ރާއްޖެޓީވީ ޖޫރިމަނާ ކުރި މައްސަލަ ސިވިލް ކޯޓުގައި ބުރާސްފަތި ދުވަހަށް ތާވަލް ކޮށްފި
މައްސަލަ ކޯޓަށް ހުށަހެޅީ ފައިސާ ދެއްކުމަށް ފަހު
އަބުރު ފަންޑަށް އެހީވަނީ
ރާއްޖެޓީވީއިން ގެނެސްދިން ޚަބަރަކާ ގުޅިގެން، މޯލްޑިވްސް ބްރޯޑްކާސްޓިން ކޮމިޝަނުން ބެލި އަބުރުގެ މައްސަލައެއް ނިންމައި، 200،000ރ. އިން ޖޫރިމަނާކުރި މައްސަލަ ސިވިލް ކޯޓުގައި ބުރާސްފަތި ދުވަހަށް ތާވަލް ކޮށްފިއެވެ.
ސިވިލް ކޯޓުގައި މި މައްސަލަ ތާވަލްކޮށްފައި ވަނީ ބުރާސްފަތި ދުވަހު 11:15 އަށެވެ. މި މައްސަލައިގަ ފުރަތަމަ އޮންނާނީ ދެ ފަރާތުން ވާހަކަ ދައްކައިގެން ހައްލެއް ހޯދުމުގެ މަރުހަލާއެވެ. މައްސަލަ ޝަރީއަތަށް ފޮނުވާނީ ޑިސްޕިއުޓް ރެޒޮލިއުޝަނުން ހައްލެއް ނުލިބިއްޖެ ނަމައެވެ.
ރާއްޖެޓީވީ 200،000ރ. އިން ޖޫރިމަނާ ކުރި މައްސަލަ ސިވިލްކޯޓަށް ހުށަހަޅާފައި މިވަނީ ގާނޫނުގައި ބުނެފައިވާ ގޮތަށް ޖޫރިމަނާގެ ފައިސާ ބްރޯޑްކާސްޓިން ކޮމިޝަނަށް ދެއްކުމަށް ފަހުގައެވެ. އެގޮތުން އެ މައްސަލަ ރާއްޖެޓީވީގެ ފަރާތުން ސިވިލް ކޯޓަށް ހުށަހެޅީ މި މަހުގެ 26 ވަނަ ދުވަހުއެވެ.
ރާއްޖެޓީވީގެ ސީއޯއޯ ހުސެން ފިޔާޒް މޫސާ ވިދާޅުވީ 200،000ރ. އިން ޖޫރިމަނާ ކުރި މައްސަލަ ސިވިލް ކޯޓަށް ހުށަހެޅީ އެއީ ބޭއިންސާފުން ކޮށްފައިވާ ޖޫރިމަނާއެއް ކަމަށްވާތީ، އެ ޖޫރިމަނާ ބާތިލްކޮށް ފައިސާ ހޯދުމަށް ކަމަށެވެ.
މި ޖޫރިމަނާ މާޗް 6 ވަނަ ދުވަހު ދައްކައި ނިންމާފައި ވަނީ ރާއްޖެ ޓީވީ އާއި ސްޓޭޝަންގެ ނޫސްވެރިން ބޮޑެތި އަދަދުތަކުން ޖޫރިމަނާ ކުރަމުން ދާތީ، އެ ފައިސާ ދެއްކުމަށް ހުޅުވި "އަބުރު ފަންޑަށް" ލިބުނު ބޮޑު އެހީއާ އެކުގައެވެ.
މޯލްޑިވްސް ބްރޯޑްކާސްޓިން ކޮމިޝަނުން ރާއްޖެޓީވީ އާއި ސްޓޭޝަންގެ ކުރީގެ ނޫސްވެރިއަކު ޖޫރިމަނާކޮށްފައި ވަނީ ނޮވެމްބަރ 19، 2016 ގައި ރާއްޖެޓީވީގެ ތިން ޚަބަރު ގަޑިއެއްގައި ގެނެސްދީފައިވާ ރޭޕްގެ މައްސަލައަކާ ގުޅޭ ޚަބަރެއްގައި، މައްސަލައިގައި ހިމެނޭ ކުއްޖާގެ އާއިލާއާ ހަވާލާދީ މީހެއްގެ ނަން ހާމަކޮށްފައިވާ ކަމަށް ބުނެއެވެ. މިއީ އަބުރު ރައްކާތެރިކޮށްދިނުމާއި، ޚިޔާލު ފާޅުކުރުމުގެ މިނިވަންކަމުގެ ޤާނޫނުގެ 10 ވަނަ މާއްދާއާ ޚިލާފަށް ލިޔެފައިވާ ޚަބަރެއް ކަމަށާއި، ޚަބަރުގެ ސަބަބުން ނަން ހާމަވި މީހާގެ އަބުރުގެ ކަރާމާތަށް އުނިކަން ލިބިފައިވާ ކަމަށް ނިންމާފައިވާ ކަމަށް ވެސް އެކޮމިޝަނުގެ ރިޕޯޓްގައި ވެއެވެ.
އެހެންކަމުން، އަބުރު ރައްކާތެރިކޮށްދިނުމާއި، ޚިޔާލު ފާޅުކުރުމުގެ މިނިވަންކަމުގެ ޤާނޫނުގެ ހަވަނަ ބާބުގެ ދަށުން ޖޫރިމަނާ ކުރުމާއި ބެހޭ އުސޫލުގެ 14 ވަނަ މާއްދާގެ (ށ) އަދި (ބ) އަށް ރިޢާޔަތްކޮށް މި އުސޫލުގެ 10 ވަނަ މާއްދާގެ (ހ) ގެ އެކެއްގެ ދަށުން ރާއްޖެ ޓީވީ 200،000ރ. އިން ޖޫރިމަނާކޮށް، މި ޚަބަރު ތައްޔާރު ކުރި، ރާއްޖެޓީވީގެ ކުރީގެ ނޫސްވެރިޔާ، އާލާ އިބްރާހިމް މި އުސޫލުގެ 10 ވަނަ މާއްދާގެ (ށ) ގެ އެކެއްގެ ދަށުން 50،000ރ. އިން ވަނީ ޖޫރިމަނާ ކޮށްފައެވެ.
ނަމަވެސް ފައިސާ ދެއްކުމަށް ދިން 30 ދުވަހުގެ ތެރޭގައި ފައިސާ ދައްކާފައި ނުވާތީ ޖީނާއީ މައްސަލައެއްގެ ގޮތުގައި އާލާގެ މައްސަލަ ކޯޓަށް ފޮނުވުމަށް ތަހްގީގު ހިންގުމަށް ފުލުހުންނަށް ހުށަހަޅާފައ ވަނިކޮށް އާލާގެ މައްސަލަ ބެލުމުގައި އޭނާގެ ބަހެއް ހޯދާފައި ނުވާތީ އެއީ މައްސަލަ ރައްދުވާ ފަރާތަށް ފުރުސަތު ނުދީ ގާނޫނު އަސާސީގެ ރޫހާ ހިލާފަށް ނިންމާފައިވާ ނިންމުމެއް ކަމަށް ގަބޫލުކުރާ ކަމަށް ބްރޯޑްކޮމް އިން ފަހުން ވަނީ ބުނެފައެވެ. އެހެން ކަމުން އާލާގެ މައްސަލަ ރިވިއުކުރަމުން ގެންދާ ކަމަށް ބުނެ ރާއްޖެ ޓީވީގެ ނިއުސް ޑިރެކްޓަރު އަލީ ޔޫސުފް މިދިޔަ ހަފްތާގައި ވަނީ ބްރޮޑްކޮމް އަށް ހާޒިރުކޮށްފައެވެ.
އަބުރުގެ މައްސަލައަކާ ގުޅިގެން ރާއްޖެ ޓީވީއާއި ކުރީގެ ނޫސްވެރިއަކު ޖޫރިމަނާ ކުރިއިރު، މިއީ އަބުރު ރައްކާތެރިކޮށްދިނުމާއި، ޚިޔާލު ފާޅުކުރުމުގެ މިނިވަންކަމުގެ ޤާނޫނުގެ ދަށުން މީޑިއާއެއް، އަދި ނޫސްވެރިއަކު ވެސް ޖޫރިމަނާ ކުރި ފުރަތަމަ ފަހަރެވެ. އެ ފައިސާ ރާއްޖެ ޓީވީން ދެއްކުމާ އެކު ބްރޮޑްކޮމް އިން ބެލި އެހެން މައްސަލައެއްގައި ރާއްޖެ ޓީވީ މިހާރު ވަނީ އެއް މިލިއަން ރުފިޔާ އިން ޖޫރިމަނާކޮށްފައެވެ. އެ ފައިސާ އަންނަ ހަފްތާގެ ހޮނިހިރު ދުވަހުގެ ނިޔަލަށް ދައްކަންޖެހެއެވެ.
