ބުރާސްފަތި 21 ޖެނުއަރީ 2021
3 ހުވަން
1442 ޖުމާދުލް އާހިރަތު 07
ފަތިސް 05:03
އިރުއަރާ 06:18
މެންދުރު 12:21
އަސްރު 15:41
އިރުއޮއްސޭ 18:17
އިޝާ 19:32
އިނގިރޭސި ޕްރިމިއާ ލީގު

ބާންލީ ބަލިކޮށް ޔުނައިޓެޑް އެއްވަނައަށް

  • ބާންލީ އަތުން ޔުނައިޓެޑް މޮޅުވީ 1-0 ގެ ނަތީޖާއަކުން
  • ތާވަލުގެ އެއްވަނައަށް ޔުނައިޓެޑް ޖެހިލީ 36 ޕޮއިންޓާއެކު

ކ. މާލެ | 13 ޖެނުއަރީ 2021 | ބުދަ 13:37 | 1,718

ބާންލީ އާއި ޔުނައިޓެޑް ބައްދަލުކުރި މެޗުގެ ތެރެއިން: މި މެޗުން ޔުނައިޓެޑް މޮޅުވީ 1-0 ން - ގެޓީ އިމޭޖާސް

އިނގިރޭސި ޕްރިމިއާ ލީގުގައި އަންގާރަ ދުވަހުގެރޭ ބާންލީ ބަލިކޮށް މެންޗެސްޓާ ޔުނައިޓެޑުން ތާވަލުގެ އެއްވަނައަށް ޖެހިލައިފިއެވެ.

ބާންލީގެ ދަނޑުގައި ކުޅުނު މި މެޗުން ޔުނައިޓެޑް މޮޅުވީ 1-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ޔުނައިޓެޑުގެ ކެޕްޓަން ހެރީ މެގުއާ ގޯބޮލުން ލަނޑެއް ޖެހި ނަމަވެސް، އޭނާ އެ ބޯޅަ ގޯލަށް ފޮނުވާލުމުގެ ކުރިން ބާންލީގެ އެރިކް ޕިއެޓާސްއަށް ފައުލުކުރިކަމަށް ބަލައި ރެފުރީ ވަނީ އެ ލަނޑު ބަލައި ނުގަންނަށް ނިންމާފައެވެ. އަދި މި ހާފުގައި ލީޑު ނަގަން ޔުނައިޓެޑުގެ ފޯވާޑް އެންތަނީ މާޝިއަލް އަށް ވަނީ ދެ ފުރުސަތެއް ލިބި ބޭކާރުވެފައެވެ.

މުޅި މެޗު ޔުނައިޓެޑުން ކޮންޓްރޯލް ކޮށްގެން ކުޅުނުއިރު، މެޗުގައި އެ ޓީމުން ލީޑު ނަގާފައި ވަނީ 71 ވަނަ މިނެޓުގައެވެ. މާކަސް ރަޝްފޯޑް ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު ޕައުލް ޕޮގްބާއެވެ. އަދި އޭގެ ފަހުން ލީޑު ފުޅާކުރަން ޔުނައިޓެޑުގެ މާޝިއަލަށް ވަނީ ރަނގަޅު ފުރުސަތެއް ލިބި ބޭކާރުވެފައެވެ.

މި މެޗުގައި ލަނޑެއް ޖަހަން ބާންލީއަށް އެނެމް ހުސް ފުރުސަތުތަކެއް ލިބުނީ އެ ޓީމުގެ ޖޭމްސް ޓާކޯސްކީގެ އިތުރުން ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން އެރި މަޓޭއި ވިޑްރާއަށެވެ. އެކަމަކު ވިޑްރާ ފޮނުވާލި ދެ ބޯޅަވެސް ގޯލާ އަމާޒުނުވެ ދިޔައިރު، ޓާކޯސްކީއަަށް ލިބުނު ފުރުސަތު އޭނާއަށް ބޭނުން ހިފިފައެއް ނުވެއެވެ.

މި މޮޅާއެކު ޔުނައިޓެޑް އެއްވަނައަށް ޖެހިލީ ކުޅުނު 17 މެޗުން ލިބުނު 36 ޕޮއިންޓާއެކުއެވެ. ދެވަނައިގައި އޮތް އެންމެ ފަހުގެ ޗެމްޕިއަން ލިވަޕޫލަށް 17 މެޗުން ލިބިފައިވަނީ 33 ޕޮއިންޓެވެ. މިއީ 2013 ވަނަ އަހަރު ޔުނައިޓެޑުން ސާ އެލެކްސް ފާގަސަންގެ އިރުޝާދުގެ ދަށުން ޕްރިމިއާ ލިގު ކާމިޔާބުކުރި ސީޒަނަށްފަހު، އެ ޓީމުން ލީގުގެ 17 މެޗު ނިމުނުއިރު އެއްވަނައިގައި އޮތް ފުރަތަމަ ފަހަރެވެ.

އެންމެ ފަހުން އަޕްޑޭޓް ކުރީ: 7 ދުވަަސް ކުރިން | ރިވިއު ކުރީ: ހުސައިން ފަރިޔާޒް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.