ޖޯންސަންގެ ކޮވިޑް-19 ވެކްސިން އިމަރޖެންސީ ހާލަތްތަކުގެ ބޭނުން ކުރުމުގެ ހުއްދައަށް އެދެފި
5 ފެބުރުއަރީ 2021 | ހުކުރު 15:03ހުއްދައާއި މެދު ގޮތެއް ނިންމުމަށް އެފްޑީއޭގެ ކޮމިޓީ ބައްދަލު ވުމެއް ފެބްރުއަރީ 26 ވަނަ ދުވަހަށް ތާވަލް ކުރެވިފައިވޭ
ޖޯންސަން އިން ކޮވިޑް-19 އަށް އުފައްދާފައިވާ އެއް ޑޯޒްގެ ވެކްސިން 66 އިންސައްތަ ކާމިޔާބު
ޖޯންސަން އެންޑް ޖޯންސަން ކުންފުނިން ކޮވިޑް-19 އަށް އުފެއްދި ވެކްސިން އިމަރޖެންސީ ހާލަތުގައި ބޭނުންކުރުމުގެ ހުއްދައަށް އެމެރިކާގެ ހެލްތް ރެގިއުލޭޓަރީ އޮތޯރިޓީގައި އެދިފައިވާކަމަށް އެ ކުންފުނިން ބުނެފިއެވެ.
އެ ކުންފުނިން އުފައްދާފައިވާ ވެކްސިނަކީ އެއް ޑޯޒް ޖަހަން ޖެހޭ ވެކްސިނަކަށް ވާއިރު އެ ކުންފުނިން ބުނީ ކުރިއަށް އޮތް ހަފްތާތަކުގެ ތެރޭގައި ވެކްސިން ބޭނުން ކުރުމުގެ ހުއްދައަށް ޔޫރަޕުގެ ވެކްސިނަށް ހުއްދަދޭ އިދާރާތަކުގައިވެސް އެދުމަށް ނިންމާފައިވާ ކަމަށެވެ.
މިކަމާއި ގުޅިގެން އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ)ން ބުނީ ޖޯންސަން އެންޑް ޖޯންސަން ކުންފުނިން އެދިފައިވާ ހުއްދައާއި މެދު ގޮތެއް ނިންމުމަށް ކޮމިޓީ ބައްދަލުވުމެއް ފެބްރުއަރީ 26 ވަނަ ދުވަހަށް ތާވަލް ކުރެވިފައިވާ ކަމަށެވެ.
ޖޯންސަންއިން ކޮވިޑް-19އަށް އުފައްދާފައިވާ އެއް ޑޯޒްގެ ވެކްސިން 66 އިންސައްތަ ކާމިޔާބުކަމަށް އެކުންފުނިން ހާމަކޮށްފައި ވާއިރު އެކުންފުނިން މިކަން ހާމަކުރީ ގިނަ ޓްރަޔަލްތަކެއް ކުރިއަށް ގެންދިއުމަށް ފަހު މިއަހަރުގެ ޖެނުއަރީ 28ގައެވެ.
އެގޮތުން ކޮވިޑްގެ ތަފާތު ވޭރިއަންޓްތަކަށް މި ވެކްސިން ޓެސްޓުކޮށްފައިވާއިރު، ޖޯންސަންގެ ވެކްސިން ޓްރަޔަލްގައި 44،000 ވޮލެންޓިއަރުން ބައިވެރިވެފައިވާ ކަމަށް އެކުންފުނިން ބުނެއެވެ.
އެގޮތުން އެމެރިކާގައި އެކުންފުނިން ކުރިއަށް ގެންދިޔަ ޓްރަޔަލް 72 އިންސައްތަ ކާމިޔާބުކަމަށް ދައްކާފައިވާއިރު، ލެޓިން އެމެރިކާގެ ޓްރަޔަލް ކާމިޔާބުކަމަށް ދައްކާފައި ވަނީ 66 އިންސައްތަކަމަށް ޖޯންސަންއިން ބުނެއެވެ. އަދި ސައުތު އެފްރިކާގައި އެކުންފުނިން ކުރިއަށް ގެންދިޔަ ވެކްސިން ޓްރަޔަލް 57 އިންސައްތަ ކާމިޔާބުކަމަށް އެކުންފުނިން ބުނެއެވެ.
އެކުންފުނިން 2021 ވަނަ އަހަރު ވެކްސިންގެ އެއް ބިލިއަން ޑޯޒް އުފެއްދުމަށް އަމާޒުހިފާފައިވާއިރު ޖޯންސަން އެންޑް ޖޯންސަން އިން ކޮވިޑް ވެކްސިން އުފެއްދުމުގެ މަސައްކަތްކުރާނީ އެމެރިކާ އަދި ސައުތު އެފްރިކާގެ އިތުރުން އިންޑިއާ އަދި ޔޫރަޕްގައެވެ.
