61 ކިލޯގެ މަސްތުވާތަކެތި މައްސަލާގައި ދަޢުވާލިބޭ ވިސާމް ބަންދުން ދޫކޮށްލުމަށް ކުރި އަމުރު ހައިކޯޓުން ބާޠިލުކޮށްފި
9 ފެބުރުއަރީ 2021 | އަންގާރަ 07:58މި މައްސަލައިގައި އަޙްމަދު ވިސާމްގެ މައްޗަށް ޑައިމޯފިން ޓްރެފިކްކުރުމުގެ ކުށުގެ ދަޢުވާ ވަނީ ކްރިމިނަލް ކޯޓަށް ހުށަހަޅާފައި
މަސްތުވާތަކެތީގެ މި މައްސަލައިގައި، މީހުން ހައްޔަރުކުރި ކަމަށް ބެލެވޭ ދޯނި
"އިރުއަލިމަސް" ކިޔާ ދޯންޏަކުން 61 ކިލޯގެ މަސްތުވާތަކެތި ރާއްޖެއަށް އެތެރެ ކުރި މައްސަލާގައި ދަޢުވާލިބޭ އަޙްމަދު ވިސާމް ބަންދުން ދޫކޮށްލުމަށް ކުރި އަމުރު ހައިކޯޓުން ބާޠިލުކޮށްފިއެވެ.
ޕްރޮސިކިއުޓަރ ޖެނެރަލް އޮފީހުގެ ޕަބްލިކް ޕްރޮސިކިއުޓަރ އަހުމަދު ޝަފީއު ޖެނުއަރީ 25 ވަނަ ދުވަހު ވިދާޅުވީ، "އިރުއަލިމަސް" ނަމަކަށް ކިޔާ ދޯންޏެއްގައި ބަރުދަނުގައި ގާތްގަނޑަކަށް 61 ކިލޯ ހުންނަވަރުގެ މަސްތުވާތަކެތި ދިވެހިރާއްޖެއަށް އެތެރެކުރުމުގައި އެންމެ އިސްކޮށްހުރި މ. ބޮއިލިންގފިޝް، އަޙްމަދު ވިސާމް ބަންދުން ދޫކޮށްލުމަށް 24 ޖަނަވަރީ 2021 ދުވަހު ކްރިމިނަލް ކޯޓުން ނިންމި ނިންމުން ދިވެހިރާއްޖޭގެ ހައިކޯޓުގައި އިސްތިޢުނާފުކުރުމަށް ނިންމާފައިވާ ކަމަށެވެ.
ޝަފީއު ވިދާޅުވީ، މި މައްސަލައިގައި އަޙްމަދު ވިސާމްގެ މައްޗަށް ޑައިމޯފިން ޓްރެފިކްކުރުމުގެ ކުށުގެ ދަޢުވާ ވަނީ ކްރިމިނަލް ކޯޓަށް ހުށަހަޅާފައިވާ ކަމަށާއި، އަދި މި މައްސަލާގައި ވިސާމް ހިމެނޭގޮތަށް 11 މީހެއްގެ މައްޗަށް ޑައިމޯފިން ޓްރެފިކްކުރުމުގެ ދަޢުވާ ކޮށްފައިވާނެ ކަމަށެވެ.
މީގެއިތުރުން ޝަފީއު ވިދާޅުވީ، މަސްތުވާތަކެތީގެ މި މައްސަލާގައި ހައްޔަރުކުރި މީހުންގެ ތެރެއިން ވިސާމް ފިޔަވައި ދެންތިބި މީހުން ތިބީ ޝަރީޢަތް ނިމެންދެން ބަންދުގައި ކަމަށެވެ. އަދި ވިސާމްއަކީ މަސްތުވާތަކެތީގެ މި ނެޓްވޯކްގެ އެންމެ އިސް ފަރާތްކަމަށާއި، މި ކުށުގެ ޢަމަލު ހިންގުމުގައި އެންމެ އިސްކޮށްހުރީ އަޙްމަދު ވިސާމްކަމަށް އިންޓެލިޖެންސްއަށް މަޢުލޫމާތު ލިބިފައިވާކަމަށް ވެސް ޝަފީއު ވިދާޅުވިއެވެ.
ފުލުހުންގެ އިންޓެލިޖެންސް އާއި ޑްރަގް އެންފޯސްމަންޓް ޑިޕާޓްމަންޓު އަދި މެރިން ޕޮލިސް ގުޅިގެން ބޮޑު އޮޕަރޭޝަން ހިންގައި، މަސްތުވާތަކެއްޗާއެކު 11 މީހުން ހައްޔަރުކުރީ މިދިޔަ އަހަރުގެ މާރޗު މަހުގެ 26 ވަނަ ދުވަހު އެވެ. އަދި އެ މަސްތުވާތަކެތީގެ މައްސަލައާ ގުޅިގެން މާލެއާއި ހުޅުމާލޭގެ ގެއެއް ބަލައި ފާސްކޮށް، މަސްތުވާތަކެތީގެ ވިޔަފާރިކޮށްގެން ހޯދާފައިވާ ކަމަށް ބެލެވޭ ގިނަ އަދަދެއްގެ ފައިސާ ވެސް ފުލުހުން ހޯދި އެވެ.
ޕީޖީ އޮފީހުން އެ 11 މީހުންގެ މައްޗަށް ދަޢުވާކުރަން ކްރިމިނަލް ކޯޓަށް ފޮނުވީ 2020 ވަނަ އަހަރުގެ މޭ މަހު އެވެ.
