އައްޑޫ ސިޓީގެ ޓޫރިޒަމް ޒޯންތަކުން ބިން ދޫކުރުން: ބިޑް ޑޮކިއުމެންޓް ވިއްކުމަށް ހަމަޖެހިފައިވަނީ އޮންލައިންކޮށް
މި ބިންތައް ކުއްޔަށް ދޫކުރުމަށް ހަމަޖެހިފައިވަނީ 20 އަހަރު ދުވަހުގެ މުއްދަތަށް
އައްޑޫ ސިޓީ އިކުއެޓޯރިއަލް ސެންޓަރ
އައްޑޫ ސިޓީގެ ޓޫރިޒަމް ޒޯންތަކުން ޓޫރިޒަމާ ގުޅުންހުރި ވިޔަފާރިތަކަށް ބިން ކުއްޔަށް ދޫކުރަން އައްޑޫ ސިޓީ ކައުންސިލްގެ އިދާރާއިން ނިންމާފައިވާއިރު ބިޑް ޑޮކިއުމެންޓް ވިއްކުމަށް ހަމަޖެހިފައިވަނީ އޮންލައިންކޮށް ކަމަށް އެ އިދާރާ އިން ބުނެފިއެވެ.
އައްޑޫސިޓީ ކައުންސިލުން ބުނީ ބިޑް ޑޮކިއުމެންޓް ގަންނަން ބޭނުންވާ ފަރާތްތަކުން ބިޑް އެޕްލިކޭޝަން ފޯމް ފުރިހަމަކޮށް އެ އިދާރާގެ ފައިނޭންސް ސެކްޝަންގެ މެއިލް finanace@adducity.gov.mv އަށް ފޯމް މެއިލް ކުރުމަށް އެދޭ ކަމަށާއި ބިޑް އެޕްލިކޭޝަން ފޯމް އެ އިދާރާގެ ވެބްސައިޓް www.adducity.gov.mv އިން ޑައުންލޯޑް ކުރެވޭނެ ކަމަށެވެ.
ބިޑް ޑޮކިއުމަންޓް ވިއްކުމަށް ހަމަޖެހިފައިވަނީ މި މަހުގެ 14ން 25ގެ ނިޔަލަށް ބަންދުނޫން ކޮންމެ ދުވަހެއްގެ ހެނދުނު 9:00ން މެންދުރު 1:00 އާހަމައަށް އައްޑޫ ސިޓީ ކައުންސިލްގެ އިދާރާ އިންނެވެ. ބިޑް ޑޮކިއުމަންޓް ވިއްކާ އަގަކީ 1000ރ (އެއްހާސް) ރުފިޔާއެވެ.
އައްޑޫ ސިޓީ ކައުންސިލުން ބުނީ އައްޑޫގެ ހިތަދޫ، މަރަދޫ، ފޭދޫ، ހުޅުދޫ އަދި މީދޫގެ ޓޫރިޒަމް ޒޯންތަކުގައި ޓޫރިޒަމާ ގުޅުންހުރި އެކިއެކި ވިޔަފާރިތައް ހިންގުމަށް ބޭނުންވާ ފަރާތްތަކަށް ބިން ކުއްޔަށް ދޫކުރުމަށް ކައުންސިލުން ނިންމުމާ ގުޅިގެން އެ ސަރަހައްދުން ކުއްޔަށް ބިން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށެވެ.
ޓޫރިޒަމާ ގުޅުންހުރި ވިޔަފާރިތައް ހިންގުމަށް ބިން ދޫކުރަނީ ހިތަދޫ ޓޫރިޒަމް ޒޯން، މަރަދޫ ޓޫރިޒަމް ޒޯން، ފެދޫ ޓޫރިޒަމް ޒޯން، ހުޅުދޫ ޓޫރިޒަމް ޒޯން އަދި މީދޫ ޓޫރިޒަމް ޒޯނުންނެވެ.
ކައުންސިލުން ބުނީ މި ބިންތައް ކުއްޔަށް ދޫކުރުމަށް ހަމަޖެހިފައިވަނީ 20 އަހަރު ދުވަހުގެ މުއްދަތަށް ކަމަށެވެ. މީގެ އިތުރުން ކައުންސިލުން ބުނީ ކަނޑައަޅާފައިވާ ގަޑިއަށް ޕްރޮޕޯސަލް ހުށަހެޅުމަށް އެދޭ ކަމަށެވެ. ޕްރޮޕޯޒަލް ހުށަހެޅުން 11 އޭޕްރީލްވާ ބުރާސްފަތި ދުވަހުގެ މެންދުރު 1:00ގައި ކައުންސިލްގެ އިދާރާގައި އޮންނާނެއެވެ.
