މާލެ ސަރަހައްދުގައި ހޮސްޕިޓަލުގައި އެޑްމިޓް ކޮށްގެން 165 މީހަކަށް ދަނީ ފަރުވާ ދެމުން
18 ފެބުރުއަރީ 2021 | ބުރާސްފަތި 08:18ހޮސްޕިޓަލުތަކުގެ ބެޑް ކެޕޭސިޓީ ދަނީ ފުރެމުން
171 މީހުންނަށް ފަރުވާދެމުން އަންނަނީ އެޑްމިޓް ކޮށްގެން
މާލެ ސަރަހައްދުގައި ހޮސްޕިޓަލުގައި އެޑްމިޓް ކޮށްގެން 165 މީހަކަށް ފަރުވާ ދެމުން ދާކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ)ން ހާމަކޮށްފިއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އެޗްއީއޯސީން މިކަން ހާމަ ކޮށްފައިވާއިރު ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އެންމަ ފަހުގެ ތަފާސްހިސާބުތައް ދައްކާގޮތުގައި ރާއްޖޭގައި ކޮވިޑް-19ށް 2،391 މީހުންނަށް ފަރުދެމުން އަންނައިރު އޭގެތެރެއިން 171 މީހުންނަށް ފަރުވާދެމުން އަންނަނީ އެޑްމިޓްކޮށްގެނެވެ.
އެޗްއީއޯސީން އިތުރަށް ބުނީ އައްޑޫ ކޮވިޑް ފެސިލިޓީގައި ދެ ބަލި މީހުންނަށް ފަރުވާ ދެމުން އަންނަ ކަމަށާއި ށ. ކޮވިޑް ފެސިލިޓީގައި 4 މީހަކަށް ފަރުވާ ދެމުން ދާކަމަށެވެ. އަދި މި ހުރިހާ މީހުންނަކީ ވެސް ދިވެހިން ކަމަށް އެޗްއީއޯސީން ބުނެއެވެ.
ހޮސްޕިޓަލުގައި އެޑްމިޓްކޮށްގެން ފަރުވާ ދެމުންދާ މީހުންގެ އަދަދު އިތުރުވަމުން ދާއިރު މީގެ ކުރިން މިކަމާ ބެހޭގޮތުން ވާހަކަ ދައްކަވަމުން އެޗްއީއޯސީގެ ތަރުޖަމާނު ޑޮކްޓަރ ނަޒްލާ ރަފީޤު ވިދާޅުވީ ހޮސްޕިޓަލުތަކުގައި އެނދުމަތި ކުރެވޭ މީހުންގެ އަދަދުތައް ކަންބޮޑުވާ މިންވަރަށް އިތުރުވެފައިވާއިރު، ހޮސްޕިޓަލުތަކުގެ ބެޑް ކެޕޭސިޓީ ފުރެމުންދާ ކަމަށެވެ. އަދި މިވަގުތު ބާކީ ހުރީ މަދު އެނދުތަކެއްކަަމަށް ޑރ. ނަޒްލާ ވިދާޅުވިއެވެ.
ޑރ. ނަޒްލާ އިތުރަށް ވިދާޅުވީ، ކޮވިޑުން ރައްކާތެރިވުމަށް އެޅިދާނެ ފިޔަވަޅުތައް އިންތިހާއަށް ފަސޭހަ ކަމަށެވެ. އެގޮތުން މާސްކް އެޅުމާއި، އިޖުތިމާއީ ގައިދުރުކަން ފަދަ ކަންކަމަށް ސަމާލުވުމަށް ޑރ. ނަޒްލާ ވަނީ އިލްތިމާސް ކުރައްވާފައެވެ. އަދި ކޮންމެ މީހަކުވެސް އެމީހެއްގެ އަމިއްލަ ނަފްސާއި އެހެން މީހުން ރައްކާތެރި ކުރުމަށް ގޮވާލައްވާފައިވެއެވެ.
