ކަނޑޫފާތައް މަރުވާ ސަބަބު ހޯދުމަށް ނެގި ސާމްޕަލްތައް އިންޑިއާއަށް ފޮނުވައިފި
20 ޖެނުއަރީ 2021 | ބުދަ 03:41ކޮޗިން ޔުނިވާސިޓީ ކުރިއަށްގެންދާ ދިރާސާތަކަށްފަހު ކަނޑޫފާތައް މަރުވާ ސަބަބު އެނގިގެންދާނެ
ހއ. ކެލާގެ ކަނޑޫފާ، ބޮޑު ސަރަހައްދެއް މިހާރު ވަނީ އެއްކޮށް މަރުވެފައި
ރާއްޖޭގެ އެކި ސަރަޙައްދުތަކުގައި ހުރި ކަނޑޫފާތައް މަރުވާ ސަބަބު ހޯދުމަށް ނެގި ސާމްޕަލްތައް އިންޑިއާއަށް ފޮނުވައިފިއެވެ.
އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އިން ބުނީ އެކި ސަރަޙައްދުތަކުގެ ކަނޑޫފާތަކުން ނަގާފައިވާ ސާމްޕަލްތައް އިންޑިއާގެ ކޮޗިން އޮފް ސައިންސް އެންޑް ޓެކްނޮލޮޖީގެ ޔުނިވާސިޓީއަށް ފޮނުވާފައިވާ ކަމަށެވެ. ސާމްޕަލްތައް ނަގާފައިވަނީ ކަނޑޫފާތައް މަރުވަމުންދާ ހަތް ރަށަކުންނާއި ސައިޓަކުން ކަމަށް އީޕީއޭއިން ބުނެއެވެ.
ކަނޑޫފާތައް މަރުވާ މައްސަލައާ ގުޅިގެން އީޕީއޭއިން މީގެ ކުރިން ވެސް ކޮޗިން ޔުނިވާސިޓީ ކަމާބެހޭ ބޭޅުންނާއެކު މަޝްވަރާ ބައްދަލުވުންތައް ބާއްވާފައިވެއެވެ. އީޕީއޭއިން ބުނީ އަންގާރަ ދުވަހު ސާމްޕަލްތައް ފޮނުވާފައި ވަނީ އިންޑިއާގެ ހައި ކޮމިޝަނާއި ރާއްޖޭގެ ފޮރިން މިނިސްޓްރީ ގުޅިގެން ކަމަށެވެ.
ބައެއް ރަށްރަށުގެ ކަނޑޫފާތައް ވަރަށް ބޮޑަށް މަރުވަމުންދާއިރު، ސީދާ ސަބަބު މިހާތަނަށް ދެނެގަނެވިފައެއް ނުވެއެވެ. ނަމަވެސް ކޮޗިން ޔުނިވާސިޓީ ކުރިއަށް ގެންދާ ދިރާސާތަކަށްފަހު ކަނޑޫފާތައް މަރުވާ ސަބަބު އެނގިގެންދާނެ ކަމަށް އީޕީއޭއިން ބުނެއެވެ.
ރާއްޖޭގެ އެކި ސަރަހައްދުތަކުގައި ހުރި ކަނޑޫފާތައް މަރުވާކަން ފާހަގަކުރެވުނީ މިދިޔަ އަހަރުގެ ކުރީކޮޅެވެ. އެގޮތުން ހދ. ނޭކުރެންދޫ އާއި ހދ. ކެލާގެ ކަނޑޫފާގެ ބޮޑުބައެއް ވަނީ މަރުވެފައެވެ. އަދި ކަނޑޫފާތައް މަރުވާން ފެށުމާއެކު ރާއްޖޭގައި ހުރި ކަނޑޫފާތައް ހިމާޔަތްކުރުމަށް ހިއުމަން ރައިޓްސް ވޮޗް (އެޗްއާރްޑަބްލިޔު) އިން ދިވެހި ސަރުކާރަށް ގޮވާލާފައި ވަނީ މިދިޔަ އަހަރުގެ ޖެނުއަރީ މަހުގެ ތެރޭގައެވެ.
ކަނޑޫފާތަކަކީ ރަށް ގިރުމާއި ފެން ބޮޑުވުމުގެ ހާދިސާތަކުން ރައްކާތެރިކޮށްދޭ ގުދުރަތީ ވަސީލަތެއް ކަމަށާއި، އެތަންތަން ނައްތާލުމުގެ ސަބަބުން ރަށްތަކަށް އެކަމުގެ ނޭދެވޭ އަސަރު ކުރެއެވެ.
