އައްޑޫ ސިޓީގެ އާމިނަތު އަމީޒާ: ރާއްޖޭގެ ފުރަތަމަ އަންހެން ކަތީބު

އައްޑޫސިޓީގެ އާމިނަތު އަމީޒާ ހަލީލަކީ ރާއްޖޭގެ ފުރަތަމަ އަންހެން ކަތީބެވެ. އުމުރުން 55 އަހަރުގެ އަމީޒާ ވަނީ ރާއްޖެޓީވީއަށް އޭނާގެ ތަޖުރިބާގެ ބައެއް ވާހަކަތައް ހިއްސާ ކުރައްވާފައެވެ.

އަމީޒާ, ސ މަރަދޫ ކުޑަކަތީބުކަމަށް އައްޔަނު ކުރެވުނީ 2000 ވަނަ އަހަރުގެ ފެބްރުއަރީ މަހުގެ 1 ވަނަ ދުވަހުއެވެ. އެއީ އޭރުގެ ރައީސް މައުމޫނު އަބްދުލް ޤައްޔޫމްގެ އެދިވަޑައިގަތުމަކަށް އަތޮޅުވެރިކަމާއި ރަށްރަށުގެ ވެރިންނަށް އަންހެނުން ހަމަޖެއްސެވުމުގެ މަސައްކަތުގެ ތެރެއިންނެވެ.

ފުރަތަމަ އަމީޒާއާ ހަވާލު ކުރެއްވީ ކުޑަ ކަތީބުކަމުގެ މަޤާމެވެ. އަމީޒާ ކިޔާދެއްވި ގޮތުގައި އެއީ އޭނާއަށްވެސް އަދި އޭނާ ނިސްބަތްވާ ރަށާއި އަތޮޅަށްވެސް ލިބިގެން ދިޔަ ވަރަށް ބޮޑު ޝަރަފެކެވެ.

ކަތީބުކަމުގެ މަޤާމަށް ހަމަޖެއްސުމުގެ ކަންކަން ކުރިއަށް ދިޔައިރުވެސް، މިއީ ތާރީޚީ ކަމަކަށްވާނެކަމަށް އަމީޒާ އުއްމީދުވެސް ނުކުރައްވައެވެ. އެ މަޤާމު ލިބުމުން އާދަޔާ ޚިލާފު އުފާވެރިކަމަކާއި ޝަރަފެއް އިހުސާސް ކުރެވުނުކަމަށް އޭނާ ވިދާޅުވިއެވެ.

އެންމެ ޒުވާން އިރުއްސުރެ އިޖުތިމާއީ މަސައްކަތުގައި އުޅުއްވި އަމީޒާއަށް އެ މަޤާމު ލިބުން ވެގެންދިޔައީ އެ މަސައްކަތަށް އިތުރުވި ބޮޅަކަށެވެ. ލިބުނު އައު ޖޯޝަކާއި ހިތްވަރަކަށެވެ.

އޭގެ އިތުރުން، މަޤާމު ޙަވާލުކުރިއިރު އަމީޒާއަކީ ރާއްޖޭގެ ފުރަތަމަ އަންހެން ކަތީބުކަން އެނގިވަޑައިނުގަންނަވާކަމަށާއި، ހައިރާންކަމެއް ލިބިގެންދިޔައީ އެކަން އެނގިލެއްވި ހިސާބުންކަމަށްވެސް އަމީޒާ ކިޔާދެއްވިއެވެ.

އެހެންނަމަވެސް މިއީ އަމީޒާގެ ފުރަތަމަ ވަޒިފާއެއް ނޫނެވެ. އެގޮތުން އަމީޒާ އުމުރުން 18 އަހަރުން ފެށިގެން ވަޒީފާ އަދާ ކުރައްވަމުން ގެންދަވާއިރު، އޭނާ އެންމެ ފުރަތަމަ އަދާކުރެއްވީ ޖަސްޓިސް މިނިސްޓްރީގެ ދަށުން ހިންގަމުން ދިޔަ ކޯޓު ނަންބަރު 7 ގައި ޝަރީއަތް ނިމުނު ގޮތުގެ ރިޕޯޓު ލިއުމުގެ ވަޒީފާއެވެ. އޭރު އެ ހުރިހާ މަސައްކަތެއްވެސް ކުރަމުންދިޔައީ އަތުލިއުމުންނެވެ. މިހާރު ޑިވައިސަށް ރެކޯޑުކޮށްގެން ކީބޯޑުން ޓައިޕްކޮށްލާ މަހުޟަރު ބަޔާންތައް އޭރު ތައްޔާރު ކުރަމުން ދިޔައީ އަޑުއަހައިގެން އަތު ލިއެގެންކަމަށް އޭނާ ކިޔާދެއްވިއެވެ.

އޭރު ޝަރުއީ ދާއިރާގައި އަމީޒާއަށް ލިބުނު މުސާރައަކީ 275 ރުފިޔާއެވެ. އެ 275 ރުފިޔާއިން ދިރިއުޅުމުގެ ޚަރަދުތައް އޮމާންކަމާއެކު ފޫބައްދާލާ ގޮތްވެސް އަމީޒާ ހިނިތުންވެ އިންނަވައި ރާއްޖެޓީވީއަށް ކިޔާދެއްވިއެވެ.

ކޮންމެއަކަސް، ޝަރުއީ ދާއިރާގައި އުޅުއްވި ވަޒީފާއާއި އެ ކަންކަމުގެ ތެރެއިން މައުލޫމާތު މުއްސަނދިވެ، ދުނިޔެއަށް އިތުރަށް ލޯ ހުޅުވިގެން ދިޔަކަމަށް އަމީޒާ ކިޔާދިނެވެ.

އޭގެ ފަހުން ޤައުމީ ކުތުބުޚާނާގެ ބަޖެޓު ކާތިބުކަމާއި، ކޯޓު ނަންބަރު 5 ގެ ޝަރީއަތް ކުރާ ބައިގެ ވަޒީފާއެއްގެ އިތުރުން، އުފަން ރަށް އިރުޝާދިއްޔާ ސްކޫލުގެ އިދާރީ މުވައްޒަފެއްގެ ވަޒީފާވެސް އަމީޒާ ވަނީ އަދާ ކުރައްވާފައެވެ.

އިރުޝާދިއްޔާ ސްކޫލުގައި 9 އަހަރު ހޭދަ ކުރުމަށްފަހު ދެން މަސައްކަތް ކުރެއްވީ ރަށު އޮފީހުގެ ކުޑަކަތީބުކަމުގެ މަޤާމުގައެވެ. ކަތީބުކަމަށް އައްޔަނު ކުރުމުގެ ކުރިންވެސް އަމީޒާ ގެންދެވީ ރަށުގެ އިޖުތިމާއީ ދާއިރާއިން އެކިއެކި ކޮމިޓީތަކުގައި ޙަރަކާތްތެރިވަމުންނެވެ.

1987ން ފެށިގެން ސަރުކާރު ޚިދުމަތުގައި އުޅުއްވި އަމީޒާ މިހާރު ވަޒީފާ އަދާކުރައްވަނީ އައްޑޫސިޓީ ކައުންސިލް އިދާރާގެ އެސިސްޓެންޓް ކައުންސިލް އެގްޒެކެޓިވްކަމުގެ މަޤާމުގައެވެ.

ވަޒީފާގައި ހޭދަވި މި ދިގު މުއްދަތުގައި އަމީޒާވެސް ވަނީ ގޮންޖެހުންތަކާ ކުރިމަތިލާފައެވެ. އެއީ ވަކި އަންހެނަކަށްވީތީ ކުރިމަތިވި ގޮންޖެހުމެއް ނޫންކަމަށް ޤަބޫލު ކުރައްވާކަމަށް އަމީޒާ ވިދާޅުވިއެވެ. އެހެންކަމުން އެ ހުރިހާ ގޮންޖެހުންތަކާއެކުވެސް އޭނާ ގެންދިޔައީ ހިތްވަރާއެކު މަސައްކަތް ކުރައްވައި، ނަމޫނާ ދައްކަވަމުންނެވެ.

އަމީޒާ ކިޔާދިން ގޮތުގައި އޭރު ކަތީބުންނަކީ ރައްޔިތުންނާ ނުހަނު ގާތުން، އެކުގައި މަސައްކަތް ކުރެއްވި ބައެކެވެ. ރައްޔިތުންނަށް ދިމާވާ ކޮންމެ އުފަލަކާއި ހިތާމައެއްގައިވެސް ގާތުން ބައިވެރިވާ ބައެކެވެ. "ކަތީބު ސްޓައިލް" އަކީ ކަޓު ސްޓައިލެއް ނޫންކަމަށް އަމީޒާ ވިދާޅުވެއެވެ.

ހަމަ ޔަޤީނުންވެސް އަމީޒާއަކީ އަންހެން ކަނބަލުންނަށްވެސް ނަމޫނާއެކެވެ. މުޅި އައްޑޫ ސިޓީގެ ފަޚުރެކެވެ. ދިވެހި ޒުވާނުންނަށްވެސް މިސާލެކެވެ.