އަނަަސްގެ މަރުގެ މައްސަލަ: ދަޢުވާ ލިބޭ މީހަކު ބޭސްފަރުވާއަށް ރާއްޖެއިން ބޭރަށް ގޮސްފައިވާތީ އަޑުއެހުން ކެންސަލްކޮށްފި
1 ފެބުރުއަރީ 2021 | ހޯމަ 03:10ޑޮކްޓަރުންގެ ލަފަޔާއެކު ލޮލުގެ ބޭސްފަރުވާއަކަށް ރާއްޖެއިން ބޭރަށް ފޮނުވާފައިވަނީ ޖުނައިޙް އަބްދުﷲ ކަމަށްވޭ
އަނަސްގެ މަރުގެ މައްސަލައިގައި ދާދިފަހުން ކްރިމިނަލް ކޯޓުގައި ކުރިއަށްދިޔަ ޝަރީޢަތުގެ އަޑުއެހުމުގެ ތެރެއިން
ރ. މީދޫ ފެންފިޔާޒުގޭ މުޙައްމަދު އަނަސްގެ މަރުގެ މައްސަލައިގެ ޝަރީޢަތުގެ އަޑުއެހުމެއް އާދިއްތަ ދުވަހަށް ކްރިމިނަލް ކޯޓުގައި ތާވަލްކުރުމަށްފަހު ކެންސަލްކޮށްފިއެވެ.
ކްރިމިނަލް ކޯޓުން ބުނީ، އެ އަޑުއެހުން ކެންސަލް ކުރީ، އަނަސްގެ މަރުގެ މައްސަލައިގައި ދައުލަތުން ދަޢުވާކުރާ މީހުންގެ ތެރޭގައި ހިމެނޭ މީހަކު، ބޭސްފަރުވާއަށް ރާއްޖެއިން ބޭރަށް ގޮސްފައިވާތީކަމަށެވެ.
މަޢުލޫމާތު ލިބިފައިވާގޮތުގައި، ބޭސްފަރުވާއަށް ރާއްޖެއިން ބޭރަށް ގޮސްފައިވަނީ ޖުނައިޙް އަބްދުﷲ އެވެ. އޭނާ ރާއްޖެއިން ބޭރަށް ފޮނުވީ ޑޮކްޓަރުންގެ ލަފަޔާއެކު، ލޮލުގެ ބޭސްފަރުވާއަކަށް ކަމަށްވެއެވެ.
އެންމެފަހުން އަނަސްގެ މަރުގެ މައްސަލައިގެ އަޑުއެހުމެއް ބާއްވާފައިވަނީ މިދިޔަ ޑިސެމްބަރު މަހުގެ ތިންވަނަ ދުވަހުއެވެ. އެދުވަހުގެ އަޑުއެހުމުގައި ވަނީ ސިއްރު ނޫން ހެކިވެރިންގެ ތެރޭގައި ހިމެނޭ މޫސާ ސިލްވީނުގެ ހެކިބަސް ނަގާފައެވެ. މޫސާ ސިލްވީނަކީ މި މައްސަލައިގައި ސީން އޮފް ކްރައިމް ރިޕޯޓު ތައްޔާރުކުރެއްވި ފޮރެންސިކް އޮފިސަރެކެވެ.
އެ އަޑުއެހުމުގައި ދައުލަތުން ކުރި ސުވާލުތަކަށް ޖަވާބުދެއްވައި މައްސަލައިގައި ހެކިބަސް ދެއްވަމުން ސިލްވީނު ވިދާޅުވީ، ފުރަތަމަ "ކްރައިމް ސީނަށް" ވަޑައިގެންނެވިއިރު، ލިޓަސް ސާރވިސް ސެންޓަރުގެ ގަރާޖު ތެރޭގައި ގިނަ އަދަދެއްގެ ލޭ ހުރި ކަމަށާއި، އެތަނުގެ ކައިރީގައި ދެ ފައިވާން ކިބައާއި، ތަޅުދަނޑިއެއްގެ އިތުރުން ލޭ ހޭކިފައި އޮތް ރިހި ފަށެއް އޮތް ކަމަށެވެ. އަދި އޭގެ ތެރޭގައި ހިމެނޭ ތަކެތީގެ ތެރެއިން މާއްދީ ހެކިތަކެއް ފެނުނުކަން އޭނާ ފާހަގަ ކުރެއްވިއެވެ.
އޭގެ އިތުރުން ދިފާޢީ ވަކީލު ވެސް ވަނީ ސީންއަށް ދިޔައިރު ފާހަގަވި ކަންކަމާ ގުޅޭގޮތުން ސުވާލުކޮށްފައެވެ. އެގޮތުން ސީންއަށް ދިއުމަށްޓަކައި ގަރާޖު ތެރެއަށް ވަތް ގޮތާއި، އެތެރޭގައި ހުރި ބިއްލޫރި ދޮރުތަކުން އެތެރެއަށް ވަތް ގޮތާމެދު ދިފާޢުން ވަނީ ހެކިވެރިޔާއާ ސުވާލުކޮށްފައެވެ. އަދި ސީނުން މާއްދީ ހެކި ނަގާފައިވާއިރު، ސީން ރައްކާތެރިކުރެވިފައި އޮތީ ކިހާ ވަރަކަށްތޯ ދިފާޢީ ވަކީލު އާދަމް އާސިފް ސުވާލު ކުރެއްވިއެވެ. އެކަމާ ގުޅޭގޮތުން ސިލްވީން ވިދާޅުވީ، އެ ސަރަޙައްދު ސީދާ ޓޭޕް ދަމައި ކޯރޑަން ކޮށްފައި ނުވި ނަމަވެސް، އެ ތަނުގައި އެވަގުތު ފުލުހުން ޙަރަކާތްތެރިވަމުން ދިޔަ ކަމަށެވެ.
ސީނުން ނަގާފައިވާ މާއްދީ ހެކިތަކުން ދަޢުވާ ލިބޭ ފަރާތްތަކުގެ ފިންގަރ ޕްރިންޓް ނުވަތަ ޑީއެންއޭ ހުރިތޯ ބެލުމަށް ފޮނުވިތޯ ދިފާޢީ ވަކީލު އާދަމް އާސިފް ކުރެއްވިއެވެ. އެކަމާ ގުޅޭގޮތުން ސިލްވީން ވިދާޅުވީ، މާއްދީ ހެކިތައް ނެގުމަށްފަހު އެތަކެތި ފިންގަރ ޕްރިންޓާއި ޑީ.އެން.އޭ ހޯދުމަށް ފޮނުވި ކަމަށެވެ.
އޭގެ އިތުރުން، ތަޅުދަނޑިފައްޗެއް ފެނުނުކަން ފާހަގަ ކޮށްފައިވާއިރު، އެ ތަޅުދަނޑިފަތި ހޯދީ ކްރައިމް އޮފް ސީން އޮފިސަރެއް ނޫން ކަމަށްވާއިރު، އެކަން ހިނގައިދިޔަގޮތާ ގުޅޭގޮތުން ވެސް އާސިފް ސުވާލުކުރެއްވިއެވެ. އެކަމާ ގުޅޭގޮތުން ސިލްވީން ވިދާޅުވީ، ތަޅުދަނޑިފަތި ނެގީ އެތަނުގައި ހުރި އިންވެސްޓިގޭޓިވް އޮފިސަރ (އައިއޯ) ކަމަށެވެ.
މި މައްސަލައިގައި ސިލްވީންގެ ހެކިބަސް ނަގާ ނިމިފައިވާއިރު، ސިއްރު ނޫން ހުރިހާ ހެކިވެރިންގެ ހެކިބަސްތައް މިހާރު މިވަނީ ނަގައި ނިންމާފައެވެ. އެގޮތުން މި މައްސަލައިގައި މީގެ ކުރިން ވަނީ ސިއްރު ނޫން 3 ހެކިވެރިއެއްގެ ހެކިބަސް ނަގާފައެވެ.
