ޢަލީ ވަޙީދުގެ ޕާސްޕޯޓު ދޫކޮށްލި މައްސަލަ އާދިއްތަ ދުވަހު ޕީޖީން ހައި ކޯޓުގައި އިސްތިއުނާފު ކުރަނީ
13 ފެބުރުއަރީ 2021 | ހޮނިހިރު 12:19ޢަލީ ވަޙީދު ފުރީ މި މަހުގެ ނުވަވަނަ ދުވަހު
ޕްރޮސެކިއުޓަރ ޖެނެރަލް ހުސައިން ޝަމީމް - ޕީޖީ ވިދާޅުވީ މި މައްސަލައިގައި ޕާސްޕޯޓާ ގުޅިގެން ކުރިމިނަލް ކޯޓުން ނިންމި ނިންމުން ޕީޖީ އޮފީހަށް ލިބުނީ ބުރާސްފަތި ދުވަހުގެ މެންދުރު 11:30 ހާއިރު ކަމަށް
ކުރީގެ ޓޫރިޒަމް މިނިސްޓަރ ޢަލީ ވަޙީދުގެ ޕާސްޕޯޓް ދޫކުރުމަށް ކްރިމިނަލް ކޯޓުން ނެރުނު އަމުރު ހައިކޯޓުގައި އިސްތިއުނާފު ކުރުމަށް ޕްރޮސެކިއުޓަރ ޖެނެރަލް ހުސައިން ޝަމީމް ނިންމަވައިފިއެވެ.
ހޮނިހިރު ދުވަހު ޝަމީމް ކުރެއްވި ޓްވީޓެއްގައި ވިދާޅުވީ، ޢަލީ ވަޙީދުގެ ޕާސްޕޯޓާ ގުޅިގެން ކުރިމިނަލް ކޯޓުން ނިންމި ނިންމުން ޕީޖީ އޮފީހަށް ލިބުނީ ބުރާސްފަތި ދުވަހުގެ މެންދުރު 11:30 ހާއިރު ކަމަށެވެ. އަދި އެ ވަގުތުން ފެށިގެން 48 ގަޑިއިރު ތެރޭ ހައިކޯޓަށް ހުށަހަޅަންޖެހޭކަން ފާހަގަ ކުރައްވައި ޝަމީމް ވިދާޅުވީ، އެ މަސައްކަތް މިހާރު ކުރަމުންދާ ކަމަށެވެ. އެހެން ނަމަވެސް، ޖާމިނުވި ގޮތާއި ބެހޭ ލިޔެކިޔުން އަދިވެސް ނުލިބޭކަން ޝަމީމް ފާހަގަކުރެއްވިއެވެ.
ޢަލީ ވަޙީދުގެ ޕާސްޕޯޓު ދޫކުރުމަށް ކްރިމިނަލް ކޯޓުން ނިންމި ލިޔުމާއި، ޖާމިނުކުރުވި ލިޔުން ހޯދުމަށް ކުރި މަސައްކަތުން ކޯޓުން ދައުލަތާ އެލިޔުންތައް ހަވާލުކޮށްފައި ނުވާކަން ޕީޖީ އޮފީހުން މީގެ ކުރިން ނެރުނު ބަޔާނެއްގައިވެސް ފާހަގަކޮށްފައިވެއެވެ. އެގޮތުން މިހާރު ޕާސްޕޯޓު ދޫކުރި އަމުރު ޕީޖީ އޮފީހަށް ލިބިފައިވާއިރު، މި މައްސަލައިގައި ކްރިމިނަލް ކޯޓުން ކަންކޮށްފައިވާ ގޮތާއި ގުޅޭގޮތުން ގިނަ ބަޔަކު ދަނީ ސުވާލު އުފައްދަމުންނެވެ. އެގޮތުން ފުރަތަމަ އަމުރު ނެރުނުއިރު، ދައުލަތުން އެދިގެން ނެރުނު އަމުރެއްކަން ބަޔާން ކޮށްފައިވީ ނަމަވެސް، ފަހުން އެއީ "އިދާރީ އޮޅުމެއްގެ ތެރެއިން" ވީ ކަމެއްކަން ބަޔާން ކޮށްފައިވުމާއެކު، އެކަމަށްވެސް ގިނަ ބަޔަކު ފާޑުކިޔާފައިވެއެވެ.
ކްރިމިނަލް ކޯޓުން ޢަލީ ވަޙީދުގެ ޕާސްޕޯޓް ދޫކުރި މައްސަލާގައި ޕީޖީގެ އޮފީހުން ބުރާސްފަތި ދުވަހު ނެރުނު ނޫސްބަޔާނެއްގައި ބުނެފައިވަނީ، މި މަހުގެ ނުވަވަނަ ދުވަހު ކްރިމިނަލް ކޯޓުގައި ބޭއްވުނު އަޑުއެހުމުގެ ޢަލީ ވަޙީދުގެ ޕާސްޕޯޓް ދޫކުރަން ނިންމާފައިވަނީ ރަނގަޅަށް ނޫންކަމަށެވެ. އަދި އޭރު ނިންމުން އިސްތިއުނާފު ކުރުމާމެދު ގޮތެއް ނިންމުމުގެ ކުރިން ޢަލީ ވަޙީދު ފުރައިގެން ގޮސްފައިވާކަމުގެ މައުލޫމާތު ލިބިފައިވާ ކަމަށް ޕީޖީ އޮފީހުން ބުނެފައިވެއެވެ.
މީގެއިތުރުން ޕީޖީ އޮފީހުން ބުނީ، ކޯޓު އަމުރުގައި އޮތް ހަތަރު މަސްދުވަހުގެ ތެރޭގައި ޢަލީ ވަޙީދު އެނބުރި އައިސްފައިނުވާނަމަ، އޭނާގެ މައްޗަށާއި، އޭނާ ޖާމިނު ކޮށްފައިވާ މީހާގެ މައްޗަށް ޤާނޫނުގައިވާ ގޮތުގެ މަތިން ފިޔަވަޅުއެޅުމުގެ މަސައްކަތް، އެކަމަށް ހަމަޖެހިފައިވާ އުސޫލުތަކުގެ ތެރެއިން ކުރަމުން ގެންދާނެކަމަށެވެ.
ޢަލީ ވަޙީދު ޖާމިނުކުރުވީ، އޭނާގެ ގާތް އެކުވެރިއެއް ކަމަށްވާ، ޔޫތު އެންޑް ސްޕޯޓްސް މިނިސްޓްރީގެ ސްޓޭޓް މިނިސްޓަރު އަސްއަދު އަލީ (އަޑުބަރޭ) އެވެ.
ޢަލީ ވަޙީދަކީ މީގެ ކުރިންވެސް ތަޙުޤީޤަށާއި ޝަރީއަތަށް ހުރަސް އެޅޭނެހެން ފުރައިގެން ދިޔުމަށް ފަހު އެނބުރި ނައިސް ހުރި މީހެއްކަން ފާހަގަކޮށް އެންމެ ފަހުން ބޭއްވި އަޑުއެހުމުގައިވެސް ދައުލަތުން ވަނީ ޕާސްޕޯޓް ދޫކޮށްފިނަމަ ދިވެހިރާއްޖެއިން ބޭރުގައި ދިގު މުއްދަތަކަށް މަޑުކޮށް ހެކި ނައްތާލާއި، މައްސަލައިގެ ޝަރީޢަތް އެކަށީގެންވާ ގޮތެއްގައި ކުރިއަށް ގެންދިއުމުގެ ފުރުޞަތު އޮތްކަމަށް ބުނެފައެވެ.
