ޔުނައިޓެޑުން ނުވަ ލަނޑު ޖެހިއިރު، އާސެނަލް ބަލިވެއްޖެ

އިނގިރޭސި ޕްރިމިއާ ލީގުގައި އަންގާރަ ދުވަހުގެރޭ 9-0 ގެ ތަފާތު ބޮޑު ނަތީޖާއަކުން ސައުތެމްޓަން ބަލިކޮށް މެންޗެސްޓާ ޔުނައިޓެޑުން ކުރިން ހަދާފައިވާ ރިކޯޑަކާ ހަމަކޮށްފިއެވެ.

އަންގާރަ ދުވަހުގެރޭ ސައުތެމްޓަން ކޮޅަށް ޔުނައިޓެޑުން ނުވަ ލަނޑު ޖެހިއިރު، 1995 ވަނަ އަހަރު އެ ޓީމުން ވަނީ ޕްރިމިއާ ލީގުގައި އެންމެ ތަފާތު ބޮޑު ނަތީޖާއަކުން މޮޅުވުމުގެ ރިކޯޑު ހަދާފައެވެ. އެއީ އެ އަހަރު އިސްޕްވިޗް ޓައުން އަތުން 9-0 ގެ ނަތީޖާއަކުން މޮޅުވެގެންނެވެ. އަދި 2019 ވަނަ އަހަރު ލެސްޓާ ސިޓީން ވަނީ 9-0 ން ސައުތެމްޓަން ބަލިކޮށް މި ރިކޯޑާ އެއްވަރުކޮށްފައެވެ.

ޔުނައިޓެޑުގެ ދަނޑުގައި ކުޅުނު މެޗުގައި ސައުތެމްޓަނަށް މައްސަލަތަކެއް ދިމާވީ މެޗު ފަށައިގެން ދެވަނަ މިނެޓުގައި އެ ޓީމުގެ އަލެކްސަންޑަ ޔަންކެވިޓްޒަށް ރަތް ކާޑެއް ދެއްކުމާ ގުޅިގެންނެވެ. އެއާއެކު ފުރަތަމަ ހާފުގައި ޔުނައިޓެޑުން ވަނީ ހަތަރު ލަނޑު ޖަހާފައެވެ. މި ލަނޑުތައް އެ ޓީމަށް ކާމިޔާބުކޮށްދިނީ އާރޮން ވަން-ބިސާކާ އާއި، މާކަޝް ރަޝްފޯޑާއި، އެޑިންސަން ކަވާނީއެވެ. އަދި މި ހާފުގައި ޔުނައިޓެޑުން ޖެހި ތިންވަނަ ލަނޑަކީ ސައުތެމްޓަނުގެ ޔެން ބެޑްނަރެކް އަތުން ބައިކޮޅަށް ވަން ލަނޑެކެވެ.

މި މެޗުގެ ދެވަނަ ހާފުގައި އެންތަނީ މާޝިއަލް އާއި ސްކޮޓް މެކްޓޮމިނޭ ޔުނައިޓެޑަށް އިތުރު ދެ ލަނޑު ޖަހާދީފައި ވަނިކޮށް ސައުތެމްޓަނުގެ ޔެން ބެޑްނަރެކަށް ވަނީ ރަތް ކާޑެއް ދައްކާފައެވެ. އެއާއެކު ސައުތެމްޓަނުގެ ދެ ކުޅުންތެރިން މަދުވުމުގެ ފައިދާނަގައި ޔުނައިޓެޑުން އިތުރު ތިން ލަނޑު ޖެހިއިރު، މި ލަނޑުތައް ޖަހައިދިނީ ޕެނަލްޓީއަކުން ބްރޫނޯ ފެނާންޑޭސް އާއި، މާޝިއަލް އަދި ޑެނިއަލް ޖޭމްސްއެވެ.

މި މޮޅާއެކު ޔުނައިޓެޑުން ވަނީ ލީގުގެ އެއްވަނައިގައި އޮތް މެންޗެސްޓާ ސިޓީއާ ޕޮއިންޓުގެ ގޮތުން އެއްވަރުކޮށްފައެވެ. ސިޓީއަށް 20 މެޗުން 44 ޕޮއިންޓް ލިބިފައިވާއިރު، ޔުނައިޓެޑުން އެ އަދަދަށް ޕޮއިންޓް ހަމަކުރީ 22 މެޗުނެވެ. އަދި ތިންވަނައިގައި އެންމެ ފަހުގެ ޗެމްޕިއަން ލިވަޕޫލަށް 21 މެޗުން ލިބިފައިވަނީ 40 ޕޮއިންޓެވެ.

މީގެ އިތުރުން ލީގުގައި އަންގާރަ ދުވަހުގެރޭ ކުޅުނު މެޗުން ވުލްވްސްއިން ވަނީ ފަހަތުން އަރައި އާސެނަލް އަތުން 2-1 ގެ ނަތީޖާއަކުން މޮޅުވެފައެވެ.

ވުލްވްސްގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ އާސެނަލުންނެވެ. މެޗުގެ 32 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ނިކޮލަސް ޕެޕޭއެވެ. އެކަމަކު ފުރަތަމަ ހާފުގެ އިތުރު ވަގުތުގައި އޭރިއާތެރެއިން ވުލްވްސްގެ ވިލިއަން ހޯސޭއަށް ކުރި ފައުލަކާ ގުޅިގެން އާސެނަލުގެ ޑޭވިޑް ލުއިޒަށް ވަނީ ސީދާ ރަތް ކާޑެއް ދައްކާފައެވެ. އެއާއެކު ލިބުނު ޕެނަލްޓީން ވުލްވްސްއަށް ނަތީޖާ އެއްވަރުކޮށްދިނީ ރުބެން ނެވޭސްއެވެ.

އަދި މި މެޗުގައި ވުލްވްސްއިން ލީޑު ނަގާފައިވަނީ ދެވަނަ ހާފު ފަށައިގެން ހަތަރުވަނަ މިނެޓުގައެވެ. އޭރިއާ ބޭރުން ފޮނުވާލި ބާރު ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ޔާއޯ މުޓީނިއޯއެވެ. އަދި އާސެނަލުން މި މެޗު ނިންމާލާފައިވަނީ ނުވަ ކުޅުންތެރިންނާއެކުއެވެ. އެއީ މެޗުގެ 72 ވަނަ މިނެޓުގައި އެ ޓީމުގެ ގޯލްކީޕަރު ބާން ލޭނޯ އޭރިއާ ބޭރުން ބޯޅައިގައި އަތްލުމުން، އޭނާއަށް ސީދާ ރަތް ކާޑު ދެއްކުމާ ގުޅިގެންނެވެ.

މި ނަތީޖާއާއެކު ތާވަލުގެ 10 ވަނައިގައި އާސެނަލް އޮތީ 21 މެޗުން 31 ޕޮއިންޓާއެކުއެވެ. އަދި އާސެނަލް ބަލިކުރި ވުލްވްސް އޮތީ ތާވަލުގެ 14 ވަނައިގައި 22 މެޗުން 26 ޕޮއިންޓާއެކުއެވެ.