ޕާކިސްތާނުން ސިނޮފަރމް ކޮވިޑް ވެކްސިން އެމަރޖެންސީކޮށް ބޭނުންކުރުމުގެ ހުއްދަދީފި

ޗައިނާއިން ކޮވިޑް-19ށް އުފައްދާފައިވާ ވެކްސިން އިމަރޖެންސީކޮށް ބޭނުން ކުރުމުގެ ހުއްދަ ޕާކިސްތާނުން ދީފިއެވެ.

ޕާކިސްތާނުގެ ޑްރަގް ރެގިއުލޭޓަރީ އޮތޯރިޓީން ބުނީ މި ވެކްސިން އިމަރޖެންސީކޮށް ބޭނުންކުރުމުގެ ހުއްދަ ހޯމަ ދުވަހު ދީފައިވާކަމަށެވެ.

އެގައުމުގެ ހެލްތް މިނިސްޓްރީން ބުނީ ޕާކިސްތާނަށް ވެކްސިން ގެނައުމަށްޓަކައި ވެކްސިން އުފައްދާފައިވާ އެހެން ކުންފުނިތަކާ ވެސް މަޝްވަރާ ކުރަމުން ދާކަމަށެވެ.

އެ މިނިސްޓްރީން އިތުރަށް ބުނީ މިހާރު ދެ ވެކްސިނަކަށް ޝަރުތުތަކަކާއެކު ބޭނުން ކުރުމުގެ ހުއްދަ ދެވިފައިވާ ކަމަށެވެ. އަދި ބޭނުން ކުރަން ހުއްދަ ދިން ދެ ވެކްސިނުގެ ވެސް ރައްކާތެރިކަން ކަށަވަރުކުރުމަށް ގިނަ މަސައްކަތްތަކެއް ކުރެވިފައިވާކަމަށް އެ މިނިސްޓްރީން ވަނީ ހާމަކޮށްފައެވެ.

ޕާކިސްތާނުގައި ވަކި ހާލަތްތަކެއްގައި ވެކްސިން ބޭނުންކުރުމުގެ ހުއްދަ ދީފައިވާއިރު އެގައުމުގައި ކޮވިޑް-19 ޖެހިގެން ހޯމަ ދުވަހު އިތުރު 1،920 އައު ކޭސް ވަނީ ރިޕޯޓު ކޮށްފައެވެ. މީގެ އިތުރުން 46 މީހަކު މި ބަލީގައި ހޯމަ ދުވަހު މަރުވެފައިވެއެވެ.

ކޮވިޑް-19 ދުނިޔޭގައި ހަލުވިކަމާއެކު ފެތުރެމުން ދާއިރު މުޅި ދުނިޔެއިން ކޮވިޑް-19ށް ޕޮޒިޓިވްވި މީހުންގެ އަދަދު 95 މިލިއަނަށް ވުރެ މައްޗަށް ވަނީ އަރާފައެވެ.

އެގޮތުން ކޮވިޑް-19 ކޮންޓްރޯލް ކުރުމަށް ގިނަ ފިޔަވަޅުތަކެއް އެކިއެކި ގައުމުން އަޅަމުން ދާއިރު ބައެއް ގައުމުތަކުން މިހާރު ވަނީ ކޮވިޑް-19 ވެކްސިންޖެހުމުގެ މަސައްކަތް ފަށާފައެވެ.