ކޮޅުފުށިން މާލެއަށް އައި މީހެއް ޕޮޒިޓިވްވި ނަމަވެސް ބައްޔަށް ހުށަހެޅުނީ ރަށުން ކަމަކަށް ނުބެލެވޭ: ކައުންސިލް
25 ޖެނުއަރީ 2021 | ހޯމަ 07:31ގާތްގަނޑަކަށް 50 ސާމްޕަލް ނަގާފައިވޭ
މ.ކޮޅުފުށި، ބަލިން ރައްކާތެރިވުމަށް ގިނަ ފިޔަވަޅުތަކެއް ވަނީ އަޅާފައި
މ.ކޮޅުފުށިން މާލެއަށް އައި މީހެއް ކޮވިޑް-19ށް ޕޮޒިޓިވްވުމާ ގުޅިގެން އެރަށް މޮނިޓަރިންއަށް ލައިފިއެވެ.
އާދިއްތަ ދުވަހުގެ ރޭ ހެލްތް އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި އެ ސެންޓަރު ތަރުޖަމާނު ޑރ.ނަޒްލާ ރަފީގު ވިދާޅުވީ އާދިއްތަ ދުވަހުގެ ހަވީރުގެ ވަގުތެއްގައި ކޮޅުފުށި މޮނިޓަރިންގެ ހާލަތަށް ގެނެވިފައިވާ ކަމަށެވެ.
ޑރ.ނަޒްލާ ވިދާޅުވީ އެރަށުން މާލެ އައި މީހެއް ދެ ދުވަހުގެ ތެރޭގައި ބަލީގެ އަލާމާތްތައް ފެނިގެން ޓެސްޓުކުރުމުން ބައްޔަށް ޕޮޒިޓިވްވެފައިވާ ކަމަށެވެ. އަދި ކޭސް އިންވެސްޓިގޭޝަންތަކާއި، ކޮންޓެކްޓް ޓްރޭސިންގެ މަސައްކަތްތައް ކުރިއަށް ގެންދިއުމަށް އެރަށް މޮނިޓަރިންއަށް ލާފައިވާ ކަމަށް ޑރ.ނަޒްލާ ވިދާޅުވިއެވެ.
ކޮޅުފުށީގެ އާންމު ހާލަތާ ބެހޭ ގޮތުން ކައުންސިލްގެ ރައީސް ހުސެއިން ޝާމިލް ވިދާޅުވީ ރަށުގެ ތެރެއިން ސާމްޕަލްތައް ނެގުމުގެ މަސައްކަތްތަކާއި، ޑައިރެކްޓް ކޮންޓެކްޓުން ދެނެގަތުމުގެ މަސައްކަތްތައް ކުރިއަށްދާ ކަމަށެވެ. އަދި ގާތްގަނޑަކަށް 50 ސާމްޕަލް ނެގިފައިވާ ކަމަށް އޭނާ ވިދާޅުވިއެވެ.
ޝާމިލް ވިދާޅުވީ މާލެ ދިޔަފަހުން ޕޮޒިޓިވްވެފައިވަނީ މާލޭގައި ދިރިއުޅޭ އެރަށަށް ނިސްބަވްތާ އަންހެނެއް ކަމަށާއި، އޭނާ ރަށަށް އައީ ޗުއްޓީއަށް ކަމަށެވެ. އަދި ޗުއްޓީ ނިންމާލާފައި ދިޔަ ފަހުން ޕޮޒިޓިވްވި ނަމަވެސް ރަށުން ދިމާވި ކަމެއް ކަމަށް ނުބެލެވޭ ކަމަށް ޝާމިލް ވިދާޅުވިއެވެ. އަދި ވިދާޅުވީ ރަށުގެ އެހެން މީހެއްގެ ފަރާތުން ބަލީގެ އެއްވެސް އަލާމާތެއް އަދި ނުފެންނަ ކަމަށެވެ.
މީގެ އިތުރުން ޝާމިލް ވިދާޅުވީ ޗުއްޓީ ދުވަސްވަރާ ދިމާކޮށް ގިނަ ބަޔަކު ރަށަށް ދިޔަ ކަމަށެވެ. ނަމަވެސް ހުރިހާ ފަރާތްތަކުން ރަށުގެ ތެރެއަށް ނުކުމެ އުޅުނީ ކަރަންޓީން ފުރިހަމަ ކުރުމަށްފަހު ނަތީޖާ ނެގެޓިވްވުމުން ކަމަށް ޝާމިލް ވިދާޅުވިއެވެ.
ކޮވިޑް-19ން ރައްކާތެރިވުމަށް ގިނަ ފިޔަވަޅުތައް އަޅާފައިވާކަން ފާހަގަކުރައްވައި ޝާމިލް ވިދާޅުވީ ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ އުސޫލުތަކުގެ އިތުރުން ކައުންސިލުން ވެސް ޚާއްޞަ ފިޔަވަޅުތަކެއް އަޅާފައިވާ ކަމަށެވެ. އަދި ރަށުގެ ރައްޔިތުން ވެސް އެ އުސޫލުތަކަށް ބޯލަނބާ، އެ އުސޫލުތަކާ އެއްގޮތަށް އަމަލު ކުރަމުންދާ ކަމަށް ވެސް އޭނާ ވިދާޅުވިއެވެ.
އެގޮތުން މާސްކު އެޅުމާއި، އެއްފަހަރާ އެއްތަނަކަށް ގިނަ ބަޔަކު އެއްވެ ނޫޅުމުގެ އިތުރުން ސާފުތާހިރު ކަމަށް ހުރިހާ ރައްޔިތުން ވެސް ޚާއްސަޞަ ސަމާލުކަމެއް ދޭ ކަމަށް ޝާމިލް ވިދާޅުވިއެވެ.
ޝާމިލް ވިދާޅުވީ ރަށް މޮނިޓަރިންގެ ހާލަތުގައި އޮތް ނަމަވެސް އެހެން ދަތިކަމެއް ނެތް ކަމަށެވެ. އެގޮތުން ބޭހާއި، ކާޑުގެ ބާވަތްތަކާއި، އެހެންވެސް ދިރިއުޅުމަށް ބޭނުންވާ އާލާތްތައް އެކަށީގެންވާ ވަރަށް ލިބެން އެބަހުރި ކަމަށް ޝާމިލް ވިދާޅުވިއެވެ.
