އިންޑިއާގެ ސެރަމް އިންސްޓިޓިއުޓުން އުފައްދާފައިވާ ކޮވިޝީލްޑް ވެކްސިން ސްރީލަންކާއާއި ބަހްރައިންއަށް ފޮނުވައިފިއެވެ.

ރިޕޯޓުތައް ބުނާ ގޮތުން 50،400 ޑޯޒް ވެކްސިން ލަންކާއަށް، 10،800 ޑޯޒް ވެކްސިން ބަހްރައިންއަށް ވަނީ ފޮނުވާފައެވެ.

ލަންކާއަށް ވެކްސިން ފޮނުވާފައިވާއިރު، މިހާތަނަށް 60،694 ގިނަ މީހުން އެ ގައުމުން ވަނީ މި ބައްޔަށް ޕޮޒިޓިވްވެފައެވެ. އަދި 290 މީހަކު މަރުވެފައިވާއިރު، 54،566 ގިނަ މީހުން ބަލިން ރަނގަޅުވެފައިވެއެވެ. މީގެ އިތުރުން 101،116 މީހަކު ބައްޔަށް ޕޮޒިޓިވްވެފައިވާއިރު، 371 މީހަކު ވަނީ ބަލީގައި މަރުވެފައެވެ. އަދި 97،337 މީހަކު ބަލިން ރަނގަޅުވެފައިވެއެވެ.

ވެކްސިން ދިނުމުގެ ޕްރޮގްރާމް ފެށުމާއެކު މިއަހަރުގެ މެދުތެރެއިން ބަލި ކޮންޓްރޯލް ކުރެވޭނެކަމުގެ އުންމީދު ބޮޑު ކަމަށް ކަމާބެހޭ ފަރާތްތަކުން ވިދާޅުވެއެވެ.

އިންޑިއާގެ އެކްސްޓަރނަލް އެފެއަރޒްގެ މިނިސްޓަރު ޑރ. ސުބްރަމާނިއަމް ޖެއިޝަންކަރު ވިދާޅުވީ ކޮވިޑް-19ގެ ހާލަތުން އަރައިގަތުމަށް ކުރަމުންދާ މަސައްކަތުގެ ތެރެއިން ގައުމުތަކަށް ވެކްސިން ފޯރުކޮށްދެނީ އިންސާނިއްޔަތަށްޓަކައި ކަމަށެވެ.

ކޮވިޝީލްޑް ވެކްސިން ގިނަ ގައުމުތަކަށް ފޮނުވަމުންދާއިރު، މިހާރު މޮރިޝަސް، މިއަންމާ، ބްރެޒިލް، މޮރޮކޯ، ރާއްޖެ އަދި ބޫޓާންއަށް ވަނީ ފޮނުވާފައެވެ. އިންޑިއާއިން އުފެއްދި ވެކްސިން އެ ގައުމުގެ އެތައްހާސް ބަޔަކަށް މިހާތަނަށް ދީފައިވާއިރު، އަދިވެސް އިތުރު ގައުމުތަކަށް ވެކްސިން ފޮނުވުމުގެ މަސައްކަތް ކުރާ ކަމަށް އިންޑިއާގެ ސަރުކާރުން ހާމަކޮށްފައިވެއެވެ.

މި މިވެކްސިންއަކީ އެސްޓްރަޒެނިކާގެ އޮކްސްފޯރޑް ޔުނިވަރސިޓީ ކޮލަރބްރޭޓްވެފައިވާ ވެކްސިންއެކެވެ. ސެރަމް އިންސްޓިއުޓުން މިވެކްސިންގެ ޑޯޒްތައް އުފައްދާތީ އިންޑިއާއިން ވަނީ މިވެކްސިންއަށް ''ކޮވިޝީލްޑް''ގެ ނަމުން ނަންދީފައެވެ. އެސްޓްރަޒެނިކާގެ ވެކްސިންތައް އެމަރޖެންސީކޮށް ބޭނުންކުރުމުގެ ހުއްދަ ގިނަ ގައުމުތަކުގައި ވަނީ ދީފައެވެ. އެގޮތުން އިނގިރޭސިވިލާތް، ޕާކިސްތާން، ބްރެޒިލް އަދި މެކްސިކޯ ފަދަ ގައުމުތައް ހިމެނެއެވެ.

ޑަބްލިޔު.އެޗް.އޯ.ގެ ފުރިހަމަ އިތުބާރާއެކު ކާމިޔާބު ގިނަ ވެކްސިންތަކެއް އުފައްދާ އިންޑިއާގެ ސެރަމް އިންސްޓިއުޓުން ވެސް ވަނީ ކޮވިޝީލްޑް ވެކްސިން ކާމިޔާބު ވެކްސިންއަކަށް ވާނެކަމުގެ ޔަގީންކަން ދީފައެވެ. އަދި އުސޫލު އޮންނަ ގޮތުން ކޮންމެ ވެކްސިންއަކަށް ވެސް ވަކިން ހުއްދަ ދޭން ޖެހޭއިރު، ފެބްރުއަރީ މަހުގެ މެދެއްހާ ހިސާބުގައި ޑަބްލިޔު.އެޗް.އޯ.ގެ ހުއްދަ ލިބޭނެކަމަށް ކަމާބެހޭ ފަރާތްތަކުން ދަނީ ވިދާޅުވަމުންނެވެ.