އާގިލްގެ މަރުގެ މައްސަލަ: އާދިއްތަ ދުވަހަށް އަޑުއެހުމެއް ތާވަލުކޮށްފި
6 ފެބުރުއަރީ 2021 | ހޮނިހިރު 08:23އަޑުއެހުން ތާވަލުކޮށްފައިވަނީ 11:00ށް
އާގިލްގެ މަރުގެ މައްސަލައިގައި އެންމެފަހުން ބޭއްވި އަޑުއެހުމުގެ ތެރެއިން
ގދ. ފަރެސްމާތޮޑާ، ކޮކާ، އިބްރާހިމް އާގިލް (18އ) މަރާލި މައްސަލައިގައި ދައުލަތުން ދަޢުވާ ކޮށްފައިވާ މީހުންގެ އަޑުއެހުމެއް ކްރިމިނަލް ކޯޓުގައި ތާވަލުކޮށްފިއެވެ.
އެންމެފަހުން މި މައްސަލައިގެ އަޑުއެހުމެއް ބާއްވާފައިވަނީ، މިދިޔަ ޑިސެމްބަރު މަހު 31 ވަނަ ދުވަހުއެވެ. އެ އަޑުއެހުމަކީ ޖިނާޢީ އިޖުރާޢަތުގެ ޤާނޫނުގައި ބުނާގޮތުން، ޝަރީޢަތް ނިމެންދެން މީހަކު ބަންދުގައި ބަހައްޓަން ފަނޑިޔާރު ނިންމައިފިނަމަ، އެ ނިންމުން، ކޮންމެ 30 ދުވަހަކުން މުރާޖަޢާކުރަންޖެހޭތީ އާއި އޭނާ އިތުރަށް ބަންދުގައި ބަހައްޓަންޖެހޭ ސަބަބެއް އޮތްތޯ ބެލުމަށްޓަކައި، އޭނާ ހައްޔަރުކޮށްފައިވާ ފަރާތުން، އޭނާ ކޯޓަށް ހާޒިރުކުރަންޖެހޭތީ، އެ މާއްދާގެ ދަށުން ބޭއްވި އަޑުއެހުމެކެވެ. އެ އަޑުއެހުމުގައި ގާޒީ ވަނީ އެ މީހުންގެ ބަންދުގައި ބެހެއްޓުމަށް ކޮށްފައިވާ އަމުރު ދަމަހައްޓާފައެވެ.
އާގިލް މަރާލި މައްސަލައިގައި ދައުލަތުން ދަޢުވާ ކޮށްފައިވާ ތިން މީހުންނަކީ، ލ. ފޮނަދޫ، ހިޔާ، ހަމްދޫން ހަމްޒަތާއި ސ. ހިތަދޫ، ސްވޭހުހީނާގެ، މިޖުވާދު މާލިކު އިބްރާހީމްގެ އިތުރުން، ހއ. ދިއްދޫ، ސްނޯބާޑް، އިބްރާހީމް ވިޝާމްގެ މައްޗަށެވެ.
އާގިލް މަރާލި މައްސަލައިގައި، ހަމްދޫން ހަމްޒަތާއި މިޖުވާދު މާލިކުގެ މައްޗަށް އުފުލާގައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދަޢުވާއެވެ. އިބްރާހީމް ވިޝާމްގެ މައްޗަށް އުފުލާފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމުގައި އެހީތެރިވުުގެ ކުށުގެ ދަޢުވާއެވެ.
ވިޝާމުގެ މައްޗަށް ގަސްތުގައި މީހަކު މެރުމުގައި އެހީތެރިވުުގެ ކުށުގެ ދަޢުވާ އުފުލާފައިވަނީ، ވ. ފުލިދޫން މާލެއަށް އާގިލް އައި ލޯންޗު ހަމަޖައްސައިދީ އެ ދަތުރުގެ މަޢުލޫމާތު އެދެ މީހުންނަށް ފޯރުކޮށްދިނުމުންނެވެ.
އާގިލް މަރާލާފައިވަނީ 2018 ވަނަ އަހަރުގެ އޮގަސްޓް މަހުގެ 31 ވަނަ ދުވަހުގެ ރޭ އެމް.އެމް.އޭ. ސަރަޙައްދަށް އާގިލް ދަތުރުކުރި ލޯންޗް ކައިރިކުރިތަނުންނެވެ.
އާގިލަށް ފަރުވާދިނުމަށް ގެންދިޔަ އޭޑީކޭ އޮސްޕިޓަލުން އޭރު ބުނެފައިވާ ގޮތުގައި އާގިލް އެ ހޮސްޕިޓަލަށް ގެނައީ އެ ރޭގެ 7:30 ހާއިރުއެވެ. އަދި އޭނާ ހޮސްޕިޓަލަށް ގެނައިއިރު ވެސް މަރުވެފައިވާ ކަމަށެވެ.
އާގިލްގެ މަރުގެ އިތުރުން، 2018 ވަނަ އަހަރުގެ އޮކްޓޯބަރު މަހުގެ 11ވަނަ ދުވަހުގެ ދަންވަރުގެ ވަގުތެއްގައި، ށ. ފޭދޫ ހީނާމާގެ އިސްމާއިލް ޝައްފާން ޝަރީފް މަރާލީ ގޭންގް މާރާމާރީތަކުގައި ކަމަށް ފުލުހުން ބުނެފައިވެއެވެ.
އަދި އެ ނޫންވެސް ގިނަ މާރާމާރީތަކާއި ތޫނު އެއްޗެއް ބޭނުންކޮށްގެން މީހުން މެރުމުގެ ގިނަ މައްސަލަތަކެއް ކުރީގެ ރައީސް އަބްދުﷲ ޔާމީންގެ ވެރިކަމުގައި ހިނގައިގެންދިޔައެވެ. އަދި ރައީސް ޔާމީންގެ ސަރުކާރުގެ ބައެއް އިސްވެރިން، ގޭންގްތަކާ ގުޅުން އޮންނަކަމުގެ ތުހުމަތުތަކާއެކު މަރުގެ ބައެއް މައްސަލަތަކާއި ބޮޑެތި ޖަރީމާތައް ހިންގަމުންދާކަމަށް ވެސް ރައީސް ޔާމީންގެ ސަރުކާރުގެ ބައެއް އިސްވެރިންގެ މައްޗަށް ތުހުމަތު ކުރެވިފައިވެއެވެ.
