ނޯވޭގެ ޒުވާން މިޑްފީލްޑަރު މާޓިން އޮޑެގާޑުގެ އެއްބަސްވުން ދާއިމީކުރުމަށް އާސެނަލުން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.

މި އަހަރުގެ ޖެނުއަރީ ޓްރާންސްފާގައި އުމުރުން 22 އަހަރުގެ އޮޑެގާޑް އާސެނަލަށް ބަދަލުވީ ރެއާލް މެޑްރިޑުގެ ލޯނު އެއްބަސްވުމެއްގެ ދަށުން، މި ސީޒަނުގެ ނިޔަލަށެވެ. އެއަށްފަހު އޮޑެގާޑް އަންނަނީ އާސެނަލުގެ މެދުތެރޭގައި މުހިންމު ދައުރެއް އަދާކުރަމުންނެވެ. އެހެންކަމުން އޮޑެގާޑުގެ އެއްބަސްވުން ދާއިމީކުރުމަށް އާސެނަލުން މަސައްކަތްކުރަމުން އަންނައިރު، ކުރިއަށް އޮތް ހޫނު މޫސުމުގެ ޓްރާންސްފާގައި އެކަމަށް އާސެނަލުން ރެއާލާއެކު މަޝްވަރާކުރާނެ ކަމަށް ރިޕޯޓުތައް ބުނެއެވެ.

ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި އާސެނަލުގެ ކޯޗު މިކޭލް އާޓެޓާ ބުނީ އޮޑެގާޑަކީ އެ ޓީމުގައި ހިމެނޭ މުހިންމު ކުޅުންތެރިއެއް ކަމަށާއި، އެކަން ދަނޑުމަތީގައި އޭނާ ސާބިތުކޮށްދެމުން އަންނަ ކަމަށެވެ. އެހެންކަމުން އެފަދަ ކުޅުންތެރިއަކު އާސެނަލުގައި މަޑުކުރުވުމަށް އޭނާވެސް ބޭނުންވާ ކަމަށާއި، އަދި އުންމީދަކީ އަންނަ ސީޒަނުގައިވެސް އާސެނަލުގެ ޖާޒީގައި އޮޑެގާޑް ފެނިގެންދިޔުން ކަމަށްވެސް ވަނީ ބުނެފައެވެ.

މި އަހަރުގެ ޖެނުއަރީ މަހު އޮޑެގާޑް އާސެނަލާ ގުޅުނުއިރު، އޭނާ ވަނީ މިހާތަނަށް އެ ޓީމަށް ކުޅެދިން 12 މެޗުގައި ދެ ލަނޑު ޖަހާފައެވެ. އެގޮތުން އޮޑެގާޑް އާސެނަލަށް ކާމިޔާބުކޮށްދިން ފުރަތަމަ ލަނޑަކީ ޔުއެފާ ޔޫރޮޕާ ލީގުގެ ގަދަ 16 ގެ ފުރަތަމަ ލެގުގައި އޮލިމްޕިއާކޯސްއާ ދެކޮޅަށް ޖެހި ލަނޑެވެ. އަދި މި މަހުގެ 14 ވަނަ ދުވަހު ޓޮޓެންހަމް ހޮޓްސްޕާ އަތުން 2-1 ގެ ނަތީޖާއަކުން އާސެނަލް މޮޅުވި މެޗުގައި، އޭނާ ވަނީ އާސެނަލާއެކު އިނގިރޭސި ޕްރިމިއާ ލީގުގެ ފުރަތަމަ ލަނޑު ކާމިޔާބުކޮށްފައެވެ.