް ފޯރުކޮށްދޭ ޚިދުމަތްތައް ރާވާލެވިފައިވާނީ ކަސްޓަމަރުންނަށް ލުއިފަސޭހަ ވާނެ ގޮތަކަށް ރޭގަނޑުގެ20:00ން 23:00 އާ ދެމެދު ކަމަށް ވެމްކޯއިން ބުނެއެވެ. ހަމައެއާ އެކު، ބަރު އަދި ބޮޑެތި ކުނި އުކާލުމަށް ވެމްކޯއިން ފޯރުކޮށްދޭ ރާއްޖޭގެ އެންމެއަގުހެޔޮ ޕިކަޕް ޙިދުމަތް ނުވަތަ ކެޕްސް ގެ ދަތުރުތައް ވެސް ވާނީ އިތުރު ފުރިހަމަކާ އެކު ހަފްތާގެ ކޮންމެ ދުވަހަކު ލިބޭނެގޮތަށް އިންތިޒާމްކުރެވިފައި ކަމަށް ބުނެފައިވެއެވެ.
