ބިދޭސީން ގެންނަން ދޫކުރާ ހުއްދަތަކުގެ ތެރެއިން މައުލޫމާތު ފުރިހަމަ ނުވެ އޮއްވާ ނޮޓަރައިޒް ކޮށްފައި ހުންނަ ލިޔެކިއުންތައް ބަލައެއް ނުގަންނާނަން: އިކޮނޮމިކް މިނިސްޓްރީ
6 ޖެނުއަރީ 2021 | ބުދަ 16:16ނޮޓަރައިޒް ކުރުމުގެ ބޭނުމާއި މަގުސަދު ގެއްލޭގޮތަށް ބައެއް ފަރާތްތަކުން ލިޔުންތައް ހުށަހަޅާ
ބިދޭސީންތަކެއް މަސައްކަތުގައި - މައުލޫމާތު ފުރިހަމަނުކޮށް ހުންނަ ލިޔުން ނޮޓަރައިޒް ކޮށްފައި ހުންނަ ކަމަށް މިނިސްޓްރީން ބުނޭ
ބިދޭސީން ގެންނަން ދޫކުރާ ހުއްދަތަކުގެ ތެރެއިން މައުލޫމާތު ފުރިހަމަ ނުވެ އޮއްވާ ނޮޓަރައިޒް ކޮށްފައި ހުންނަ ލިޔެކިއުންތައް ބަލައި ނުގަންނާނެ ކަމަށް އިކޮނޮމިކް މިނިސްޓްރީ ބުނެފިއެވެ.
އިކޮނޮމިކް މިނިސްޓްރީން ބުނީ ރާއްޖޭގައި މަސައްކަތް ކުރުމަށް ބިދޭސީން ގެންނަން އެ މިނިސްޓްރީން ދެމުންގެންދާ ޚިދުމަތްތަކާ ގުޅިގެން ހުށަހަޅަން ޖެހޭ ލިޔެކިޔުންތަކުގެ ތެރޭގައި، ކޯޓުގައި ރަޖިސްޓްރީކޮށް ނުވަތަ ނޮޓަރައިޒް ކުރުމަށްފަހު ހުށަހަޅަންޖެހޭ ލިޔުންތަކެއް ހިމެނޭ ކަމަށެވެ.
އަދ އެފަދަ ލިޔުން ހުށަހެޅުމުގައި ނޮޓަރައިޒް ކުރުމުގެ ބޭނުމާއި މަގުސަދު ގެއްލޭގޮތަށް ހުންނަ ލިޔެކިޔުން ނޮޓަރައިޒް ކޮށް، ބައެއް ފަރާތްތަކުން ހުށަހަޅަމުން ގެންދާ ކަމަށާއި، މައުލޫމާތު ފުރިހަމަނުކޮށް ހުންނަ ލިޔުން ނޮޓަރައިޒް ކޮށްފައި ހުންނަކަންވެސް ފާހަގަކުރެވޭ ކަމަށް މިނިސްޓްރީން ވަނީ ބުނެފައެވެ.
މީގެ އިތުރަށް އިކޮނޮމިކް މިނިސްޓްރީން ބުނީ ނޮޓަރައިޒް ކޮށްފައިވާ ލިޔުމުގައި ހިމެނޭ މައުލޫމާތު ބަދަލުކުރުމަށްފަހު ހުށަހަޅަމުންދާކަން ފާހަގަކުރެވިފައިވާ ކަމަށާއި، އެހެންކަމުން އެފަދަ ލިޔުން ހުށަހަޅާ ފަރާތްތަކާމެދު ގަވާއިދުން ފިޔަވަޅު އެޅުމާއެކު، އެފަދަ ލިޔުން ނޮޓަރައިޒް ކޮށްދޭ ފަރާތްތަކުން ނޮޓަރައިޒް ކޮށްދީފައި ހުންނަ ލިޔުން ބަލައިނުގަންނާނެ ކަމަށެވެ. އަދި ސައްހަ ނޫން މައުލޫމާތު ހިމެނޭ ލިޔުމާއި، މައުލޫމާތު ފުރިހަމަ ނުވެ އޮއްވާ ނޮޓަރައިޒް ކޮށްފައި ހުންނަ ލިޔެކިޔުން، އަދި ނޮޓަރައިޒް ކުރުމަށްފަހު ބަދަލުގެންނަ ލިޔުންތައް މިނިސްޓްރީން ބަލައި ނުގަންނާނެ ކަމަށްވެސް ވަނީ ބުނެފައެވެ.
