ކ. މާލެ
|
7 މާރޗް 2021 | އާދީއްތަ 21:13
ދިޔަމިގިއްޔާއި ވިލުފުށި ބައްދަލުކުރި މެޗުގެ ތެރެއިން: މި މެޗުން ވިލުފުށި މޮޅުވީ 8-3 ން
ދިޔަމިގިއްޔާއި ވިލުފުށި ބައްދަލުކުރި މެޗުގެ ތެރެއިން: މި މެޗުން ވިލުފުށި މޮޅުވީ 8-3 ން
ރައިސިން ސްޓާސް ސްޕޯޓްސް އެކެޑަމީ
އުރީދޫ އޭކޭއައި-އެލްއެފް ޔޫތު ޗެމްޕިއަންޝިޕް
ދިޔަމިގިލި އަތުން ވިލުފުއްޓަށް ބޮޑު މޮޅެއް
 
ދިޔަމިގިލި އަތުން ވިލުފުށި މޮޅުވީ 8-3 ން
 
ކުޅުނު ދެ މެޗުންވެސް ވިލިފުށި ވަނީ މޮޅުވެފައި

ތ. ވިލުފުށީ ރައިސިން ސްޓާސް ސްޕޯޓްސް އެކެޑަމީގެ ފަރާތުން އިންތިޒާމުކޮށްގެން ބާއްވާ "އުރީދޫ އޭކޭއައި-އެލްއެފް ޔޫތު ޗެމްޕިއަންޝިޕް 2021" ގައި އާދީއްތަ ދުވަހު ކުޅުނު މެޗުން ދިޔަމިގިލި އަތުން ވިލުފުށި މޮޅުވެއްޖެއެވެ.

މި މުބާރާތަކީ ތ. އަތޮޅުގެ 21 އަހަރުން ދަށުގެ ޒުވާނުންނަށް ހާއްސަކޮށްގެން ބާއްވާ ބޮޑު ފުޓްބޯޅަ މުބާރާތެކެވެ. މި މުބާރާތުގައި އާދީއްތަ ދުވަހުގެ ހަވީރު ކުޅުނު މެޗުން ވިލުފުށި މޮޅުވީ ދިޔަމިގިލި އަތުން 8-3 ގެ ނަތީޖާއަކުންނެވެ.

ވިލުފިށީ ޓާފް ފުޓްބޯޅަ ދަނޑުގައި ކުޅުނު މެޗުގެ ވަރަށް ކުރީކޮޅު އެ ރަށުން ވަނީ ލީޑު ނަގާފައެވެ. އެގޮތުން މެޗު ފަށައިގެން އަށްވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު ޝަދުހާން އަޙްމަދެވެ. އަދި މެޗުގެ 16 ވަނަ މިނެޓުގައި އަބްދުﷲ ނައިޝަމް އުސްމާން ވަނީ ވިލުފުއްޓަށް ލީޑު ފުޅާކޮށްދީފައެވެ.

މި މެޗުގެ 38 ވަނަ މިނެޓުގައި މައިޝަމް މުޙައްމަދު ދިޔަމިގިއްޔަށް ފަރަގު ކުޑަކޮށްދިން ނަމަވެސް، ފުރަތަމަ ހާފު ނިމުމުގެ ކުރިން މާޒިން އަޙްމަދު ވަނީ ވިލުފުއްޓަށް އަލުން ލީޑު ފުޅާކޮށްދީފައެވެ. އަދި ފުރަތަމަ ހާފުގެ ފަހު މިނެޓުގައި ވިލުފުށީގެ ނައިޝަމް އިތުރު ލަނޑެއް ޖެހިއިރު، ދެވަނަ ހާފު ފަށައިގެން ދެވަނަ މިނެޓުގައި ނައިޝަމް ވަނީ ވިލުފުށީގެ ފަސްވަނަ ލަނޑު ޖަހައި، މެޗުގައި ހެޓްރިކް ހަދާފައެވެ.

މި މެޗުގައި ވިލުފުށިން ކާމިޔާބުކުރި ހަވަނަ ލަނޑަކީ މެޗުގެ 54 ވަނަ މިނެޓުގައި ދިޔަމިގިލީގެ ހުސެއިން އަޒުމީ އަތުން ބައިކޮޅަށް ވަން ލަނޑެކެވެ. އެކަމަކު އޭގެ ތިން މިނެޓު ފަހުން މައިޝަމް ވަނީ ދިޔަމިގިލިން ކާމިޔާބުކުރި ދެވަނަ ލަނޑު ޖަހާފައެވެ. ނަމަވެސް އޭގެ ފަހުން ސަލްމާން ސަދީފް ވިލުފުއްޓަށް އިތުރު ދެ ލަނޑު ޖަހައިދިންއިރު، މެޗުގައި ދިޔަމިގިލިން ކާމިޔާބުކުރި ތިންވަނަ ލަނޑު 71 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ ޖައިލަމް މުޙައްމަދެވެ.

އާދީއްތަ ދުވަހު ކުޅުނު މި މެޗުން ވިލުފުށި މޮޅުވިއިރު، މުބާރާތުގައި ހޮނިހިރު ދުވަހު ކުޅުނު މެޗުން ވިލުފުށިން ވަނީ 2-0 ގެ ނަތީޖާއަކުން ގުރައިދޫ ބަލިކޮށްފައެވެ.

ތ. އަތޮޅުގެ ހަތަރު ރަށެއް ވާދަކުރާ މި މުބާރާތް ކުރިއަށްދަނީ ހަތަރު ޓީމުގެ މެދުގައި ލީގު އުސޫލުން ކުޅެ، ލީގު ބުރުގެ އެއްވަނައަށްދާ ޓީމަކަށް ފައިނަލުގެ ސީދާ ޖާގައެއް ލިބޭ ގޮތަށެވެ. އަދި ފައިނަލުގެ ފަހު ޖާގަ ލިބޭނީ ދެވަނައަށް ދާ ޓީމާއި ތިންވަނައަށް ދާ ޓީމުގެ މެދުގައި ކުޅޭ ސެމީ ފައިނަލް މެޗުން މޮޅުވާ ޓީމަކަށެވެ.

ވިލުފުށީ ރައިސިން ސްޓާސް ސްޕޯޓްސް އެކެޑަމީން އިންތިޒާމުކުރާ މި މުބާރާތުގެ މެއިން ސްޕޮންސަރަކަށް އުރީދޫ މޯލްޑިވްސް ހަމަޖައްސާފައިވާއިރު، މީޑިއާ ޕާޓްނަރަކީ ރާއްޖެޓީވީ ސްޕޯޓްސްއެވެ. އަދި މުބާރާތުގެ ޕްރިންޓިން ޕާޓްނަރަކަށް އިންކްޑް މޯލްޑިވްސް ހަމަޖައްސާފައިވާއިރު، އޮފިޝަލް ޖާޒީ ޕާޓްނަރަކީ ދަ ޑަބްލިއު ސްޕޯޓްސްއެވެ. މީގެ އިތުރުން ލައިވް ކަވަރޭޖް ޕާޓްނަރަކަށް ޗޮކޮލެޓް ކެފޭ އެންޑް ބިސްޓްރޯ ހަމަޖައްސާފައިވާއިރު، އޮންލައިން މީޑިއާ ޕާޓްނަރަކީ ބޯޅަ.އެމްވީއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
60%
30%
0%
0%
10%
ކޮމެންޓް