މުސްލިމުންގެ ބިމަކަށް ބަޔަކު އަރައި، މުސްލިމުންގެ އަތުން އެ ބިން ފޭރިގެންފި ނަމަ އެ ބިން މިނިވަން ކުރުމަށްޓަކައި އެންމެހައި މުސްލިމުން މަސައްކަތްކުރުމަށް ހުކުރު ޚުތުބާގައި ގޮވާލައިފިއެވެ.
''އިސްރާއާއި މިޢުރާޖުގެ ޛިކުރާއާއި މަސްޖިދުލް އަޤްޞާގެ ދިފާޢުގައި'' މިމައުޟޫޢުގެ މައްޗަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ މަސްޖިދުލް އަޤްޞާއަކީ މުސްލިމުންގެ ފުރަތަމަ ޤިބްލަކަމަށާއި އެއީ މުސްލިމުންގެ އެންމެ ޙުރްމަތްތެރި ތިން ޙަރަމްފުޅުގެ ތެރެއިން އެއް ޙަރަމްފުޅު ކަމަށެވެ. އެއީ ކީރިތި ރަސޫލާ އިސްރާ ކުރެއްވި، ބަރަކާތްތެރި ބިން ކަމަށާއި، އެއީ ދިގު ދަތުރުކޮށް، ބުރަ އުފުލައިގެން ވިޔަސް، ޒިޔާރަތް ކުރުމަށް ބާރުއެޅުއްވިގެންވާ ތިން މިސްކިތުގެ ތެރެއިން އެއް މިސްކިތް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މަސްޖިދުލް އަޤްޞާ އާއި ފަލަސްޠީނުގެ މައްސަލައަކީ، ހަމައެކަނި ފަލަސްޠީނު މީހުންގެ މައްސަލައެއް ނޫން ކަމަށާއި، އެއީ ހުރިހާ މުސްލިމުންގެ މައްސަލައެއް ކަމަށެވެ. މުސްލިމުންގެ ބިމަކަށް ބަޔަކު އަރައި، މުސްލިމުންގެ އަތުން އެ ބިން ފޭރިގެންފި ނަމަ އެ ބިން މިނިވަން ކުރުމަށްޓަކައި އެންމެހައި މުސްލިމުން މަސައްކަތް ކުރަންޖެހޭ ކަމަށް ޚުތުބާގައި ބުނެފައިވެއެވެ. އަދި އެ ބިމުގެ އަހްލުވެރިންނާ އެއްބައިވެ އެކަތިގަނޑަކަށް ވާން ޖެހޭ ކަމަށާއި، އެމީހުންގެ ކެކުޅުންތަކަށާއި، ގިސްލުންތަކަށާއި، ރުއިންތަކަށް އިޖާބަ ދިނުމަށް ޚުތުބާގައި ވަނީ ގޮވާލާފައެވެ.
މީގެ އިތުރުން ޚުތުބާގައި ބުނީ އިސްރާ އާއި މިޢުރާޖުގެ މަތިވެރި ޙާދިޘާއަކީ މާތް ކީރިތި ރަސޫލާ އަށް ދެއްކެވި މަތިވެރި މުޢުޖިޒާތެއް ކަމަށާއި، މުސްލިމުންނަށް ކުރިމަތި ކުރެއްވި ބޮޑު އިމްތިޙާނެއް ކަމަށެވެ.
މާތް ﷲ ވަޙީ ކުރައްވާފައި ވެއެވެ. މާނައީ: "އެކަލާނގެ ހުސް ޠާހިރުވަންތަކަމާއެވެ! އެކަލާނގެއީ، އަލްމަސްޖިދުލްޙަރާމުން، އަލްމަސްޖިދުލްއަޤްޞާއަށް އެކަލާނގެ އަޅާ، ރޭގަނޑުން ބައެއްގައި ގެންދެވި ރަސްކަލާނގެއެވެ. އެއީ އެތާނގެ ވަށައިގެން، ތިމަންރަސްކަލާނގެ ބަރަކާތް ލެއްވި ތަނެވެ. (އެއީ) ތިމަންރަސްކަލާނގެ ކުޅަދުންވަންތަކަމުގެ ހެކިތަކުގެ ތެރެއިން ބައެއް، އެކަލޭގެފާނަށް ދެއްކެވުމަށްޓަކައެވެ. ހަމަކަށަވަރުން، އެކަލާނގެއީ، މޮޅަށް އައްސަވާވޮޑިގެންވާ، މޮޅަށް ބައްލަވާވޮޑިގެންވާ ރަސްކަލާނގެއެވެ.ހުކުރު ޚުތުބާ
މި މަތިވެރި ދަތުރުފުޅުގެ ތެރޭގައި މާތް ﷲ މިއުއްމަތަށް ދެއްވި އެންމެ އަގު ބޮޑު ނިއުމަތަކީ ފަރުޟު ފަސް ނަމާދު ވާޖިބުކުރެއްވުން ކަމަށާއި، މަތިވެރިވެގެންވާ މި ޙާދިޘާގެ ތެރޭގައި ރަސޫލުގެ މައްޗަށާއި، އެކަލޭގެފާނުގެ އުއްމަތުގެ މައްޗަށް ނަމާދު ފަރްޟުކުރެއްވުން ހިމެނެއެވެ. ރަސޫލާ ބަޔާންކޮށް ދެއްވާފައިވާ ފަދައިން ނަމާދަކީ ދީނުގެ ތަނބު ކަމަށާއި، އެކަލޭގެފާނު ސުވަރުގެ ވަޑައިގަތުމުގެ ދާންކޮޅުގައި އޮންނަވައި އެންމެ ފަހުން ކުރެއްވި ވަޞިއްޔަތަކީ ވެސް ނަމާދަށް ރައްކާތެރިވުމެވެ. އެހެންކަމުން ނަމާދު ވަގުތުގައި އަދާކުރުމަށް ޚުތުބާގައި ވަނީ ނަސޭހަތްތެރިވެފައެވެ.
