ފާއިތުވި އަހަރު ނިމުނުއިރު ރާއްޖޭގެ ރިޒާވް އިތުރުވެއްޖެ
30 ޖެނުއަރީ 2021 | ހޮނިހިރު 14:512019 ވަނަ އަހަރުގެ ޑިސެމްބަރމަސް ނިމުނުއިރު ގްރޮސް އިންޓަނޭޝަނަލް ރިޒާވްގައި ހުރީ 753.5 މިލިއަން ޑޮލަރު
މޯލްޑިވްސް މަނިޓަރީ އޮތޯރިޓީ
ފާއިތުވި އަހަރުގެ ޑިސެމްބަރމަސް ނިމުނު އިރު ރާއްޖޭގެ ރިޒާވް 2019 ވަނަ އަހަރުގެ ޑިސެމްބަރމަހާއި އަޅާބަލާއިރު 31 އިންސައްތަ އިތުރުވެފައިވާކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
އެމްއެމްއޭ އިން އާންމުކޮށްފައިވާ އިކޮނިމިކް އަޕްޑޭޓް ދައްކާގޮތުން 2020 ވަނަ އަހަރުގެ ޑިސެމްބަރމަސް ނިމުނުއިރު ރާއްޖޭގެ ގްރޮސް އިންޓަނޭޝަނަލް ރިޒާވްގައި ހުރީ 984.8 މިލިއަން ޑޮލަރެވެ. 2019 ވަނަ އަހަރުގެ ޑިސެމްބަރމަސް ނިމުނުއިރު ގްރޮސް އިންޓަނޭޝަނަލް ރިޒާވްގައި ހުރީ 753.5 މިލިއަން ޑޮލަރެވެ.
ފާއިތުވި އަހަރުގެ ނޮވެމްބަރމަސް ނިމުނު އިރު ރާއްޖޭގެ ގްރޮސް އިންޓަނޭޝަނަލް ރިޒާވްގައި 629.9 މިލިއަން ޑޮލަރު ހުރި އިރު، 984.8 މިލިއަން ޑޮލަރަށް ރިޒާވް އިތުރުވުން އެއީ 56 އިންސައްތައިގެ އިތުރުވުމެކެވެ.
މި ސަރުކާރުން ރާއްޖޭގެ ވެރިކަމާއި ހަވާލުވެ، 2018 ވަނަ އަހަރު ނިމުނުއިރު ދައުލަތުގެ ރިޒާވްގައި 712 މިލިއަން ޑޮލަރު ހުރި ނަމަވެސް ބޭނުން ކުރެވެން ހުރީ އެންމެ 281 މިލިއަން ޑޮލަރުކަމަށް ސަރުކާރުން ވަނީ ބުނެފަ އެވެ. 2019 ވަނަ އަހަރު ރާއްޖޭގެ ރިޒާވް 753.3 މިލިއަން ޑޮލަރަށް އިތުރުވިއިރު، ޔޫޒަބަލް ރިޒާވް ވަނީ 315.8 މިލިއަން ޑޮލަރަށް އިތުރުވެފައެވެ. މިއީ 2012 ވަނަ އަހަރުގެ ފަހުން، ރާއްޖޭގެ ޔޫޒަބަލް ރިޒަރވް މިހާ މައްޗަށް ޖެއްސުނު ފުރަތަމަ ފަހަރެވެ.
ކޮވިޑް-19 ބަލިމަޑުކަމާއިއެކުވެސް ދައުލަތުގެ ރިޒާވަށް އުނިނުވާނެހެން ސަރުކާރުން މަސައްކަތް ކުރަމުންދާއިރު، 2020 ވަނަ އަހަރުގެ އޮގަސްޓްމަސް ނިމުނުއިރު ދައުލަތުގެ ޔޫސަބަލް ރިޒާވްގައި ހުރީ 122.3 މިލިއަން ޑޮލަރެވެ.
