މީޑިއާ ކޮންޓްރޯލް ކުރާ ބިލަށް އާންމުން ހޭލުންތެރިކުރުމަށް ނޫސްވެރިން މަގުމައްޗަށް!
ހިޔާލު މަރާލައި ދުލުގައި މަރުތަޅު އަޅުވަން ކަމަށް ބުނެ ނޫސްވެރިން މަގުތަކަށް ނިކުތް
މީޑިއާ ކޮންޓްރޯލް ކުރާ ބިލަށް އާމުން ހޭލުންތެރިކުރުވުމުގެ ތެރެއިން
މިއުޅޭނީ ހިޔާލު މަރާލައި ދުލުގައި މަރުތަޅު އަޅުވަން ކަމަށް ބުނެ އާންމުން ހޭލުންތެރިކުރުމަށް ނޫސްވެރިން މަގުތަކަށް ނިކުމެއްޖެ އެވެ.
ބިލުގެ ނުރައްކާ ކަމާއި ބިލުގެ ސަބަބުން ގެއްލުންވަނީ ހަމައެކަނި ނޫސްވެރިންނަށް ނޫންކަން ރައްޔިތުންނަށް އޮޅުން ފިލުވައިދީ، ނޫސްވެރިން ވަނީ ވަކި ވަކި މީހުންނަށް ބިލުގައިވާ ކަންކަން ކިޔައިދީފަ އެވެ.
މީޑިއާ ކޮންޓްރޯލް ކުރާ ބިލުގެ ބޭނުމަކީ ސަރުކާރުގެ ވެރިން ރައްޔިތުންގެ ހަޒާނާއިން ވައްކަންކޮށް ހިންގާ ހިޔާނާތާއި ފަސާދަައިގެ އަމަލުތައް ސޯޝާލް މީޑިއާގެ ޒަރިއްޔާއިން ފަޅާއަރުވާލަމުން ދާތީ އެކަން ފޮރުވުމާއި މީޑިއާގެ ޒަރިއްޔާއިން ރައްޔިތުންގެ ސިކުނޑިތަކަށް ރާއްޖޭގެ ހުރިހާ ކަމެއް ރަނގަޅަށް ހިނގާ ކަމަށް ރައްޔިތުންނަށް ވިސްނައިދިނުމެވެ.
މި ބިލުން ރައްޔިތުންނަށް ސައްހަ މައުލޫމާތު އެނގުމުގެ ދޮރު ބަންދުކޮށް ހަގީގީ ބޮޑު މަންޒަރު ފޮރުވައި ސަރުކާރާއި ސިޔާސީވެރިން އެ މީހުންގެ މަސްލަހަތަށް ދައުލަތުގެ ހުރިހާ ވަސީލަތްތައް ބޭނުންކޮށް ނާޖާއިޒު މަންފާ ނެގުމުގެ އައު ދޮރެއް ހުޅުވޭނެ އެވެ.
މީގެ އިތުރުން މި ބިލުގެ ސަބަބުން ސަރުކާރާއި ސިޔާސީވެރިން މީޑިއާއަށް ފިލާތިބެ ހިންގާ ވައްކަމާއި ފަސާދައިގެ އަމަލުތަކުގެ ސަބަބުން ގައުމުގެ އިގްތިސާދާއި އިޖުތިމާއީ ފޭރާން އެކީ ހަލާކުވެގެން ދެ އެވެ. ދިރިއުޅުމުގެ އަގުތައް ބޮޑުވެ ޖީބަށް ބަރުވެއެވެ. އަދި އެތައްތަނެއް ފަހަތައް މި ގައުމު ސޮސްސާލައެވެ. އަދި ރައްޔިތުންގެ މަސްލަހަތު އެއްކިބާކޮށް އަމިއްލަ މަންފާއަށް ގާނޫނުއަސާސީ އާއި ގާނޫނުތަކާއި ގަވައިދުތައް ބަދަލުކޮށް ގައުމުގެ މުއްސަނދިކަމަކީ ހަމައެކަނި ސިޔާސީ ވެރިންގެ އެއްޗަކަށް ހަދައި ރައްޔިތުންގެ އަތުން ބާރުތައް ނިގުޅައިގަނެ އެވެ.
ފޭސްބުކް، އެކްސް އަދި އެނޫންވެސް ސޯޝަލް މީޑިއާގެ ވަސީލަތްތައް ވަކި ކޮމިޝަނެއްގައި ރަޖިސްޓްރީކުރަން މިބުލުގެ ސަބަބުން މަޖުބޫރު ކުރުވައެވެ. އަދި މީޑިއާތައް އިތުރަށް ސަރުކާރުގެ މުށުތެރެއަށްލައި ސަރުކާރުން ބޭނުންވާ ވާހަކައެއް ނުވަތަ ސަރުކާރު ޕްރޮމޯޓުވާ ފަދަ ހަބަރެއް ނޫނީ ރިޕޯޓު ނުކުރެވޭނެ އެވެ.
