ހުޅުމާލޭ ކޮވިޑް ފެސިލިޓީގައި ތިބި ފަރާތްތަކަށް ސައިކޯ ސޯޝަލް ސަޕޯޓު ދިނުމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ސޯޝަލް އެންގޭޖްމަންޓް ޓީމު ފޮނުވައިފިއެވެ.

ޖެންޑަރ މިނިސްޓްރީން ބުނީ ހުޅުމާލޭގެ ކޮވިޑް ފެސިލިޓީގައި ތިބި ފަރާތްތަކަށް ނަފުސާނީ އަދި އިޖުތިމާޢީ އެހީތެރިކަން ދިނުމަށް އެ މިނިސްޓްރީގެ ޓީމު ފޮނުވާފައިވާކަމަށެވެ.

ފާއިތުވި އަހަރު މި ދާއިރާއިން މީހުން ތަމްރީނު ކުރުމުގެ ޕްރޮގްރާމް ހިންގާފައިވާއިރު ކޮވިޑް-19އާއި ގުޅިގެން ނަފުސާނީ އަދި އިޖުތިމާޢީ އެހީތެރިކަން ފޯރުކޮށްދިނުމަށް 266 މީހުން ސައިކޯ ސޯޝަލް ސަޕޯޓުގެ ދާއިރާއިން ތަމްރީނު ކުރެވިފައިވާ ކަަމަށް ދިވެހި ރެޑްކްރެސެންޓުން ބުނެފައިވެއެވެ.

ވޮލެންޓިއަރުން ތަމްރީނުކުރުމާއި ގުޅޭ ގޮތުން ރެޑް ކްރެސެންޓުގެ ޕްރޮގްރާމް އެންޑް ސަރވިސަސް މެނޭޖަރު މައީދު ޒާހިރު ވިދާޅުވީ ވޮލެންޓިއަރުން ތަމްރީނުކުރުމުގެ އެންމެ މުހިންމު މަޤުޞަދަކީ އުދަނގޫ ޙާލަތުގައި ތިބޭ މީހުންނާ ވާހަކަ ދައްކާއިރު އެމީހުންގެ ޙާލަތާ އެންމެ ރަނގަޅަށް، އެކަށޭނެ ގޮތަކަށް ވާހަކަތައް ދެކެވުން ކަމަށެވެ.

މީގެ އިތުރުން މުޢާމަލާތު ކުރާއިރު، ނަފުސާނީ ގޮތުންނާއި، އިޖްތިމާޢީ ގޮތުން ވިސްނަންވީ ކަންކަން ތައްޔާރުވެ އަހުލުވެރި ކުރުވުމަކީ ވެސް ތަމްރީނުގެ މައިގަނޑު މަޤުޞަދުކަމަށް މައީދު ވިދާޅުވިއެވެ.