ކޮވިޑް-19 ގެ ކޭހެއް ފެނި ތ. އޮމަދޫ ވެސް މޮނިޓަރިންއަށް

ކޮވިޑް-19 ގެ ކޭހެއް ފެނި ތ. އޮމަދޫ މޮނިޓަރިންގެ ހާލަތަށް ގެނެސްފިއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ)ން ބުނީ އެ ރަށުގައި ސިއްހީ ގޮތުން ބަލަން ޖެހޭ ކަންކަން ބެލުމަށް އެރަށް މޮނިޓަރިންއަށް ލާފައިވާ ކަމަށާއި ރަށުގައި މިވަގުތު ތިބި އެއްވެސް މީހަކު އެ އޭޖެންސީން ވަކި ގޮތެއް އަންގަންދެން ރަށުން ފޭބުމާއި އޭޖެންސީގެ ހުއްދަ ނެތި ރަށަށް އެރުން މަނާވާނެ ކަމަށެވެ.

މިކަމާ ގުޅޭ މައުލޫމާތު ރާއްޖެއެމްވީއާ ހިއްސާ ކުރައްވަމުން އެރަށު ކައުންސިލްގެ ރައީސް ހާރޫން މުހައްމަދު ވިދާޅުވީ ތ. ވޭމަންޑުއަށް ގޮސް ރަށަށް އައިސްފައިވާ އެކަކު ކޮވިޑަށް ޕޮޒިޓިވް ވެފައިވާކަމަށާއި މިހާތަނަށް އެ ރަށުން 70 މީހުންގެ ސާމްޕަލް ނަގާފައިވާ ކަމަށެވެ. އަދި ޖުމުލަ 50 ގެ ކަރަންޓީނު ކުރެވިފައިވާ ކަމަށް ވެސް ހާރޫން ވިދާޅުވިއެވެ.

ހާރޫން ވިދާޅުވީ ރަށުގެ އާންމު ހާލަތު ރަނގަޅު ކަމަށާއި ނަމަވެސް ރަމަޟާން މަހަށް ވުމާއެކު ޒަރޫރީ ބޭނުން ތަކަށް ބޭނުންވާ ބައެއް ތަކެތި ހޯދުމުގައި ރައްޔިތުންނަށް ބައެއް ކަހަލަ ދަތިތައް ދިމާވަމުން ދާ ކަމަށެވެ. ސަބަބަކީ ގިނަ ފިހާރަތައް ހިންގާ ވެރިންނާއި ސޭޓުން ކަރަންޓީންކުރުން ކަމަށް ވެސް ވިދާޅުވިއެވެ. މީގެ އިތުރުން ރަށު ކައުންސިލުގައި މަސައްކަތް ކުރާ މީހުންނާއި ސިއްހީ މަރުކަޒުގައި މަސައްކަތް ކުރާ ގިނަ އަދަދެއްގެ މީހުން ވެސް ކަރަންޓީނުގައި މަޑުކުރަން ޖެހިފައިވާ ކަމަށް ވިދާޅުވިއެވެ.

އޮމަދޫ ރައްޔިތުންނަކީ އެކި ބޭނުންތަކަށް ވޭމަންޑުއަށް ދާ ބައެއް ކަމަށާއި ރަމަޟާން މަހަށް ތައްޔާރުވުމުގެ ގޮތުން ގިނަ އަދަދެއްގެ މީހުން އެރަށަށް ދިޔަ ކަމަށް ހާރޫން ފާހަގަ ކުރެއްވިއެވެ. ތ. ވޭމަންޑޫން ކޮވިޑް-19ގެ ޕޮޒިޓިވް ކޭސްތަކެއް ފެނިފައިވާއިރު ވޭމަންޑޫން ޕޮޒިޓިވް ކޭސްތަކެއް ފެނުމާ ގުޅިގެން، 15 މާރޗް 2021 ގެ ފަހުން އެރަށުގައި އުޅުމަށްފަހު އެހެން ރަށަކަށް  ގޮސްފައިވާ މީހެއްނަމަ، އެކަން ވީ އެންމެ އަވަހަކަށް އެރަށެއްގެ ހޮސްޕިޓަލް ނުވަތަ ސިއްހީ މަރުކަޒަށް އެންގުމަށް އެޗްޕީއޭއިން އިލްތިމާސް ކުރެއެވެ. އަދި އެ ދުވަހުގެ ފަހުން ވޭމަންޑޫން އައި މީހުން 10 ދުވަސް ވަންދެން ކަރަންޓީނުގައި ތިބުމަށް އެޗްޕީއޭއިން އަންގާފައިވެއެވެ.

ހަމައެއާއެކު ވޭމަންޑޫން އައިފަހުން 10 ދުވަސް ފާއިތުވެފައިވީ ނަމަވެސް ކޮވިޑަށް ޓެސްޓުކުރުމަށް އެޗްޕީއޭއިން އެދެއެވެ. ސާމްޕަލް ނެގުމުގެ ކަންކަން އެރަށެއްގައި ހުންނަ ހޮސްޕިޓަލް ނުވަތަ ސިއްހީ މަރުކަޒުން ހަމަޖެހޭނެ ކަމަށް ވެސް އެޗްޕީއޭއިން ބުނެއެވެ.