އައްޑޫ "ސިޓީ ބާޒާރު"ގެ ދެވަނަ ފިޔަވަހި ނިންމާލެވޭނީ މެއި މަހަށް
ދެވަނަ ފިޔަވަހީގެ މަސައްކަތް ނިމުމުން ތިންވަނަ ފިޔަވަހި ފެށުމަށް ވަނީ ނިންމާފައި
އައްޑޫ ސިޓީ ބާޒާރު ތަރައްޤީކުރުމާ ގުޅޭގޮތުން ބޭއްވި ބައްދަލުވުމުގެ ތެރެއިން
އައްޑޫ "ސިޓީ ބާޒާރު"ގެ ދެވަނަ ފިޔަވަހި ނިންމާލެވޭނީ މެއި މަހުކަމަށް އައްޑޫ ސިޓީ ކައުންސިލުން ހާމަކޮށްފިއެވެ.
ސިޓީ ބާޒާރުގެ އެންމެ ފަހުގެ މަޢުލޫމާތާ ގުޅޭގޮތުން ސިޓީ ބާޒާރު ކޮމިޓީން މަޝްވަރާ ބައްދަލުވުމެއް ވަނީ ބާއްވާފައެވެ. މި ބައްދަލުވުމުގެ ތަފްސީލު އައްޑޫ ސިޓީ ކައުންސިލުން ވަނީ ޓުވިޓަރ މެދުވެރިކޮށް ހިއްސާކޮށްފައެވެ. އައްޑޫ ސިޓީ ކައުންސިލްގެ އިދާރާގައި އޮތް ބައްދަލުވުމުގައި ވާހަކަދައްކަވަމުން ދިވެހިރާއްޖޭގެ ޤައުމީ ޔުނިވަރސިޓީގެ ހިތަދޫ ކެމްޕަހުގެ މެނޭޖަރ، އިދުހާމް ފަހުމީ ވިދާޅުވީ މިހާރު ކުރިއަށްދަނީ ސިޓީ ބާޒާރުގެ ދެވަނަ ފިޔަވަހީގެ މަސައްކަތް ކަމަށާއި، މިގޮތުން ކޮންސްޓްރަކްޝަންގެ މަސައްކަތް ނިމިފައިވާ ކަމަށެވެ. އަދި ކުރިއަށް އޮތް ދެ މަސް ދުވަހުގެ ތެރޭގައި ދެވަނަ ފިޔަވަހީގެ މަސައްކަތްތައް މުޅިން ނިމޭނެ ކަމަށް ލަފާކުރެއްވޭ ކަމުގައިވެސް އިދުހާމް ފަހުމީ ވިދާޅުވިއެވެ. މީގެ އިތުރުން އިދުހާމް ފަހުމީ ވިދާޅުވީ، ދެވަނަ ފިޔަވަހީގެ މަސައްކަތް ނިމުމުން ތިންވަނަ ފިޔަވަހި ފެށުމަށް ނިންމަވާފައިވާ ކަމަށެވެ. މިގޮތުން ތިންވަނަ ފިޔަވަހީގެ ދަށުން ޕާކުކުރާ ސަރަޙައްދަކާއި، މިހާރު ހުރި ފުރަތަމަ ފިޔަވަހީގެ ހަތް ފިހާރައެއް ބޮޑުކުރުމުގެ މަސައްކަތް ކުރެވޭނެ ކަމުގައި އިދުހާމް ފަހުމީ ވިދާޅުވިއެވެ. މި ބައްދަލުވުމުގައި ވާހަކަދައްކަވަމުން އިދުހާމް ވަނީ އެ ޔުނިވަރސިޓީން ކުރައްވަމުން ގެންދަވާ މަސައްކަތްތަކަށާއި ކައުންސިލުން ދެއްވާ އެއްބާރުލެއްވުން ފާހަގަކުރައްވައި، އެކަމަށްޓަކައި ކައުންސިލަށް ޝުކުރު ދަންނަވައިފައެވެ.
ބައްދަލުވުމުގައި ވާހަކަދައްކަވަމުން އައްޑޫ ސިޓީ މޭޔަރ އަބްދުﷲ ޞާދިޤް ވިދާޅުވީ، ސިޓީ ބާޒާރުގެ ދެވަނަ ފިޔަވަހީގެ މަސައްކަތް ނިމުމުން ވަރަށް ބޮޑެތި ފަސޭހަތަކެއް ލިބިގެންދާނެ ކަމަށާއި، ތިންވަނަ ފިޔަވަހީގެ ދަށުން ރާއްވަވާފައިވާ ކަންތައްތަކަކީވެސް ވަރަށް މުހިންމު މަސައްކަތްތަކެއް ކަމަށެވެ. މި ބައްދަލުވުމުގައި، ސިޓީ ބުސްތާން ތަރައްޤީ ކުރުމާ ގުޅޭގޮތުންނާއި، ސިޓީ ބާޒާރުގައި ހުރި ފިހާރަތަކުގެ ތެރެއިން ޤަވާއިދުން ނުހިންގާ ފިހާރަތަކާމެދު ޢަމަލުކުރާނެ ގޮތަކާ ގުޅޭގޮތުންވެސް ބައްދަލުވުމުގެ ބައިވެރިން މަޝްވަރާކޮށްފައެވެ. އަދި މީގެ އިތުރުން ސިޓީ ބާޒާރުގައި މިހާރު ހުރި މައްސަލަތައް ހައްލުކޮށް ނިމެންވާއިރަށް، ދޫނުކޮށް ހުރި ފިހާރަތަކަށް އަލުން އިޢުލާންކުރުމާ ގުޅޭގޮތުންވެސް މި ބައްދަލުވުމުގައި މަޝްވަރާކޮށްފައެވެ.
ސިޓީ ބާޒާރަކީ ދިވެހިރާއްޖޭގެ ޤައުމީ ޔުނިވަރސިޓީގެ ކޯޕަރޭޓް ސޯޝަލް ރެސްޕޮންސިބިލިޓީ (ސީ.އެސް.އާރު)ގެ ދަށުން ކުރިއަށްގެންދާ މަޝްރޫޢެކެވެ.
