ޤާސިމްގެ މަރުގެ މައްސަލަ: ބަޔާނެއް ދޭން ބޭނުން ކަމަށް އަދުހަމް ބުނެފި

ޓެކްސީ ޑްރައިވަރު، ޤާސިމް ހަސަން (59އ) މަރާލި މައްސަލައިގައި، ގަސްދުގައި މީހަކު މެރުމުގެ ކުށުގެ ދައުވާ އުފުލާފައިވާ ޅ. ހިންނަވަރު، ބޮޑުހިޔާގެ، އަދުހަމް މުހައްމަދު (21އ), ޝަރީޢަތަށް ބަޔާނެއް ދޭން ބޭނުންވާކަމަށް ބުނެފިއެވެ.

ބުރާސްފަތި ދުވަހު ކްރިމިނަލް ކޯޓުގައި ބޭއްވި އަޑުއެހުމުގައި ބަޔާނެއް ދޭން ބޭނުންވާ ކަމަށް އަދުހަމް ބުނުމުން، އެފުރުސަތު ދިނުމުގެ ގޮތުން ގާޒީ ވަނީ، ބުރާސްފަތި ދުވަހުގެ އަޑުއެހުން ނިންމަވާލެއްވުމަށްފަހު، މިމަހުގެ 25 ވަނަ ދުވަހު އަޑުއެހުމެއް ބޭއްވޭނެކަމަށް ވިދާޅުވެފައެވެ.

މި މައްސަލައިގެ އަޑުއެހުމެއް މިމަހުގެ 17 ވަނަ ދުވަހުގެ ވެސް ކްރިމިނަލް ކޯޓުގައި ތާވަލުކުރިއެވެ. ނަމަވެސް އެ އަޑުއެހުން ކެންސަލްކުރީ، އަލުން ޢައްޔަން ކުރެވުނު، އަދުހަމްގެ ގާނޫނީ ވަކީލުގެ ބައްދަލުވުން އެ ދުވަހަށް ހަމަޖެހިފައިވާތީ، އެފުރުސަތު ދިނުމުގެ ގޮތުންނެވެ.

އަދުހަމްގެ މައްޗަށް އުފުލާފައިވާ ދައުވާގެ އަޑުއެހުންތައް އެކަށީގެންވާ ގޮތެއްގައި ކުރިއަށް ނުދާކަން ފާހަގަކުރެވޭއިރު، ދޭތެރެދޭތެރެއިން އަޑުއެހުމެއް ތާވަލުކުރިނަމަވެސް އަޑުއެހުންތައް ކުރިއަށް ގެންދެވޭވަރެއް އަދި ނުވެއެވެ.

މިއަހަރުގެ އޮކްޓޯބަރު 11 ވަނަ ދުވަހު ކުރިއަށް ގެންދެވުނު އަޑުއެހުމުގައި އަދުހަމް ވަނީ އޭނާ ޖަލުގައި އޮންނަންޖެހޭތީ ގާނޫނީ ވަކީލެއް ޢައްޔަންކުރުމަށް ދަތިތަކާ ކުރިމަތިވާ ކަމަށް ބުނެފައެވެ. އަދުހަމް ބުނެފައިވަނީ "ކޮތަރު ކޮއްޓެއްގައި އޮންނަންޖެހޭއިރު" ވަކީލަކު ޢައްޔަންކުރަން ދަތިވާނެކަމަށެވެ. އަދި މިހާރު ވަކީލަކާ ނުލައި ވެސް މައްސަލަ ކުރިއަށް ގެންދަން އެއްބަސް ކަމަށާއި، ނަމަވެސް ދައުވާއާ ގުޅޭ ހުރިހާ ލިޔެކިއުންތައް ބޭނުންވާކަން އަދުހަމް ފާހަގަކުރިއެވެ.

އެއާއެކު ގާޒީވަނީ ވަކީލަކު ޢައްޔަންކުރުމަށް އިތުރު ފުރުސަތެއް ބޭނުންވޭތޯ އަދުހަމާ ސުވާލުކުރައްވާފައެވެ. އެކަމާ ގުޅިގެން އަދުހަމް ވަނީ މި ވަގުތު ވަކީލެއް ބޭނުންނުވާކަމަށާއި، މައްސަލައިން ދިފާޢުވުމަށް އަމިއްލައަށް ވާހަކަދެއްކޭނެކަމަށެވެ.

މި މައްސަލައިގައި ގާޒީއާއި ދައުލަތުން ފާހަގަކުރި ކަންކަމަށްފަހު އަދުހަމް ވަނީ މައްސަލައާ ގުޅިގެން ވަކީލަކާ މަޝްވަރާ ކުރުމަށް އެކަށީގެންވާ ފުރުސަތު ލިބިއްޖެނަމަ، އައު ވަކީލަކާއެކު ކުރިއަށް ދިއުމަށް ބޭނުންވާކަން ފާހަގަކޮށްފައެވެ. އަދި ގާޒީ ވަނީ އެ ފުރުސަތު ދޭން ނިންމަވާފައެވެ.

ޤާސިމްގެ މަރުގެ މައްސަލައިގައި އެންމެ ފުރަތަމަ ބޭއްވި އަޑުއެހުމުގައި އަދުހަމް ވަނީ ޤާސިމް މަރާލިކަމަށް އެއްބަސްވެ، ކުށަށް އިޢުތިރާފްވެފައެވެ. އެހެންނަމަވެސް މި އަހަރުގެ ފެބްރުއަރީ މަހުގެ 18 ވަނަ ދުވަހު ބޭއްވި އަވަސް ނިޔާގެ ޝަރީޢަތުގެ އަޑުއެހުގައި އަދުހަމްވަނީ، ކުރިން ވެފައިވާ އިޢުތިރާފް އަނބުރާ ގެންގޮސް، ދައުވާއަށް އިންކާރު ކޮށްފައެވެ.

އެހެންކަމުން އަވަސް ނިޔާގެ ޝަރީޢަތުގެ މަރުހަލާ އެވަނީ ނިމިފައެވެ. މިހާރު ކުރިއަށްދަނީ ޖިނާޢީ އެހެން މައްސަލަތައް ވެސް ކުރިއަށްދާގޮތަށް އިބްތިދާޢީ އަޑުއެހުންތަކަށްފަހު، ޝަރީޢަތުގެ އަޑު އަޑުއެހުންތަކެވެ.

ޤާސިމް މަރާލާފައި މަގުމަތީ އޮއްވައި ފެނިގެން މީހަކު، ފުލުހުންނަށް ރިޕޯޓްކޮށްފައިވަނީ 2019 ވަނަ އަހަރުގެ ޑިސެމްބަރު މަހުގެ ހަތަރުވަނަ ދުވަހުގެ ރޭ 21:07 ހާއިރުއެވެ.

ފުލުހުން ބުނެފައިވާގޮތުން، އަދުހަމަކީ މަސްތުވާތަކެތީގެ މައްސަލަތަކާއި ވައްކަމާއި، ފޭރުމާއި، މާރާމާރީގެ އިތުރުން ތަފާތު އެކިއެކި މައްސަލަތަކުގެ ރެކޯޑު އޮތް މީހެއް ކަމަށެވެ. އެގޮތުން ޤާސިމް މަރާލި ދުވަހު ވެސް އޭނާ މަސްތުވުމަށާއި ޒަރޫރީ އެކިއެކި ބޭނުންތަކަށް ފައިސާ ހޯދުމުގެ ގޮތުން ފޭރުމަށް މަސައްކަތްކުރިކަމަށް ފުލުހުން މަޢުލޫމާތުދީފައިވެއެވެ.