ފްރާންސްއާއި އިޓަލީންވެސް އެސްޓްރަޒެނެކާ ވެކްސިން ބޭނުންކުރުން ހުއްޓާލައިފި

ވެކްސިން ޖެހުމުން ލޭ ގަނޑުވުމުގެ ކަންބޮޑުވުމާއެކު ފްރާންސް އަދި އިޓަލީންވެސް އެސްޓްރަޒެނެކާ ވެކްސިން ޖެހުން މެދުކަނޑާލައިފިއެވެ.

ބޭރުގެ ނޫސްތަކުގައި ރިޕޯޓްކޮށްފައިވާ ގޮތުން ފްރާންސުން އެސްޓްރަޒެނެކާ ވެކްސިން ޖެހުން މެދުކަނޑާލަން ނިންމާފައިވާކަން ހާމަކޮށް ވާހަކަދައްކަވަމުން އެގައުމުގެ ރައީސް އެމެނުއެލް މެކްރޯން ވަނީ ޔޫރަޕިއަން މެޑިކަލް އެޖެންސީން ކުރިއަށް ގެންދާ ދިރާސާގެ ނަތީޖާ ހާމަކުރަންދެން ވެކްސިން ޖެހުން މެދުކަނޑަލާން ނިންމާފައިވާކަމަށް ވިދާޅުވެފައެވެ.

އިޓަލީގެ މެޑިސިން އޮތޯރިޓީން ވަނީ މިހާރު ފެންމަތިވެފައިވާ މައްސަލަތަކާއިއެކު އެގައުމުންވެސް އެސްޓްރަޒެނެކާ ވެކްސިން ބޭނުން ކުރުން މެދުކަނޑަލާފައިވާކަން ހާމަކޮށްފައެވެ.

ފްރާންސްއާއި އިޓަލީން މިނިންމުން ނިންމާފައި ވަނީ ޖަރުމަނުންވެސް މިގޮތަށް ނިންމާފައި ވަނިކޮށެވެ.

ޔޫރަޕްގެ ގައުމުތަކުން އެސްޓްރަޒެނެކާގެ ވެކްސިން ބޭނުން ކުރުން މެދުކަނޑާލަމުން އަންނައިރު، ޔޫރަޕިއަން މެޑިސިން އެޖެންސީން ދަނީ މިކަން ދިރާސާކުރަމުންނެވެ. އަދި އެސްޓްރަޒެނެކާ ބޭނުންކުރުމުގެ ރައްކާތެރިކަމާ ގުޅޭގޮތުން ވާހަކަދައްކަވަމުން ދުނިޔޭގެ ސިއްޙަތު ޖަމިއްޔާ، ޑަބްލިއުއެޗްއޯގެ ސްޕޯކްސްޕަރސަން މާގްރެޑް ހެރިސްވަނީ އެސްޓްރަޒެނެކާގެ ވެކްސިންއަކީ "ބަރާބަރު" ވެކްސިނެއްކަމަށް ސިފަކުރައްވާފައެވެ. އަދި މި ވެކްސިންޖެހުން ހުއްޓާލަންޖެހޭ އެއްވެސް ސަބަބެއް ނެތްކަމަށް ވިދާޅުވެ މި ވެކްސިންޖެހުން ކުރިއަށްގެންދިއުމަށް ވަނީ ލަފާދެއްވާފައެވެ. މިހާތަނަށް އައިއިރު އެސްޓްރަޒެނެކާގެ ވެކްސިން ދުނިޔޭގެ އާބާދީގެ 260 މިލިއަން މީހުންނަށް ޖަހާފައިވާއިރު، މި ވެކްސިންގެ ސަބަބުން އެއްވެސް މީހަކު މަރުވެފައިވާކަން ސާބިތުވެފައިނުވާކަމަށް ޑަބްލިއުއެޗްއޯގެ ސްޕޯކްސްޕަރސަން ވިދާޅުވިއެވެ.

އެސްޓްރަޒެނެކާއާއި އޮކްސްފޯޑް ޔުނިވާސިޓީ ގުޅިގެން ކޮވިޑް-19އަށް އުފައްދާފައިވާ ވެކްސިން އެމަޖެންސީކޮށް ބޭނުކުރުމުގެ ހުއްދަ ދުނިޔޭގެ ސިއްހަތު ޖަމިއްޔާއިން ދީފައިވަނީ މިއަހަރުގެ ކުރީކޮޅުއެވެ. އެސްޓްރަޒެނެކާއާއި އޮކްސްފޯޑްގެ ކޮވިޑް-19 ވެކްސިނަކީ ދުނިޔޭގެ ސިއްހަތު ޖަމިއްޔާއިން އެމެޖެންސީކޮށް ބޭނުންކުރުމުގެ ހުއްދަދިން ދެވަނަ ވެކްސިނެވެ. އެޖަމިއްޔާއިން އެންމެ ފުރަތަމަ ހުއްދަ ދީފައިވަނީ ފައިޒަރ އަދި ބައޯއެންޓެކްގެ ކޮވިޑް-19 ވެކްސިނަށެވެ.