ގއ.ދެއްވަދޫ އާބާދީގެ 80 އިންސައްތަ ރައްޔިތުން ޗުއްޓީ ދުވަސްވަރާ ދިމާކޮށް ރަށަށް ދިޔަ ކަމަށް އެރަށު ކައުންސިލުން ބުނެފިއެވެ.
ކޮވިޑް-19ގެ ކޭސްތަކެއް ފެނުމާއި ގުޅިގެން އެރަށް އޮތީ މޮނިޓަރިންގެ ހާލަތަށް ގެނެސްފައެވެ. ފުރަބަންދު ކޭސްއެއް މިދިޔަ މަހުގެ 24 ވަނަ ދުވަހު ޕޮޒިޓިވްވެފައި ވަނީ ކަރަންޓީންގައި ތިބި މީހުންނަށް ނުބައި މައުލޫމާތެއް ދެވިގެން ރިލީސްކުރެވިގެންނެވެ. މިހާރު އެރަށުން 10 މީހަކު ކޮވިޑަށް ވަނީ ޕޮޒިޓިވްވެފައެވެ.
އެރަށުގެ ހާލަތާއި ބެހޭ ގޮތުން ރާއްޖެއެމްވީއަށް މައުލޫމާތު ދެއްވަމުން ކައުންސިލް މެމްބަރު އަހުމަދު ނަޖްމީން ވިދާޅުވީ ކޮންޓެކްޓުންގެ ޓްރޭސިންގެ މަސައްކަތްތައް ކުރަމުންދާ ކަމަށެވެ. އަދި މިހާރު 200 ސާމްޕަލް ނަގާފައިވާ ކަމަށް ނަޖްމީން ވިދާޅުވިއެވެ.
ނަޖްމީން ވިދާޅުވީ މިމަސައްކަތުގައި ރަށުގެ ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބޭ ކަމަށާއި، ކަނޑައަޅާފައިވާ ގައިޑްލައިންތަކާއި އެއްގޮތަށް ގިނަ ރައްޔިތުން އަމަލުކުރަމުންދާ ކަމަށެވެ.
މީގެ އިތުރުން ނަޖުމީން ވިދާޅުވީ ޗުއްޓީ ދުވަސްވަރާ ދިމާކޮށް ރަށުގެ ގިނަ އަދަދެއް ބަޔަކު ރަށަށް ދިޔަ ކަމަށެވެ. އެގޮތުން އާބާދީގެ 80 އިންސައްތަ ރަށަށް ދިޔަކަން އޭނާ ފާހަގަކުރެއްވިއެވެ. އަދި ރަށް މޮނީޓަރިންގެ ހާލަތަށް ގެނައުމާއި ގުޅިގެން މާލެ އަންނަން ޖެހޭ ގިނަ ބަޔަކަށް ނާދެވިފައި ތިބި ކަމަށް ނަޖުމީން ވިދާޅުވިއެވެ.
ގާތްގަނޑަކަށް 1380 އެއްހާ އާބާދީއެއް އޮންނަ ދެއްވަދޫގެ ގިނަ ބަޔަކު ތަފާތު އެކިސަބަބުތަކާއި ހުރެ ދިރިއުޅެމުން ދަނީ ރަށުން ބޭރުގައެވެ. ދަރިންނަށް މަތީ ތައުލީމުގެ ފުރުސަތުތައް ހޯދައިދިނުމަށާއި، ވަޒީފާގެ ފުރުސަތުތައް ނެތުމުން މާލޭގެ އިތުރުން ރިސޯޓުތަކުގައި ގިނަ ޒުވާނުން މަސައްކަތް ކުރަމުންދެއެވެ.
