އެޗްޕީއޭގެ ފޭސްބުކް ޕޭޖް ހެކްކޮށްފި

ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ފޭސްބުކް ޕޭޖް ހެކްކޮށްފިއެވެ.

އެކަން ކަށަވަރުކޮށްދެމުން އެޗްޕީއޭއިން ކޮށްފައިވާ ޓްވީޓެއްގައި ބުނެފައިވަނީ ފޭސްބުކް އެކައުންޓް ފޭސްބު ޕޭޖަށް ވަނުމަށް ދަތިތަކެއް ދިމާވެފައިވާ ކަމަށެވެ. އެކަން ހައްލު ކުރަން މަސައްކަތް ކުރަމުންދާ ކަމަށްވެސް އެޗްޕީއޭއިން ބުނެއެވެ. އަދި އެޗްޕީއޭގެ ޓްވިޓަރ، ވައިބަރ އަދި ޓެލެގްރާމްގެ ޗެނަލްތަކުން މައުލޫމާތުތައް ފޯރުކޮށްދެމުން ދާނެކަމަށްވެސް އެޗްޕީއޭއިން ބުނެއެވެ.

ކޮވިޑް-19 އާ ގުޅުންހުރި އެކި މައުލޫމާތުތައް އެޗްޕީއޭއިން އަންނަނީ ސޯޝަލް މީޑިޔާގެ އެކި ޕްލެޓްފޯރމްތަކުން ފޯރުކޮށްދެމުންނެވެ. އެގޮތުން ވެކްސިން ޖަހަމުންދާ ތަންތަނާއި ކޮވިޑްގެ ކޭސްތަކާއި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތަކާއި ގުޅޭގޮތުން އާންމުން ހޭލުންތެރިކުރުވުމަށް ގިނަ މައުލޫމާތުތަކެއް އަންނަނީ ސޯޝަލް މީޑިޔާ މެދުވެރިކޮށް ދެމުންނެވެ.

މީގެއިތުރުން ކޮވިޑާއި ކޮވިޑް ވެކްސިނާއި ގުޅޭގޮތުން އާންމުންގެ މެދުގައި އުފެދިފައި ހުންނަ ސުވާލުތަކަށްވެސް އަންނަނީ އެޕްލެޓް ފޯމްތައް މެދުވެރިކޮށް ޖަވާބުދެމުންނެވެ.

އެޗްޕީއޭގެ ފޭސްބުކް އެކައުންޓް ހެކްކޮށްފައިވާއިރު ރާއްޖޭގައި އެންމެ ފުރަތަމަ ކޮވިޑްގެ ކޭސްތައް ފެނުނު ދުވަސްވަރު އެޗްޕީއޭގެ ވެބްސައިޓްވެސް ހެކްކުރިއެވެ.