އެން ހިމާޔަތްކުރާ ސަރަހައްދުތަކެއް ކަނޑައަޅާ އެންވެރިކަން ދެމެހެއްޓެނިވިގޮތެއްގައި ކުރުމަށް ފިޝަރީޒް މިނިސްޓްރީން ގިނަ ޕްލޭންތަކެއް
11 ފެބުރުއަރީ 2021 | ބުރާސްފަތި 23:18ރާއްޖޭގެ އެންވެރިން މަސް ދަމާއިރުގައި އަމަލުކުރާގޮތުގެ ސަބަބުން އެން މަރުވާކަން މިނިސްޓްރީއިން ފާހަގަކުރޭ
ރާއްޖޭގެ މަސް ދޯންޏެއްގައި ދޮށީގެ މަސްވެރިކަން ކުރާ މަންޒަރު
ރާއްޖޭގައި އެންވެރިކަން މިހާރު ކުރަމުންދާގޮތުމުގެ ސަބަބުން އެންވެރިކަމުގެ މަސައްކަތައް ދިމާވެފައިވާ ގޮންޖެހުންތައް ކުޑަކުރުމަށާއި، ދެމެހެއްޓެނިވިގޮތެއްގައި އެންވެރިކަން ކުރުމަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން އެދިއްޖެއެވެ.
ފިޝަރީޒް މިނިސްޓްރީއާއި ރާއްޖެ ޓީވީ ގުޅިގެން ގެނެސްދޭ "މަސްވެރިންގެ ސައްލާ" ޕްރޮގްރާމްގައި ވާހަކަދައްކަވަމުން ފިޝަރީޒް މިނިސްޓްރީގެ ފަރާތުން ވަނީ ރާއްޖޭގައި މަސްބޭނުމަށް އެންވެރިކަން ކުރާގޮތުގެ ސަބަބުން އެން އާލާވުމުގައި ދަތިތައް ދިމާވަމުންދާކަމަށް ބުނެފައެވެ. އެގޮތުން ދޯނި ފަހަރުގެ ސައިޒު ބޮޑުވުމާއެކު އެން ނަގާ މިންވަރު އިތުރުވެފައިވާއިރު، ފަރުތަކުގެ ކައިރީގައި އާލާވާ އެންފަދަ ދިރުމަށް ބެލުމެއް ނެތި ބައެއް ތަރައްޤީގެ މަޝްރޫޢުތައް ހިންގުމުގެ ސަބަބުން އެން އާލާވުން ބައެއް ސަރަހައްދުތަކުގައި ވަރަށް ބޮޑަށް މަދުވެފައިވާކަމަށް ފިޝަރީޒް މިނިސްޓްރީއިން ހާމަކުރެއެވެ. ފިޝަރީޒް މިނިސްޓްރީއިން ވަނީ ރާއްޖެއަކީ ދޮށީގެ މަސްވެރިކަން ކުރާ ޤައުމުތަކުގެ ތެރެއިން އެމުން އެންމެ އިސްރާފު ބޮޑު ޤައުމުކަން ދިރާސާތަކުން ދައްކާކަމަށް ބުނެފައެވެ. އެގޮތުން ރާއްޖޭގައި 1 ކިލޯގެ އެމުން ބޭނެނީ އެންމެ 11 ކިލޯގެ މަސްކަމުގައި ވާއިރު، ބައެއް ޤައުމުތަކުން މިއަދަދު 90އާއި ހަމައަށް އަރާކަމަށް މެރިން ރިސާޗްގެ ފަރާތުން ވާހަކަދެއްކެވި ރައްޒާގު ޖައުހަރީ ވިދާޅުވިއެވެ.
ރާއްޖޭގެ އެންވެރިން މަސް ދަމާއިރުގައި އަމަލުކުރާގޮތުގެ ސަބަބުންނާއި ވަތައް އެން ލުމަށްފަހު އަމަލުކުރާގޮތުން އެމަށް އޮކްސިޖަން ނުލިބެ އެން މަރުވަމުންދާކަމަށާއި، އަލިގަދަ ލައިޓްތައް ބޭނުންކޮށްގެން ރޭގަނޑުގެ ވަގުތުގައި އެންދެމުމުގެ ސަބަބުން ވަތައް އަޅާ އެމާއި، ކަނޑުގައި ބާކީތިބި އެންތައް އަދި މުރަކަތަކާއި ގައުތަކަށް ގެއްލުންވާކަމަށް ރާއްޖޭގެ ތިން ސަރަހައްދަކުން ޕްރޮގްރާމްގައި އޮންލައިންކޮށް ބައިވެރިވި މަސްވެރިން ފާހަގަކުރިއެވެ. މީގެ އިތުރުން ޑައިވްކޮށްގެން އެންނެގުމުގެ މަސައްކަތަކީ ވެސް މިއަދު ދެމެހެއްޓެނިވިގޮތެއްގައި އެންވެރިކަން ކުރުމަށް ދިމާވާ ދައްޗެއްކަމަށް މަސްވެރިން ފާހަގަކުރިއެވެ.
ރާއްޖޭގައި އެންވެރިކަން މިހާރު ކުރަމުންދާގޮތުމުގެ ސަބަބުން އެންވެރިކަމުގެ މަސައްކަތައް ދިމާވެފައިވާ ގޮންޖެހުންތައް ކުޑަކުރުމަށާއި، ދެމެހެއްޓެނިވިގޮތެއްގައި އެންވެރިކަން ކުރުމަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ގިނަ ޕްލޭންތަކެއް ގެންގުޅޭކަން މި ޕްރޮގްރާމްގެ ތެރެއިން ވަނީ ހާމަކޮށްފައެވެ. އެގޮތުން ޕްރޮގްރާންގެ ތެރެއިން ވާހަކަދައްކަވަމުން، ފިޝަރީޒް މިނިސްޓްރީގެ ޑިރެކްޓަރ އަހުމަދު ޝިފާޒް ވިދާޅުވީ، އެންވެރިކަމަށް ދިމާވެފައިވާ ގޮންޖެހުންތައް ނައްތާލުމަށް އެކި ދާއިރާތަކުން އުސޫލުތައް އެކުލަވާލުމަށް ތައްޔާރުވަމުންދާކަމަށެވެ. އެހެންނަމަވެސް މި މަސައްކަތުގެ އެންމެ އެކަށޭނަ ނަތީޖާއެއް ނިކުންނާނީ ދިވެހި މަސްވެރިންގެ އެއްބާރުލުމާއި އެކުކަމަށް ޝިފާޒް ވިދާޅުވިއެވެ.
މި މަސައްކަތުގެ ދަށުން ރާއްޖޭގައި އެންދަމާ ތަންތަން ދެނަގަނެ އެތަންތަނުގެ ދަފްތަރެއް އެކުލަވާލާނެކަމަށް ޝިފާޒް ވިދާޅުވިއެވެ. އެތަންތަން ދެނެގަތުމުން ސަރުކާރުން ތަރައްޤީގެ މަޝްރޫޢުތައް ހިންގާއިރު މިކަމަށް ރިޢާޔަތްކޮށް މަސައްކަތްކުރެވޭނެކަމަށް ޝިފާޒް ވިދާޅުވިއެވެ. ރާއްޖޭގައި އެންވެރިކަން އޮންނަ ގޮތުން އެއިރެއްގައި އެންވެރިކަން ރަނގަޅު ދިމާލަކަށް ރާއްޖޭގެ އެކި ކަންކޮޅުތަކުން އެންވެރިކަން ކުރުމަށްގޮސް އަވަސް މުއްދަތެއްގެ ތެރޭގައި އެން ހުސްވެ ބައެއް ދޯނިތަކަށް އެން ނުލިބޭ މައްސަލަ ގިނަ ވަމުންދާކަމަށް އޭނާވިދާޅުވިއެވެ. މި މައްސަލަ ހައްލުކުރުމަށް އަހަރުގެ އެކި ދުވަސްތަކަށް ބަހާލައިގެން އެން އާލާވާ ތަންތަނުގެ ގޮތުގައި ފާހަގަވާތަންތަނުގެ ތެރެއިން ބައެއް ތަންތަނުގައި އެން އާލާވިޔަ ދިނުމަށް އެތަންތަން ހިމާޔަތްކުރުމަށް ފިޝަރީޒް މިނިސްޓްރީއިން ވިސްނަމުންދާކަމަށް ޝިފާޒު ވިދާޅުވިއެވެ.
ރާއްޖޭގެ އެންވެރިން މަސް ދަމާއިރުގައި އަމަލުކުރާގޮތުގެ ސަބަބުން އެން މަރުވާ މައްސަލަ ހައްލުކުރުމަށް މިކަން އެންމެ އެކަށޭނަގޮތެއްގައި ކުރާނެގޮތް ކިޔާދިނުމަށް ޕްރޮގްރާމްތައް ހިންގުމާއި، އަތޮޅުތަކުގެ އެންދެމުމުގެ ކަންތައްތައް ކުރިއަށްދާގޮތް ލާމަރުކަޒީ ނިޒާމަކުން ނެގޭނެ އިންތިޒާމު ހަމަޖެއްސުމަށް ދަނީ މަސައްކަތް ކުރަމުންނެވެ. އަދި އަލިގަދަ ލައިޓްތައް ބޭނުންކޮށްގެން ރޭގަނޑުގެ ވަގުތުގައި އެންދެމުމުގެ ސަބަބުން އެން މަރުވާ މައްސަލަ ހައްލުކުރުމަށް ރޭގަނޑު އެން ދަމަން ގެންގުޅޭ ލައިޓްތަކުން ކުރާ އަސަރު ދެނެގަތުމަށް ތަފްސީލީ ދިރާސާތަކެއްކޮށް އުސޫލުތައް ކަނޑައަޅަން ޖެހިއްޖެނަމަ އެކަން ވެސް ކުރައްވާނެކަމަށް ޝިފާޒް ވިދާޅުވިއެވެ.
މި ޕްރޮގްރާމްގައި ފިޝަރީޒް މިނިސްޓްރީއިން ވަނީ، އެންވެރިކަމާއި ބެހޭ މެނޭޖްމަންޓް ޕްލޭނެއް ކުރިއަށް އޮތް ދެމަސްދުވަހުގެ ތެރޭގައި ގެޒެޓްކުރާނެކަން ވެސް ހާމަކޮށްފައެވެ. އަދި އެންނެގުމަށް ވައި ފުޅި އަޅައިގެން ޑައިވް ކުރެވޭނީ 40 މީޓަރު އަޑިއަށްކަމަށާއި، ޑައިވްކުރެވޭނީ އެކަމުގެ ތަމްރީން ލިބިފައިވާ ފަރާތްތަކަށް އެކަނިކަމަށް ކަނޑައަޅާ އެކަމަށް 30 އޮގަސްޓް 2021 ގައި އަމަލުކުރާނެކަން ވެސް ފާހަގަކޮށްފައިވެއެވެ. ރާއްޖޭގައި އެންވެރިކަން ކުރުމަށް ތަމުރީނެއް ނުލިބި ޑައިވްކުރުމާއި 40 މީޓަރަށް ވުރެ ފުނަށް ޑައިވްކުރުމުން ހިތާމަވެރި ހާދިސާތަކެއް ހިނގަމުންދާކަން އެ މިނިސްޓްރީއިން ފާހަގަކުރެއެވެ.
