އިތުބާރު ނެތްކަމުގެ މައްސަލަ ރައްދުވަނީ އަޅުގަނޑަށްތޯ ޝައްކު އުފެދޭ، ހުށަހަޅާފައިވަނީ އަސާސެއްނެތް މައްސަލައެއް: މަލީހު
1 މާރިޗު 2021 | ހޯމަ 08:00މިކަމަކީ މީގެކުރީގެ ތިން މިނިސްޓަރެއް ކުރައްވަންޖެހޭ ކަމެއްކަމަށް ވިދާޅުވި
މިނިސްޓަރ އޮފް ކޮމިޔުނިކޭޝަންސް ، ސައިންސް އެންޑް ޓެކްނޮލޮޖީ މިނިސްޓަރ މުހައްމަދު މަލީހު ހޯމަ ދުވަހުގެ ޖަލްސާގައި
މިނިސްޓަރ އޮފް ކޮމިޔުނިކޭޝަންސް, ސައިންސް އެންޑް ޓެކްނޮލޮޖީ މިނިސްޓަރ މުހައްމަދު މަލީހުގެ ޖަމާލުގެ އިތުބާރުނެތްކަމުގެ މައްސަލަ މަޖިލީހަށް ހުށަހަޅާ ބަހުސްކުރަމުންދާއިރު އެ މައްސަލައަށް ޖަވާބު ދެއްވުމަށް ލިބިވަޑައިގެންނެވި ފުރަތަމަ ފުރުސަތުގައި އެމައްސަލަ ރައްދުވަނީ ޚުދު އެމަނިކުފާނަށް ކަމާމެދު ޝައްކުއުފެދޭކަމަށް ވިދާޅުވެއްޖެއެވެ.
މިނިސްޓަރ މަލީހުގެ އިތުބާރުނެތްކަމުގެ މައްސަލައަށް ބަހުސްކުރުމަށް ދެ ގަޑިއިރު ކަނޑައަޅާފައިވާއިރު މިނިސްޓަރަށް 30 މިނެޓް ވަނީ ލިބިވަޑައިގަންނަވާފައެވެ. މި 30 މިނެޓް ބަހާލާފައިވަނީ ތިން ފަހަރެއްގެ މަތިން 10 މިނެޓް ވާހަކަދެއްކެވުމުގެ ފުރުސަތު ދޭ ގޮތަށެވެ. އެގޮތުން އެންމެ ފުރަތަމަ އިތުބާރު ނެތްކަމުގެ މައްސަލަ ގަލޮޅު ދެކުނު ދާއިރާގެ މެމްބަރ މީކާއިލް ނަސީމް ހުށަހެޅުއްވުމުން އެކަމަށް ޖަވާބު ދެއްވުމަށް ލިބިވަޑައިގެންނެވި ފުރުސަތުގައި މިނިސްޓަރ އެންމެ ފުރަތަމަވެސް ވިދާޅުވީ ހުށަހަޅާފައިވާ މައްސަލަ ސާފުކޮށްދެއްވުމަށެވެ. އެއާއެކު މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް، ރައީސް މުހައްމަދު ނަޝީދު ހުށަހަޅާފައިވާ މައްސަލައަކީ މިނިސްޓަރުގެ އިތުބާރު ނެތްކަމުގެ މައްސަލަކަމަށް ވިދާޅުވިއެވެ. އެއާއެކު ދެން މިނިސްޓަރ ފާހަގަކުރައްވަން ފެއްޓެވީ މަޖިލީހުން ހުށަހަޅާފައިވާ ކަރުދާހުގައި ހުރި މައްސަލަތަކެވެ.
މިނިސްޓަރ މިމޭރުމުން ވާހަކަދެއްކެވުމުން އަނެއްކާވެސް ރިޔާސަތުގައި އިންނެވި މަޖިލީހުގެ ރައީސް ވަނީ މިނިސްޓަރަށް ކިޔަނީ ކޮން ނަމެއްތޯ އައްސަވާފައެވެ.
ތިން ފަހަރަށް އެގޮތަށް އެއްސެވުމުން މިނިސްޓަރުގެ ނަން ވަނީ ވިދާޅުވެފައެވެ. އެއާއެކު ރައީސް ނަޝީދު ވަނީ މިނިސްޓަރ މަޖިލީހަށް ހާޒިރުވެވަޑައިގެން ޖަވާބު ދެއްވަނީ ކޮމިޔުނިކޭޝަންސް މިނިސްޓަރުކަން ސާފުވާތީކަމަށާއި އެކަމަށް ޖަވާބުދާރީ ވުމަށްޓަކައި މިނިސްޓަރ ވަޑައިގެން ޖަވާބު ދެއްވަމުންދާކަމަށެވެ.
ރައީސް ނަޝީދު މިމޭރުމުން ވާހަކަދެއްކެވުމުން މިނިސްޓަރ މަލީހު ވަނީ އިތުބާރުނެތްކަމުގެ މައްސަލާގައި ހުރި ކަންތައްތަކާ ގުޅޭގޮތުން ވާހަކަދައްކަވާފައެވެ.
އެގޮތުން މައްސަލާގައި ފާހަގަކުރާ ގަވާއިދުތަކަކީ ކޮމިޔުނކޭޝަން އޮތޯރިޓީ ގެ މުވައްޒަފުންގެ ބުރަ މަސައްކަތުގެ ތެރެއިން އެކަށީގެންވާ ބަޖެޓް ނުލިބޭ ހާލުގައިވެސް ރައީސް ޞާލިހުގެ ވެރިކަމުގެ ފުރަތަމަ ދެ އަހަރުގެ ތެރޭގައި އެމަނިކުފާނުގެ ލަފާގެ މަތިން ހަދާފައިވާ ގަވާއިދެއްކަމަށް ވިދާޅުވިއެވެ. އަދި މިކަމަކީ މީގެކުރީގެ ތިން މިނިސްޓަރެއް ކުރައްވަންޖެހޭ ކަމެއްކަމަށް ވިދާޅުވެ މަލީހު ވިދާޅުވީ އަދަބު ދެއްވަނީ އެތިން މިނިސްޓަރުން ކުރައްވަންޖެހޭ ކަމެއް ނުކުރެއްވީމަތޯ ސުވާލު އުފައްދަވާފައެވެ.
މިނިސްޓަރ ތަކުރާރުކޮށް ވިދާޅުވަމުން ގެންދެވީ ހުށަހެޅިގެން އުޅެނީ އަސާސެއްނެތް މައްސަލައެއް ކަމަށެވެ. އަދި ގަވާއިދުތައް ހަދަން އުޅުމުން މިނިސްޓަރ ހުރަސްއެޅުއްވިކަމަށް ދައްކާ ވާހަކަތަކަކީ ވެސް އަސާސެއްނެތް ވާހަކަތަކެއްކަމަށް ވިދާޅުވިއެވެ.
މިނިސްޓަރ ވިދާޅުވީ ހުށަހެޅިފައިވާ މައްސަލައަކީ 13 ނޮވެމްބަރ 2020 ގައި ވީޓީީގެ ގޮނޑިކޮޅު ޕްރޮގްރާމްގައި ދެއްކި ވާހަކައަކަށް ބިނާކޮށް މަޖިލީހުގެ މަދު މެމްބަރުންތަކެއް ހުށަހަޅައިގެން އުޅޭ މައްސަލައެއްކަން ވަރަށް ސާފުކަމަށެވެ. މިއީ ޤާނޫނު އަސާސީގެ 27 ވަނަ މާއްދާގެ ބާރު ކަނޑުވާލުމަށް މަޖިލީހުގެ މަދު މެމްބަރުންތަކެއް ކުރާ ދަށު ދަރަޖައިގެ ކަމެއްކަމަށް މިނިސްޓަރ ވިދާޅުވިއެވެ. އަދި މިއީ މިނިވަން ނޫސްވެރިކަމަށް އޮތް ބިރެއްކަމަށް މިނިސްޓަރ ތުހުމަތުކުރެއްވިއެވެ.
މިނިސްޓަރ ވަނީ ތަކުރާރުކޮށް މިކަމުގައި މަޖިލީހުން އަމަލުކުރަމުންދަނީ ހުދުމުޚުތާރު ކޮށްކަމަށް ވިދާޅުވެފައެވެ.
