އިޓާލިއަން ލީގުގައި ހޮނިހިރު ދުވަހުގެރޭ ހެލަސް ވެރޯނާ އާއި އެންމެ ފަހުގެ ޗެމްޕިއަން ޔުވެންޓަސް ބައްދަލުކުރި މެޗު އެއްވަރުވެގެން ނިމިއްޖެއެވެ.
ވެރޯނާގެ ދަނޑުގައި ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ.
ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފުގައި އެންމެ ފުރަތަމަ ލަނޑު ޖަހާ ލީޑު ނެގީ ޔުވެންޓަސްއިންނެވެ. އެގޮތުން ދެވަނަ ހާފު ފަށައިގެން ހަތަރުވަނަ މިނެޓުގައި ފެޑެރީކޯ ކިއޭސާ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ކްރިސްޓިއާނޯ ރޮނާލްޑޯއެވެ. މިއީ ލަނޑު ލިސްޓުގެ އެއްވަނައިގައި އޮތް ރޮނާލްޑޯ މި ސީޒަނުގެ އިޓާލިއަން ލީގުގައި ކާމިޔާބުކުރި 19 ވަނަ ލަނޑެވެ.
އެކަމަކު އޭގެ ފަހުން ވެރޯނާއިން ކުޅުން ރަނގަޅުކުރިއިރު، މެޗުގެ 77 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. ޑާކޯ ލާޒޮވިޗުގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ އެންޓޮނިން ބަރަކެވެ. އަދި އޭގެ ފަހުން ލީޑު ނެގުމަށް ވެރޯނާގެ ލާޒޮވިޗަށް ވަނީ ރަނގަޅު ފުރުސަތެއް ލިބި ބޭކާރުވެފައެވެ.
މި ނަތީޖާއާއެކު ތާވަލުގެ ތިންވަނައިގައި ޔުވެންޓަސް އޮތީ ކުޅުނު 23 މެޗުން ލިބުނު 46 ޕޮއިންޓާއެކުއެވެ. އެއްވަނައިގައި އޮތް އިންޓަ މިލާނަށް 23 މެޗުން 53 ޕޮއިންޓް ލިބިފައިވާއިރު، ދެވަނައިގައި އޮތް އޭސީ މިލާނަށް 23 މެޗުން ވަނީ 49 ޕޮއިންޓް ލިބިފައެވެ. އަދި ޔުވެންޓަސްއާ އެއްވަރުކުރި ވެރޯނާ އޮތީ ތާވަލުގެ ނުވަވަނައިގައި 24 މެޗުން 35 ޕޮއިންޓާއެކުއެވެ.
