ޝައުބާންމަހުގެ ދުވަސްތަކަކީ ބަރަކާތާއި ރަހުމަތުގެ ދުވަސްތަކެއް، މިދުވަސްތައް ނަގާނުލާ: ޚުތުބާ

މިހާރު ގުނަމުން މިދާ ޝައުބާންމަހުގެ ދުވަސްތަކަކީ ބަރަކާތާއި ރަހުމަތުގެ ދުވަސްތަކެއް ކަމަށާއި، މިދުވަސްތައް ނަގާނުލުމަށް ހުކުރު ޚުތުބާގައި ގޮވާލައިފިއެވެ.

ޝައުބާންމަހާއި ހެޔޮ އަމަލުކުރުން މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ މިހާރު ވޭތިކުރަމުން މިދަނީ ޝައުބާންމަހުގެ ދުވަސްތަައް ކަމަށާއި، ރަމަޟާން މަހަށް މަރުހަބާ ކިޔުމަށް ތައްޔާރުވަމުން އަންނަ ކަމަށެވެ. ޝައުބާން މަހުގެ ހަނދު ފެނުމާއެކު ރޯދައިގެ މާތްކަމާއި، ރޭއަޅުކަމާއި، ހެޔޮ އަމަލުތައް، ކޮންމެ މުސްލިމެއްގެ ހިތަށް ވަދެގެންދާ ކަމަށާއި، ޝަޢުބާންމަހު އަޅުކަމުގައި ހީވާގިވުމަކީ، ރަމަޟާންމަހު އަޅުކަމުގައި މަޝްޣޫލުވުމަށް ލިބޭ ތަމްރީނެއް ކަމުގައިވާ ކަމަށެވެ. އަދި ޚާއްސަ ގޮތެއްގައި ޝައުބާން މަހު މާތް ﷲ ގެ ދަރުމަޔާއި ސަވާބަށް އެދިގެން ހެޔޮ އަމަލު ކުރުމުގައި ދެމިތިބުމަށް ނަބިއްޔާ ނަސޭހަތްތެރިވެ ވަޑައިގެންނެވި ކަމަށް ޚުތުބާގައި ބުނެފައިވެއެވެ.

"ވެހޭތާ ފެންނަގާށޭ" ބުނާ ފަދައިން ފުރުސަތުގެ ބޭނުން ހެޔޮގޮތުގައި ހިފަން ޖެހޭކަން ފާހަގަކޮށް ޚުތުބާގައި ބުނީ ހެޔޮ އަމަލު ކުރުމުގައި އަވަދިނެތި އުޅޭވޭތޯ މަސައްކަތް ކުރަން ޖެހޭ ކަމަށާއި، ގިނަގިނައިން ހެޔޮ ޢަމަލު ކުރުމަކީ، ގަސްދަކާނުލައި ކުރެވޭ ފާފަތަކުން ސަލާމަތް ކުރައްވާނެ ކަމެއް ކަަމަށެވެ. އަދި މިފަދަ މޫސުމެއްގައި މާތް ނަބިއްޔާ ދައްކަވާފައިވާ މަގުގައި، ސާބިތުވެ ތިބުމަކީ، ކޮންމެހެން ބޭނުން ކަމެއް ކަމަށެވެ.

މީގެ އިތުރުން ޚުތުބާގައި ބުނީ އުމުރުގެ ދުވަސްތަކަށް ނިމުމެއް އަންނާނެ ކަމަށާއި، އެވަގުތު އަންނާނީ ކިހިނެއް، ކޮންއިރަކު ކަމެއް، ކޮންތާކު މީހަކަށް އެނގިގެން ނުވާ ކަމަށެވެ.

ޚުތުބާގައި ބުނީ ސުވަރުގެއަށް ދިޔުމަށް މަގުކޮށާ ބަޔަކު ކަމުގައިވާނަމަ ކީރިތި ޤުރުއާނާއި މާތްގެ ނަބިއްޔާގެ ސުންނަތަށް އަމަލުކުރަން ޖެހޭ ކަމަށެވެ.

އިންސާނުންނަކީ އަބަދާއި އަބަދު ހަނދާން އާކުރުމަށް ބޭނުންވާ ބައެއްކަން ފާހަގަކޮށް ޚުތުބާގައި ބުނީ ދަންނަ މީހުންގެ ކުރެން އަހައި އޮޅުން ފިލުވަން ޖެހޭ ކަމަށެވެ. އަދި ދީނީ ދަރުސްތައް އަހައި ހުކުމްތައް އޮޅުންފިލުވައި ތިމާގެ އަމިއްލަ ނަފްސު އިސްލާމީ އިލްމުން މުއްސަނދި ކުރަން ޖެހޭ ކަމަށް ޚުތުބާގައި ބުނެފައިވެއެވެ.