ދެއްވަދޫ އިން އިތުރު ނުވަ ކޭސް، ރަށުގައި ކޮވިޑް-19 ފެތުރުމުގެ ބިރު!
10 ޖެނުއަރީ 2021 | އާދީއްތަ 10:34ލ. ފޮނަދޫ އިން ވެސް އެ ރަށާ ގުޅުން ހުރި ހަތަރު ކޭސް ފެނިފައިވޭ
ގއ. ދެއްވަދޫ - އެރަށުން ޖުމްލަ 19 މީހަކު ވަނީ ޕޮޒިޓިވްވެފައި
ގއ ދެއްވަދޫ އިން ކޮވިޑް-19 ގެ އިތުރު 9 ކޭސް ފެނި އެ ރަށުން ފެނުނު ކޭސްތަކުގެ އަދަދު 19 އަށް އަރައިފި އެވެ.
ދެއްވަދޫ ކައުންސިލްގެ ނައިބު ރައީސް އިބްރާހިމް ތައުފީގް ރާއްޖެ އެމްވީ އަށް ވިދާޅުވީ އެރަށުން ކޮވިޑް-19ށް 9 މީހަކު ޕޮޒިޓިވްވެފައި ވަނީ މިހާރު ރަށުގައި ކޭސްތައް ފެތުރިފައިވާ ވަރު ބެލުމަށް ނެގި ރެންޑަމް ސާމްޕަލްތަކާއި ކޮންޓެކްޓުންގެ ތެރެއިން ކަމަށެވެ.
އެރަށުން އެންމެ ފުރަތަމަ ކޮވިޑް-19 ކޭސް ފެނުނީ މިދިޔަ މަހުގެ 24 ވަނަ ދުވަހު އެވެ. އެރަށަށް ގޮސް ކަރަންޓީނުގައި ތިބި އާއިލާއއަކުން ޕޮޒިޓިވްވީ ހަތަރު މަހުގެ ކުޑަ ކުއްޖެކެވެ.
އެ އާއިލާގެ ސާމްޕަލްތައް ނަގައި އެންމެ ފުރަތަމަ ނަތީޖާ ދިން އިރު އާއިލާގެ އެންމެން ވެސް ނެގެޓިވް އެވެ. ނަމަވެސް ފަހުން ކުއްޖާ ޕޮޒިޓިވްކަން އެންގި އިރު އެކި މީހުން ވަނީ ކުއްޖާއާ ބައްދަލުކޮށް އުރާ ގެންގުޅެފައެވެ. އެ އާއިލާއިން ޕޮޒިޓިވްވީ ހަތަރު މަހުގެ ކުޑަ ކުއްޖާ އެކަންޏެވެ. ކުއްޖާގެ ނަތީޖާއާ ގުޅިގެން އާއިލާއިން ސުވާލު ވެސް އުފައްދައެވެ.
އެ ކޭސްއާ ގުޅިގެން ކުރި ޓެސްޓުން އެކަކު ޕޮޒިޓިވްވި އިރު އެމީހާގެ އާއިލާއިން ވެސް އިތުރު ހަތް މީހަކު ޕޮޒިޓިވްވެފައިވެއެވެ. އޭގެ ފަހުން ވެސް އެރަށުން ނެގި ރެންޑަމް ސާމްޕަލްތަކުން އިތުރު ދެ މިހަކު ޕޮޒިޓިވްވެފައިވާއިރު އެ ރަށުން ފުރައިގެން ލ. ފޮނަދޫ އަށް ދިޔަ ހަތަރު މީހަކު ވެސް ޕޮޒިޓިވްވެފައިވެއެވެ. އެ ކޭސްތަކާ ގުޅިގެން ލ. ފޮނަދުއާއި ގަން އަދި ދެއްވަދޫ ވެސް އޮތީ މޮނިޓަރިން ހާލަތުގައެވެ.
ދެއްވަދޫ އިން ފެނުނު ކޭސްތަކާ ގުޅިޅިގެން މިދިޔަ ނޮވެމްބަރު މަހުގެ 30 ވަނަ ދުވަހުގެ ފަހުން އެރަށަށް ދިޔަ އަދި ޑިސެމްބަރު 25 ގެ ފަހުން އެރަށުން އެހެން ރަށަކަށް ދިޔަ އެންމެން ވެސް ކަރަންޓީން ވެ ކޮވިޑް-19 އަށް ޓެސްޓު ކުރުމަށް މިހާރު ވަނީ އަންގާފަ އެވެ.
