އިންޑިއާގެ އެހީގެ ދަށުން ހުކުރު މިސްކިތް މަރާމާތު ކުރުމުގެ މަސައްކަތް ފަށައިފި
ހުކުރު މިސްކިތަކީ ދިވެހިރާއްޖޭގައި ހުރި އެންމެ އާސާރީ އަދި އެންމެ އެންމެ ރީތި އެއް މިސްކިތް
މާލޭ ހުކުރު މިސްކިތް
އިންޑިއާގެ ފަންނީ އަދި މާލީ އެހީތެރިކަމާއެކު ހުކުރު މިސްކިތް ހިމާޔަތް ކޮށް މަރާމާތުކުރުމުގެ މަސައްކަތް ފަށައިފިއެވެ.
ހުކުރު މިސްކިތް ހިމާޔަތްކޮށް މަރާމާތު ކުރުމުގެ މަސައްކަތް ކޮށްދިނުމަށް އިންޑިއާއިން ހުށަހެޅީ، އިންޑިއާގެ ބޮޑު ވަޒީރު ނަރޭންދްރަ މޯދީ، 2019 ވަނަ އަހަރުގެ ޖޫން މަހު ކުރެއްވި ރަސްމީ ދަތުރުފުޅުގައެވެ. މި މަސައްކަތަށް 1.5 މިލިއަން ޑޮލަރު ނުވަތަ 23 މިލިއަން ރުފިޔާގެ ހިލޭ އެހީ އިންޑިއާއިން ވަނީ ހުށަހަޅާފައެވެ.
ކޮވިޑްގެ ބަލިމަޑުކަމުގެ ސަބަބުން 2020 ވަނަ އަހަރު މި މަޝްރޫއުގެ މަސައްކަތަށް ވަނީ ބުރޫއަރާފައެވެ. އެކަމަކު ހުސްވި މާޗުމަހުގައި އާކިއޮލޮޖިކަލް ސާވޭ އޮފް އިންޑިއާ (އޭ.އެސް.އައި) ގެ ޓީމެއް ވަނީ ރާއްޖެ އައިސްފައެވެ. އަދި މިސްކިތް ހިމާޔަތް ކުރުމަށާއި މަރާމާތުކުރުމަށް ކުރަން ހުރި މަސައްކަތްތަކުގެ ޑޮކިއުމެންޓޭޝަން ވަނީ ފަށާފައެވެ.
މި މަޝްރޫއަށް ބޭނުންވާ މަސައްކަތްތެރިންނާއި، ސާމާނު އަދި ލަކުޑި ހޯދުމަށް މި ހަފްތާގެ ތެރޭގައި ޓެންޑާރ އަށް ހުޅުވާލާއިރު، ޓެންޑާގައި ރާއްޖޭގެ އަދި އިންޑިއާ ކުންފުނިތަކަށް ބައިވެރި ވެވޭނެއެވެ.
ހުކުރު މިސްކިތަކީ ދިވެހިރާއްޖޭގައި ހުރި އެންމެ އާސާރީ އަދި އެންމެ އެންމެ ރީތި އެއް މިސްކިތެވެ. މި މިސްކިތް ބިނާކުރެވިފައިވަނީ އައްސުލްޠާން އިބްރާހީމް އިސްކަންދަރު 1 ގެ ރަސްކަމުގައި 1658 ވަނަ އަހަރުގައެވެ. އޭރު މިސްކިތް އިމާރާތް ކުރުމަށް ބޭނުން ކުރީ ހިރިގަލެވެ. އަދި މަސައްކަތުގެ މާހިރުން ވަނީ ސިމެންތި ނުވަތަ މޯޓާ އަދި ލައިމް ފަދަ އެއްވެސް އެއްޗެއް ބޭނުން ކުރުމެއް ނެތި، ހިރިގަލުގައި ބިންވަޅުނަގައި، އެއްގާ އަނެއްގަލާއި ގުޅުވައިގެން އިމާރާތްކޮށްފައެވެ. މި މިސްކިތް 2008ވަނަ އަހަރު ޔުނެސްކޯގެ ދުނިޔޭގެ ތަރިކައިގެ ވަގުތީ ލިސްޓުގައި، ހިމެނުނެވެ.
ހުކުރު މިސްކިތް މަރާމާތު ކުރުމުގެ ތެރޭގައި، ސްޓްރަކްޗަރަލް ކޮންސާވޭޝަން މަސައްކަތާއި، ކެމިކަލް ޕްރިޒަވޭޝަން މަސައްކަތް ހިމެނޭނެއެވެ. މީގެ ތެރޭގައި މިސްކިތުގެ ވަޑާންގަނޑާއި، ބީމްތަކާއި، ފުރާޅުތަކާއި، ޕްލާސްޓާ ވޯކް، ޑްރެއިންޖް، ސައިނެޖް މަރާމާތުކުރުމާއި، ވަޑާންގަނޑާއި ލިޔެލާޖެހިފައިވާ ސަރަހައްދުތަކުގައި ކަތުރުފަނީގެ ސަބަބުންނާއި އެހެނިހެން ކަންކަމުގެ ސަބަބުން ލިބިފައިވާ ގެއްލުން ދެނެގަނެ އެތަންތަނުގެ އާބާތުރަ ފިލުވުން ހިމެނެއެވެ.
މި މަސައްކަތް ކުރިއަށް ގެންދިއުމަށް ނިންމާފައިވަނީ، ރޯދަ މަހުގެ އަޅުކަމަށް ހުރަސް ނޭޅޭނޭހެންނާއި، ވިއްސާރަ ދުވަސްވަރު އެކަށީގެންވާ މިންވަރަށް ސަމާލުވެގެންނެވެ. އަދި މަސައްކަތް ޖުމްލަ ދެ އަހަރުގެ ތެރޭގައި ނިންމާލެވޭނެ ކަމަށް ލަފާ ކޮށްފައިވެއެވެ.
އޭ.އެސް.އައި އަކީ އިންޑިއާގައި އަދި ދުނިޔޭގެ އެކި ކަންކޮޅުތަކުގައި އާސާރީ ތަރިކަތައް ހިމާޔަތްކޮށް މަރާމާތުކުރުމުގެ އެތައް އަހަރެއްގެ ތަޖުރިބާ ލިބިފައިވާ މުއައްސަސާއެކެވެ. އެގޮތުން ނިއު ދިއްލީ ގެ ޖަމާ މަސްޖިދް އާއި ކެމްބޯޑިއާގެ އެންގްކޯރް ވެޓް ކޮމްޕްލެކްސްގެ މަސައްކަތް ފާހަގަކޮށްލެވެއެވެ.
