އިތުރު 48 މީހަކު ޕޮޒިޓިވްވެ ސިއްހީ މާހިރުންގެ ކަންބޮޑުވުން އިތުރުވަނީ!

ރާއްޖެއިން އިތުރު 48 މީހަކު ކޮވިޑް-19 އަށް ޕޮޒިޓިވްވެއްޖެއެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނީ ބުދަ ދުވަހުގެ އިރުއޮއްސި 6:00ން ބުރާސްފަތި ދުވަހުގެ އިރުއޮއްސި 6:00ށް އިތުރު 48 މީހަކު ޕޮޒިޓިވްވެފައިވާ ކަމަށެވެ. އަދި 25 މީހަކު ބަލިން ރަނގަޅު ވެފައިވެއެވެ.

Advertisement

ފާއިތުވި 24 ގަޑިއިރުގެ ތެރޭގައި 3314 ސާމްޕަލްއެއް ނަގާފައިވާއިރު 19 މީހަކު މާލެސިޓީން ޕޮޒިޓިވްވެފައިވެއެވެ. އަތޮޅުތެރޭގެ ރަށްރަށުން 15 މީހަކު ހިންގަމުންދާ ރިސޯޓުތަކުން 14 މީހަކު ޕޮޒިޓިވްވެފައިވެއެވެ.

806 އެކްޓިވް ކޭސް ހިމެނޭއިރު، 58 މީހަކަށް ހޮސްޕިޓަލްގައި ފަރުވާ ދެމުންދާ ކަަމަށް އެޗްޕީއޭއިން ބުނެއެވެ.

މިހާތަނަށް ރާއްޖެއިން 14،325 މީހުން ކޮވިޑަށް ޕޮޒިޓިވްވެފައިވާއިރު، 13،463 މީހުން ވަނީ ބަލިން ރަނގަޅުވެފައެވެ. އަދި ބަލީގައި 49 މީހަކު މަރުވެފައިވެއެވެ.

ކޮވިޑް-19ގެ ކޭސްތައް މަދުވުމާއި ގުޅިގެން ބޮޑެތި ތުއިތަކެއް މިއަހަރު ފެށުނު ހިސާބުން ފެށިގެންވަނީ ދީފައެވެ. ނަމަވެސް މިހަފްތާ ތެރޭގައި ކޭސްތައް ވަނީ އިތުރުވާން ފަށާފައެވެ. ރާއްޖޭގެ ހާލަތާއި ބެހޭ ގޮތުން ކަންބޮޑުވުން ފާޅުކުރައްވާ ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ) ތަރުޖަމާނު ޑރ. ނަޒްލާ ރަފީގު ވިދާޅުވީ މިހާރު ފެންނަމުންދާ މަންޒަރުން ކަންބޮޑުވާ ކަމަށާއި، ކޭސްތައް މަދުވާއިރަށް މާސްކް އަޅާ މީހުން މަދުވުމާއި ގައިދުރުކަން ބަހައްޓަން ޖެހޭކަން ހަނދާންނެތޭ މީހުން ގިނަ ކަމަށެވެ. އަދި އެކިއެކި ޚިދުމަތްތައްދޭ ފިހާރަތަކާއި، ކެފޭ އަދި ރެސްޓައުރެންޓް ފަދަ ތަންތަނަށް އެކަށީގެންވާ އަދަދަށްވުރެ އިތުރަށް މީހުން ވަދެ ފުނިގެންޖެހިގެން ޚިދުމަތް ހޯދާ މަންޒަރު ވަރަށް ގިނައިން ފެންނަމުންދާ ކަމަށެވެ.

ޑރ.ނަޒްލާ ވިދާޅުވީ އާންމު ހާލަތަށް ދިރިއުޅުން ގެންދެވޭނީ ވެކްސިން އާބާދީގެ ބޮޑު ބަޔަކަށް ދެވި އޭގެ ސަބަބުން ރައްކާތެރިކަމެއް ލިބޭ ހިސާބުން ކަމަށެވެ. ވެކްސިން ލިބެންދެން ބަލި އިތުރަށް ފެތުރަނަށް ނުދިނުމަށްޓަކައި ކުރަން ޖެހޭ ހުރިހާ މަސައްކަތްތަކެއް ކުރަން ޖެހޭ ކަމަށް ޑރ. ނަޒްލާ ވިދާޅުވިއެވެ. އަދި މިހާރު ދެވިފައިވާ ލުއިތަކާއެކު ކުރިއަށް ދިއުމަށް އާއްމު ރައްޔިތުންގެ ފުރިހަމަ އެއްބާރުލުން ވަރަށް ބޮޑަށް ބޭނުންވާ ކަމަށް ޑރ.ނަޒްލާ ވިދާޅުވިއެވެ.