އިންސްޕެކްޝަންގައި އުސޫލުތަކާ ތަކުރާރުކޮށް ޚިލާފުވުމުން އެތަނެއް 24 ގަޑިއިރަށް ބަންދުކުރަނީ!
1 މާރިޗު 2021 | ހޯމަ 06:47ފުރަތަމަ ފަހަރުނަމަ ވައިޓް ނޯޓިސްއެއް ދެވޭނެ
ހާބަރު ފުޑް ކޯޓްތައް، ޚިދުމަތް ދެމުންދަނީ ގައިޑްލައިންއާ އެއްގޮތަށްތޯ ބަލާނެ
ކޮވިޑް-19 އިން ރައްކާތެރިވުމުގެ ގޮތުން އާންމު ޚިދުމަތްދޭ ތަންތަނުގައި އަމަލުކުރަން ޖެހޭ ގޮތަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެކުލަވާލާފައިވާ މިންގަނޑުތަކާ އެއްގޮތަށް ތަންތަން ހުރިތޯ ބެލުމަށް ކުރިއަށް ގެންދާ ޚާއްސަ އިންސްޕެކްޝަންގައި 3 ވަނަ މަރުހަލާގައި ޖޫރިމާނާކުރުމުގެ ބަދަލުގައި އެތަނެއް 24 ގަޑިއިރަށް ބަންދުކުރަން ނިންމައިފިއެވެ.
ކޮވިޑް-19އާ ގުޅިގެން އާއްމުން އެއްވާ ތަންތަނުގައި ހުންނަންޖެހޭނެކަމަށް އެޗްޕީއޭއިން ކަނޑައަޅާފައިވާ މިންވަރަށް އެ ތަންތަނުގެ ޙާލަތު ހުރިތޯ ބެލުމަށް 5 އިންސްޕެކްޝަންއެއް މިހާތަނަށް ވަނީ ކުރިއަށްގެންގޮސްފައެވެ. އެގޮތުން ސަރުކާރާއި އަމިއްލަ އޮފީސްތަކުގައި އެޗްޕީއޭގެ މިންގަނޑަށް ޢަމަލުކުރާ މިންވަރު ބެލުމަށްޓަކައި މިދިޔަ އަހަރުގެ އޮކްޓޯބަރު މަހު ވަނީ އިންސްޕެކްޝަންއެއް ކުރިއަށްގެންގޮސްފައެވެ. މީގެ އިތުރުން ކާބޯތަކެތީގެ ޚިދުމަތްދޭ ތަންތަނާއި، ފިހާރަތަކާއި، ،ފިޓްނަސް ސެންޓަރުތަކާއި، ސެލޫންތައް އަދި މާރުކޭޓުތައް އިންސްޕެކްޓްކުރުމުގެ މަސައްކަތް މީގެ ކުރިން 4 ފަހަރުމަތިން ވަނީ ކޮށްފައެވެ.
އިންސްޕެކްޝަންގެ އައު ބުރެއް މިދިޔަ ހަފްތާ ތެރޭގައި ފަށާފައިވާތީ އާދިއްތަ ދުވަހުގެ ރޭ ހެލްތު އެމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ ޑިރެކްޓަރ އަހުމަދު ނާސިރު ވިދާޅުވީ އެޗްޕީއޭއިން ކުރިއަށް ގެންދާ މި އިންސްޕެކްޝަންގައި އިކޮނޮމިކް މިނިސްޓްރީ އަދި ޕޮލިހުންގެ އެއްބާރުލުން ވަރަށް ބޮޑަށް ލިބޭ ކަމަށެވެ. އެގޮތުން މާލެ ސަރަހައްދުގައި ކާބޯތަކެތީގެ ޚިދުމަތްދޭ ތަންތަނާއި، ފިހާރަތަކާއި، ސެލޫންތައް އަދި ޖިމްތަކާއި މަރުކޭޓްތައް ބަލަމުންދާ ކަމަށް އޭނާ ވިދާޅުވިއެވެ.
އަމަލުކުރަމުންދާ އުސޫލަށް އަލިއަޅުއްވާލައްވާ ނާސިރު ވިދާޅުވީ ގައިޑްލައިންއާ ފުރަތަމަ ފަހަރަށް ހިލާފުވުމުން ދެވޭނީ ވައިޓް ނޯޓިސް ކަމަށެވެ. އެއީ ނަސޭހަތްތެރިވުމުގެ ގޮތުން ނޯޓިސްއެއް ކަމަށް އޭނާ ވިދާޅުވިއެވެ. ދެވަނައަށް ދެވޭ ރެޑް ނޯޓިސްއަކީ ފިޔަވަޅުއަޅާނެ ކަމުގެ އިންޒާރު ދިނުމުގެ ގޮތުން ދެވޭ ނޯޓިސްއެއް ކަމަށް ނާސިރު ވިދާޅުވިއެވެ. އަދި ވިދާޅުވީ ދެވަނަ ފަހަރު ދެވޭ އިންޒާރުއާއެކު ކުށް ތަކުރާރު ކޮށްފިނަމަ ޖޫރިމަނާ ކުރާ ގޮތަށް އޮތް ނަމަވެސް މިހާރު އެއުސޫލު ބަދަލުވެފައިވާ ކަމަށެވެ. އެގޮތުން ތިން ވަނަ މަރުހަލާގައި އެތަނެއް 24 ގަޑިއިރަށް ބަންދުކުރެވޭނެ ކަމަށް ނާސިރު ވިދާޅުވިއެވެ.
އިންސްޕެކްޝަންގައި ފާހަގަކުރެވުނު ކަންތައްތަކާ ބެހޭ ގޮތުން ނާސިރު ވިދާޅުވީ އާއްމު ޚިދުމަތްދޭ ތަންތަނުގައި އާއްމު މީހުންގެ އިތުރުން އެތަންތަނުގެ މުވައްޒަފުން ވެސް މާސްކް ނާޅާ އުޅޭކަން ފާހަގަކުރެވިފައިވާ ކަމަށެވެ. އަދި ކުރިއަށް އޮތްތަނުގައި މާސްކް ނާޅާ އުޅޭކަމަށްވާނަމަ ވަކިވަކި މީހުން ޖޫރިމަނާ ކުރެވޭނެ ކަމަށް އޭނާ ވިދާޅުވިއެވެ.
އެޗްޕީއޭއިން އާންމުކޮށްފައިވާ ޖޫރިމަނާކުރާ އުސޫލުގައި ވާގޮތުން ފުރަތަމަ ފަހަރަށް ނަމަ ޖޫރިމަނާކުރަނީ 5000 ރުފިޔާއިންނެވެ. އަދި ދެވަނަ ފަހަރު ނަމަ 25،000 ރުފިޔާއިން ޖޫރިމަނާ ކުރެވޭއިރު، އެންގުމާ ޚިލާފުވެ ކަންކަން ރަނގަޅު ނުކުރާނަމަ، ތިންވަނަ ފަހަރަށް 50،000 ރުފިޔާއިން ޖޫރިމަނާކުރާނެއެެވެ. ހަތަރުވަނަ ފަހަރުގެ ޖޫރިމަނާއަކީ 75،000 ރުފިޔާއެވެ. ފަސްވަނަ ފަހަރު ޖޫރިމަނާ ކުރާނީ އެއްލައްކަ ރުފިޔާއިންނެވެ.
މި އިންސްޕެކްޝަންގައި ކާބޯތަކެތީގެ ޚިދުމަތްދޭ ތަންތަނާއި، ފިހާރަތަކާއި، ،ފިޓްނަސް ސެންޓަރުތަކާއި، ސެލޫންތައް އަދި މާރުކޭޓުތައް ފަދަ ޢާއްމު ޚިދުމަތްދޭ ހުރިހާ ތަނެއް ބެލުމަށް ވަނީ ހަމަޖެހިފައެވެ. އަދި މީގެ އިތުރުން ޕަބްލިކް ޓްރާންސްޕޯޓުގެ ޚިދުމަތް ފޯރުކޮށްދޭ ޓެކްސީ، ލޮރީ، ޕިކަޕް އަދި ޕްރައިވެޓް ހަޔަރ ފަދަ އުޅަނދުތައް ވެސް އިންސްޕެކްޓް ކުރެވޭނެއެވެ.
