ކޮވިޑް-19 އާއި ގުޅިގެން ދިވެހިރާއްޖެއަށް އިންޕޯޓްކުރާ ކާބޯތަކެތި ދޫކުރުމުގައި އަމަލުކުރާނެ ގޮތުގެ އުސޫލަށް ބަދަލު ގެނެސްފިއެވެ.

ހެލްތް މިނިސްޓްރީން ބުނީ ކޮވިޑް-19 އާއި ގުޅިގެން ކާބޯތަކެތި އިންޕޯޓުކުރުމުގައި ދިމާވާ ދަތިތައް ހައްލުކޮށް، ކާބޯތަކެތީގެ ރައްކާތެރިކަން ކަށަވަރުކޮށް، ކާބޯތަކެތި އެތެރެކުރާ ފަރާތްތަކަށް ލުއިދިނުމަށް އެކުލަވާލައިފައިވާ އުސޫލަށް ބަދަލުގެ ގެނެސްފައިވާ ކަމަށެވެ.

އެގޮތުން އިންޕޯޓްކުރާ ކާބޯތަކެއްޗަށް ހެލްތު ކްލިއަރަންސް ދޫކުރާނީ އޮރިޖިނަލް ހެލްތު ސެޓްފިކެޓު އިންވޮއިސްއާއި އެކު ހުށަހެޅުމުން ކަމަށާއި، އޮންލައިންކޮށް ވެރިފައި ކުރެވޭ ސެޓްފިކެޓް ވެރިފައިކުރުމަށްފަހު އިގުރާރު ކުރުމަކާއި ނުލާ ދޫކުރާނެ ކަމަށް ހެލްތް މިނިސްޓްރީން ބުނެއެވެ.

އެމިނިސްޓްރީން ބުނީ ހެލްތު ސެޓްފިކެޓް ދޫކުރާ ގައުމެއްގެ ކޮންޕިޓެންޓް އޮތޯރިޓީއަކުން އެއޮތޯރިޓީއަށް އިލެކްޓްރޯނިކް މެއިލް މެދުވެރިކޮށް ހުށަހަޅާ ހެލްތު ސެޓްފިކެޓް ވެރިފައިކުރުމަށްފަހު އިގުރާރު ކުރުމަކާއި ނުލާ ދޫކުރާނެ ކަމަށެވެ.

މީގެ އިތުރުން ހެލްތް މިނިސްޓްރީން ބުނީ ދިވެހިރާއްޖެ އެތެރެކުރާ ކާބޯތަކެތި ލޭބަލް ކުރުމުގެ ގައުމީ މިންގަނޑު "ބަންދުކުރި ކާބޯތަކެތި ލޭބަލް ކުރުމުގެ ގައުމީ މިންގަނޑު" ގައިވާ ޝަރުތުތައް ފުރިހަމަވާން ޖެހޭ ކަމަށެވެ.

ހެލްތް މިނިސްޓްރީން ބުނީ 01 ފެބްރުއަރީ 2021ން ފެށިގެން އިންޕޯޓްކުރާ ކާބޯތަކެއްޗަށް ހެލްތު ކްލިއަރަންސް ދެވޭނީ އެހުރިހާ ކަމެއް ފުރިހަމަ ވުމުން ކަމަށެވެ.