ކުޑަ ދެކުދިން ބަލިވެއިން މައްސަލައެއް ފުލުހުން ތަހުގީގު ކުރަނީ!
10 މާރިޗު 2021 | ބުދަ 21:55އެއް މައްސަލަ ފުލުހުންނަށް ހުށަހަޅާފައިވަނީ 2020 ޑިސެންބަރު 31 ވަނަ ދުވަހު
ޖިންސީ ގޯނާއާ ދެކޮޅަށް މާލޭގައި ކުރިއަށް ދިޔަ މުޒާހަރާއެއްގެ ތެރެއިން
ކުޑަ ދެކުއްޖަކު ބަލިވެ އިން މައްސަލައެއް ފުލުހުން ތަހުގީގު ކުރަން ފަށައިފިއެވެ.
ފުލުހުން ބުނީ ސެންޓްރަލް ޕޮލިސް (ދ، ފ، މ) ގައި ހިމެނޭ ރަށެއްގައި 18 އަހަރު ނުފުރޭ ދެ ކުއްޖަކު ބަލިވެ އިން މައްސަލައެއް ފުލުހުންނަށް ހުށަހަޅާފައިވާ ކަމަށެވެ.
މީގެ ތެރެއިން އެއް މައްސަލަ ފުލުހުންނަށް ހުށަހަޅާފައިވަނީ މިދިޔައަހަރުގެ ޑިސެންބަރު 31 ވަނަ ދުވަހު ކަމަށާއި، މި މައްސަލާގައި މިހާތަނަށް މީހަކު ހައްޔަރުކޮށްފައި ނުވާ ކަމަށް ފުލުހުން ބުނެއެވެ. އަދި ދެވަނަ މައްސަލަ ހުށަހަޅާފައިވަނީ މިދިޔަ ޖެނުއަރީ މަހުގެ 19 ވަނަ ދުވަހު ކަމަށާއި، މިމައްސަލައާ ގުޅިގެން ކޯޓު އަމުރެއްގެ ދަށުން 2021 ފެބްރުއަރީ 18 ވަނަ ދުވަހު 22 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށް ފުލުހުން ބުނެއެވެ.
މި ދެ މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
ކުޑަކުދިންނާ ގުޅުން ހުންނަ މައްސަލަތަކަކީ ފުލުހުން ޚާއްޞަ ސަމާލުކަމެއް ދީގެން ތަހުގީގުކުރަމުންދާ މައްސަލަތަކެއް ކަމަށްވާއިރު، ދޭތެރެ ދޭތެރެއިން މިފަދަ މައްސަލަތައް ފެންމަތިވަމުން ދެއެވެ. އަދި ކުޑަކުދިންނަށް ޖިންސީ ގޯނާ ކުރުމުގެ މައްސަލަތައް މިހާރު ރިޕޯޓް ކުރެވޭ މިންވަރު ވެސް ވަނީ އިތުރުވެފައެވެ.
