މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދުގެ އިތުބާރުނެތްކަމަށް ހުށަހަޅާފައިވާ މައްސަލައިގައި 14 ދުވަހުގެ ނޯޓިސް ރައްޔިތުންގެ މަޖިލީހުގެ އިދާރާއިން އެކަމަނާއަށް ފޮނުވާފައިވާކަމަށް މަޖިލީހުގެ އިދާރާއިން ބުނެފިއެވެ.

10 މެމްބަރުންގެ ސޮޔާއެކު މި މައްސަލަ މަޖިލީހަށް ހުށަހަޅާފައިވަނީ މަރޗް މަހުގެ 10 ވަނަ ދުވަހުއެވެ. މިމައްސަލާގައި ސޮއިކޮށްފައިވަނީ އިދިކޮޅު ޕީޕީއެމް/ޕީއެންސީގައި ހިމެނިވަޑައިގަންނަވާ 9 މެމްބަރުންގެ އިތުރުން ކާށިދޫ ދާއިރާގެ މެމްބަރ އަބްދުﷲ ޖާބިރެވެ.

ގާނޫނު އަސާސީގެ 101 ވަނަ މާއްދާގެ (ށ) އަދި ރައްޔިތުންގެ މަޖިލީހުގެ ގަވާއިދުގެ 207 ވަނަ މާއްދާގެ (ށ) ގެ ދަށުން އެ އިތުބާރުނެތްކަމުގެ މައްސަލައާ މެދު މަޖިލީހުގައި ބަހުސް ފެށުމުގެ 14 ދުވަސް ކުރިން ދޭން ޖެހޭ ނޯޓިސް ވަޒީރަށް ފޮނުވަން ޖެހޭނެއެވެ. އެއަށްފަހު އެމައްސަލައަށް މަޖިލީހުގެ ތަޅުމުގައި ބަހުސްކުރާނެއެވެ. މިބަހުސްގައި ވަޒީރަށް ވެސް ޖަވާބު ދާރީވުމުގެ ފުރުސަތު ލިބިވަޑައިގަންނަވާނެއެވެ. އެއަށްފަހު އިތުބާރެނެތްކަމުގެ ވޯޓަށް އަހާނެއެވެ.

މަޖިލީހަށް ވަޒީރެއްގެ އިތުބާރުނެތްކަމަށް ހުށަހެޅޭނީ މަދުވެގެން 10 މެމްބަރުންގެ ސޮއާއެކުއެވެ. އަދި ވަޒީރެއްގެ އިތުބާރުނެތްކަމަށް ފާސްކުރުމަށް މަޖިލީހުގައި ތިއްބަވާ މެމްބަރުންގެ ތެރެއިން ދެބައިކުޅައެއްބައި މެމްބަރުންގެ (43 މެމްބަރުންގެ) ވޯޓު ބޭނުންވާނެއެވެ.

މިނިސްޓަރ ޒަހާގެ އިތުބާރުނެތްކަމަށް ބުނެ ހުށަހަޅާފައިވާ މައްސަލައިގައި ވަނީ މި މައްސަލަ ހުށަހަޅަނީ މަސްވެރިކަމާގުޅޭ ސަރުކާރުގެ ވައުދުތައް ނުފުއްދައި، މަސްވެރިކަން ކުރިއެރުވުމުގެ ޒިންމާ ފިޝަރީޒް މިނިސްޓަރަށް އަދާނުކުރެވޭތީއާއި ޒަހާ އެމަގާމުގައި ހުންނެވުމަކީ ދިވެހި މަސްވެރިންނާއި މަސްވެރި އާއިލާތައް އިތުރަށް ނިކަމެތި ވެގެންދާނެ ކަމެއްކަމަށްވާތީ ކަމަށެވެ.

މީގެއިތުރުން ދިވެހިންގެ ލޭނާރުކަމުގައިވާ މަސްވެރިކަމުގެ ސިނާޢަތުގައި މަސައްކަތްކުރަމުންދާ ދިވެހި މަސްވެރިންނާއި މަސްވެރި އާއިލާތަކަށް މިސަރުކާރުން ވެފައިވާ ވައުދުތައް ފުއްދުމަށް ކުރަންޖެހޭ މަސައްކަތް ނުކުރެވި މަސްވެރިންނަށް ދޭންޖެހޭ ޚިދުމަތްތައް ނުދެވޭކަމަށެވެ. އަދި މަސްވެރިން ބާނާ މަހަށް ހަމައަގު ހޯދައިނުދީ މަސްވެރިންގެ ޖީބަށް ޑޮލަރު ވަންނާނެ ގޮތެއް ނުހަދައި ދިވެހި އިގްތިޞާދުގެ ރޫފަހެޔޮ ނުކުރެވި މަސްވެރިކަމުގެ ސިނާއަތުން ނެރެވޭ ފައިދާ ބޮޑު ނުކުރެވި، މަސްވެރިކަމަށް ދުނިޔޭގެ ބާޒާރުގައި ލިބެންޖެހޭ ބޮޑު އަގު ދިވެހި މަސްވެރިންނަށް ހޯދައިނުދެވޭކަމަށެވެ.

މީގެއިތުރުން ރާއްޖޭގެ ރަށްތަކާއި ދުރަށް ދުއްވައިގެން އާންމުކޮށް މަސްވެރިކަން ކުރެވޭ ސަރަހައްދުތަކުގައި އޯފްޝޯ ފިޝަރީޒް ޕްލެޓްފޯމް ގާއިމުނުކުރުމާއި ތެލާއި އައިސް ފަދަ ތަކެތި ހޯދުމަށްޓަކައި މާދުރަށް ދުއްވަންޖެހޭތީ މަސްވެރިންގެ ޝަކުވާތައް އިންތިހާއަށް ބޮޑުވެފައިވާކަމަށް މި މައްސަލާގައި ބުނެފައިވެއެވެ.

އެހެންކަމުން ރައްޔިތުންގެ މަޖިލީހުގެ ގަވާއިދުގެ 101 ވަނަ މާއްދާގެ ދަށުން މި މައްސަލަ ހުށަހަޅާކަމަށް ވަނީ ބުނެފައެވެ.

19 ވަނަ ރައްޔިތުންގެ މަޖިލީހަށް ބަލާއިރު މިހާތަނަށް އައިއިރު އިތުބާރުނެތްކަމަށް ފާސްކޮށްފައިވަނީ ކޮމިޔުނިކޭޝަންސް މިނިސްޓަރކަމުގައި ހުންނެވި މުހައްމަދު މަލީހު ޖަމާލުގެއެވެ. ނަމަވެސް ވަޒީރުންގެ އިތުބާރުނެތްކަމުގެ މައްސަލަތަކެއް މަޖިލީހަށް މީގެކުރިން ވަނީ ވައްދާފައެވެ. ނަމަވެސް ވަޒީރުންގެ އިތުބާރުނެތްކަމުގެ މައްސަލައިގެ ބަހުސާ ހަމައަށް ދިޔުމުގެ ކުރިން އެވަޒީރުން ވަނީ އިސްތިއުފާދެއްވާފައެވެ.

އިދިކޮޅު ޕީޕީއެމް/ޕީއެންސީން ވަނީ މީގެކުރިން ހޯމް މިނިސްޓަރ އިމްރާން އަބްދުﷲގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައެވެ. ނަމަވެސް އެމައްސަލަ ފާސްވެފައެއްނުވެއެވެ.

މިނިސްޓަރ ޒަހާގެ އިތުބާރު ނެތްކަމުގެ މައްސަލަ އިދިކޮޅުން ވައްދާފައިވާއިރު އެކަމާ ގުޅިގެން ޒަހާ ނިސްބަތްވެވަޑައިގަންނަވާ މޯލްޑިވްސް ރިފޯމް މޫވްމަންޓް(އެމްއާރުއެމް)ން ބުނެފައިވަނީ މި މައްސަލައަކީ އެއްވެސް އަސާސެއްނެތް ސަރުކާރު ކޯލިޝަން ތެރޭގައި ފިތުނަވެރިކަން އުފެއްދުމަށް ސިޔާސީ ބޭނުމަކަށް ހުށަހަޅާފައިވާ މައްސަލައެއްކަމުގައި ދެކޭކަމަށެވެ. މިނިސްޓަރު ޒަހާ ދިފާއުކުރައްވައި ރައީސް މައުމޫނު ވިދާޅުވެފައިވަނީ ޒަހާއަށް އެމްއާރްއެމްގެ ފުރިހަމަ އިތުބާރު އެބަ އޮތް ކަމަށާއި ރާއްޖޭގެ މަސްވެރިކަމުގެ ސިނާއަތުގެ އިތުރުން ގައުމަށް ކޮށްދެއްވަނީ ފާހަގަކޮށްލެވޭ ވަރުގެ ޚިދުމަތެއް ކަމަށެވެ.