ޑިިޒައިން ބިލްޑް އުސޫލުން 25 ރަށެއްގައި ފެނާއި ނަރުދަމާގެ ނިޒާމު ގާއިމުކުރުމުގެ މަސައްކަތް ކުރާނެ ފަރާތެއް ހޯދަން އިއުލާންކޮށްފިއެވެ.

ފިނޭންސް މިނިސްޓްރީން ބުނީ، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ އެދުމުގެ މަތީން މި މަސައްކަތްތަކަށް ބީލަން ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.

ބީލަން ހުށަހެޅުމުގެ ފުރުސަތު ހުޅުވާލާފައިވަނީ ޑިޒައިން ބިލްޑް އުޞޫލުން ކ.ތުލުސްދޫގައި ފެނުގެ ނިޒާމު، ބ. ކުޑަރިކިލުގައި ފެނާއި ނަރުދަމާގެ ނިޒާމު، ބ. ދޮންފަނުގައި ފެނާއި ނަރުދަމާގެ ނިޒާމު، ބ. ކިހާދޫގައި ފެނާއި ނަރުދަމާގެ ނިޒާމު، ނ.މިލަދޫގައި ފެނުގެ ނިޒާމު، ނ. ލަންދޫގައި ފެނުގެ ނިޒާމު ނ. މަގޫދޫގައި ފެނާއި ނަރުދަމާގެ ނިޒާމު، ށ. ބިލަތްފަހިގައި ފެނާއި ނަރުދަމާގެ ނިޒާމު، ށ. ނޫމަރާގައި ފެނާއި ނަރުދަމާގެ ނިޒާމު، ބ. ފުޅަދޫގައި ފެނާއި ނަރުދަމާގެ ނިޒާމު، އަދި ބ. ފެހެންދޫގައި ފެނާއި ނަރުދަމާގެ ނިޒާމު ގާއިމުކުރުމުގެ މަސައްކަތެވެ.

މީގެ އިތުރުން ކ. ހިންމަފުށީގައި ފެނުގެ ނިޒާމު، އދ. ދިއްދޫގައި ފެނާއި ނަރުދަމާގެ ނިޒާމު، އދ. އޮމަދޫގައި ފެނުގެ ނިޒާމު، ލ. ހިތަދޫގައި ފެނާއި ނަރުދަމާގެ ނިޒާމު، ލ. ކުނަހަންދޫގައި ފެނާއި ނަރުދަމާގެ ނިޒާމު، މ. ނާލާފުށީގައި ފެނާއި ނަރުދަމާގެ ނިޒާމު، މ. ރަތްމަންދޫގައި ފެނާއި ނަރުދަމާގެ ނިޒާމު، ތ. ދިޔަމިގިލީގައި ފެނުގެ ނިޒާމު، ތ. މަޑިފުށީގައި ފެނުގެ ނިޒާމު، ވ. ކެޔޮދޫގައި ފެނާއި ނަރުދަމާގެ ނިޒާމު، ވ. ރަކީދޫގައި ފެނާއި ނަރުދަމާގެ ނިޒާމު، ގއ. ދެއްވަދޫގައި ފެނާއި ނަރުދަމާގެ ނިޒާމު، ގއ. ނިލަންދޫގައި ފެނާއި ނަރުދަމާގެ ނިޒާމު އަދި ގދ. ނަޑެއްލާގައި ފެނާއި ނަރުދަމާގެ ނިޒާމު ގާއިމުކުރުމުގެ މަސައްކަތް ކޮށްދޭނެ ފަރާތެއް ހޯދުމަށް ވެސް ވަނީ އިއުލާން ކޮށްފައެވެ.

ފިނޭންސް މިނިސްޓްރީން ބުނީ މި މަސައްކަތަށް ޝަރުތުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދެވޭނީ އިންޓަރނޭޝަނަލް ކޮމްޕެޓިޓިވް ބިޑިންގ (އައި.ސީ.ބީ) އުސޫލުގެ މަތިން ކަމަށެވެ.

ކޮންމެ ބީލަމެއްގައި ބައިވެރިވުމަށް -/1,500 (ފަނަރަ ސަތޭކަ) ދިވެހި ރުފިޔާ ނުވަތަ ޔޫއެސް.ޑީ 100.00ގެ ނަން-ރިފަންޑަބަލް ރަޖިސްޓްރޭޝަން ފީއެއް ދައްކަން ޖެހޭއިރު، ފައިސާ ބަލައިގަންނާނީ 14 ފެބުރުވަރީން 10 މާރިޗަށް ބަންދު ނޫން ކޮންމެ ދުވަހެއްގެ 8:30ން 12:00ށް ކަަމަށް ފިނޭންސް މިނިސްޓްރީން ބުނެއެވެ.

ފިނޭންސް މިނިސްޓްރީން ބުނީ މި މަސައްކަތްތަކާ ބެހޭ އެންމެހައި ލިޔެކިޔުންތައް މިމަހުގެ 15ން ފެށިގެން ސޮފްޓް ކޮޕީ ވެބްސައިޓުން ޑައުންލޯޑް ކުރެވޭނެ ކަމަށެވެ. އަދި ބިޑް ސެކިއުރިޓީ ދިވެހި ރުފިޔާއިން ނުވަތަ އެ އަދަދާ އެއްވަރެއްގެ އަދަދެއް ޔޫ.އެސް.ޑޮލަރުން ހުށަހެޅިދާނެ ކަމަށާއި، ބިޑް ސެކިޔުރިޓީގެ މުއްދަތަކީ ބިޑް ހުޅުވާ ތާރީޚުން ފެށިގެން 148 ދުވަސް ކަމަށް މިނިސްޓްރީން ބުނެއެވެ.

ފިނޭންސް މިނިސްޓްރީން ބުނީ މި ޕްރޮޖެކްޓާ ބެހޭ ގޮތުން އެއްވެސް ސުވާލެއްއޮތް ނަމަ އީމެއިލް ކުރާނީ 23 ފެބުރުވަރީވާ އަންގާރަ ދުވަހުގެ 13:30 ގެ ކުރިން ކަމަށެވެ.

ބީލަން ހުޅުވުން އޮންނާނީ 11 މާރިޗުވާ ބުރާސްފަތި ދުވަހުގެ 13:00ށް މިނިސްޓްރީގެ ނެޝަނަލް ޓެންޑަރގެ ޖަލްސާކުރާ މާލަމުގައެވެ.