ކޮލިފައިން މެޗު ކުޅުމަށް އަބަހާނީއަށް އިތުރު ގޮންޖެހުމެއް

އޭއެފްސީ ކަޕުގެ ކޮލިފައިންގެ ޕްރިލިމިނަރީ ދެވަނަ ބުރުގައި ރާއްޖޭގެ ކުލަބު އީގަލްސްއާ ދެކޮޅަށް ކުޅެން ބަންގްލަދޭޝްގެ ޑާކާ އަބަހާނީއަށް އިތުރު ގޮންޖެހުމަކާ ކުރިމަތިލާން ޖެހިއްޖެއެވެ.

އަބަހާނީ އާއި އީގަލްސްގެ މީގެ ކުރިން ބަންގްލަދޭޝްގައި ކުޅެން މަސައްކަތްކުރި ނަމަވެސް، ކޮވިޑް-19 ގެ ކޭސްތައް އެ ޤައުމުގެ އިތުރުވެ، އެ ޤައުމު ލޮކްޑައުން ކޮށްފައި އޮތުމުން މި މެޗު ބަންގްލަދޭޝްގައި ކުޅެވޭނެ ގޮތް ވަނީ ނުވެފައެވެ. އަދި އެ ޤައުމުގެ ޞިއްޙަތާ ބެހޭ ވުޒާރާއިންވެސް މި މެޗު ބަންގްލަދޭޝްގައި ބޭއްވުމަށް އެއްބާރުލުން ދީފައެއް ނުވެއެވެ. އެހެންކަމުން އޭއެފްސީން ވަނީ މި މެޗު ނިއުޓްރަލް ދަނޑެއްގައި ކުޅެން ނިންމައި، ދަނޑެއް ހަމަޖެއްސުމަށް އަބަހާނީއަށް ހޮނިހިރު ދުވަހުގެރޭގެ ނިޔަލަށް މުހުލަތު ދީފައެވެ.

އެއާއެކު މި މެޗު އިންޑިއާގައި ކުޅެން އަބަހާނީން މީގެ ކުރިން މަސައްކަތްކުރި ނަމަވެސް، ރިޕޯޓުތައް ބުނާ ގޮތުން އަބަހާނީ އާއި އީގަލްސްގެ މެޗު ނޭޕާލުގައި ކުޅެން މިހާރު ވަނީ ހުށަހަޅާފައެވެ. އަދި އެކަމާ ގުޅޭ ގޮތުން ވަރަށް އަވަހަށް އޭއެފްސީން ވަކި ގޮތެއް ނިންމާނެއެވެ.

މީގެ ކުރިން ޕްރިލިމިނަރީ ދެވަނަ ބުރުގެ މެޗު ކުޅެން އޭއެފްސީން ތާވަލުކޮށްފައި އޮތީ ބުދަ ދުވަހަށެވެ. އެކަމަކު މި މެޗު ބަންގްލަދޭޝްގައި ކުޅެވޭނެ ގޮތް ނުވުމުން، އޭއެފްސީން ފަހުން ވަނީ މި މެޗު މި މަހުގެ 21 ވަނަ ދުވަހަށް ފަސްކޮށްފައެވެ. އެހެން ނަމަވެސް ކޮވިޑުގެ ނުރައްކާ ބޮޑުވެ، ބަނގްލަދޭޝްއިން ވަނީ ބުދަ ދުވަހުން ފެށިގެން ހަފުތާއަކަށް ވައިގެ ދަތުރުތައް ހުއްޓާލަން ނިންމާފައެވެ. އެގޮތުން ބުދަ ދުވަހުން ފެށިގެން އަންނަ ހަފުތާގެ އަންގާރަ ދުވަހާ ހަމައަށް އެތެރޭގެ އުދުހުންތަކާއި ބޭރުގެ އުދުހުންތަކުގެ 500 އަށްވުރެ ގިނަ ދަތުރުތައް ކެންސަލް ކޮށްފައިވާ ކަމަށް ބަނގްލަދޭޝްގެ ސިވިލް އޭވިއޭޝަން އޮތޯރިޓީން ވަނީ ބުނެފައެވެ. އެހެންކަމުން ކޮލިފައިން މެޗު ކުޅުމަށް ނޭޕާލަށް އަބަހާނީ ޓީމު ދެވޭނެ ގޮތެއްވެސް މިހާރު ނެތެވެ.

އަބަހާނީގެ މެނޭޖަރު ސަތުޔާޖިތު ދާސް ރޫޕޫ ވިދާޅުވީ އަބަހާނީ އާއި އީގަލްސްގެ މެޗު ނޭޕާލުގެ ވެރިރަށް ކަތުމަންޑޫގައި ބޭއްވުމުގެ ފެހި ސިގްނަލް ލިބިފައިވީ ނަމަވެސް، ވައިގެ ދަތުރުތައް ހުއްޓާލުމުން އެ ޤައުމަށް ދެވޭނެ ގޮތެއް މިހާރު ނެތް ކަމަށެވެ. އެހެންކަމުން އޭއެފްސީއަށްވެސް އެކަން އަންގާފައިވާނެ ކަމަށް ދާސް ރޫޕޫ ވިދާޅުވިއެވެ.

މި ފަހަރުގެ އޭއެފްސީ ކަޕުގެ ކޮލިފައިންގައި އީގަލްސް ވާދަކުރާއިރު، ޕްރިލިމިނަރީ ދެވަނަ ބުރަށް އެ ޓީމު ދަތުރުކުރީ ޕްރިލިމިނަރީ ފުރަތަމަ ބުރުގައި ބޫޓާނުގެ ޗެމްޕިއަން ތިމްޕޫ ސިޓީ އެފްސީ 2-0 ގެ ނަތީޖާއަކުން ބަލިކޮށްގެންނެވެ. ޕްރިލިމިނަރީ ދެވަނަ ބުރުގައި އަބަހާނީ އާއި އީގަލްސް ބައްދަލުކުރާއިރު، މި ބުރުން އީގަލްސް މޮޅުވެއްޖެނަމަ، ޕްލޭއޮފް ބުރުގައި އެ ޓީމު ކުޅެން ޖެހުމުގެ އެންމެ ފުރުޞަތު ބޮޑީ އިންޑިއާގެ ބެންގަލޫރާއެވެ.

ކޮލިފައިން ކާމިޔާބުކުރާ ޓީމަކަށް ގްރޫޕް ސްޓޭޖުގެ ފަހު ޖާގަ ލިބޭއިރު، ރާއްޖެއިން ގްރޫޕް ސްޓޭޖުގެ ސީދާ ޖާގައެއް ލިބިފައިވަނީ މިދިޔަ ސީޒަނުގެ ދިރާގު ދިވެހި ޕްރިމިއާ ލީގުގެ ޗެމްޕިއަންކަން ހޯދި މާޒިޔާ ސްޕޯޓްސް އެންޑް ރެކްރިއޭޝަނަށެވެ. މާޒިޔާގެ އިތުރުން ދެން ގްރޫޕް ސްޓޭޖުގައި ހިމެނެނީ އިންޑިއާގެ މޯހަން ބަގާން އާއި ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއެވެ.