އަސްކަރީ މުއާމަލާތްތަކުގެ މައްސަލަ: ކުރީގެ ޑިފެންސް މިނިސްޓަރާއި އިބްރާހީމް ދީދީއާ ދެމެދު ޤާނޫނީ ބަހުސެއް
5 ޖެނުއަރީ 2021 | އަންގާރަ 23:41ބޭރު ގައުމުތަކާއެކު ރާއްޖެއިން އަސްކަރީ މުއާމަލާތްތައް ހިންގަންވާނީ ޤާނޫނު އަސާސީގައިވާ ގޮތުގެ މަތިން ކަމަށް އާދަމް ޝަރީފް ވިދާޅުވި
ހިތަދޫ މެދު ދާއިރާގެ ކުރީގެ މެމްބަރ އިބްރާހީމް ދީދީ އަދި މަޑުއްވަރީ ދާއިރާގެ މެމްބަރ އާދަމް ޝަރީފް
ބޭރުގެ ގައުމުތަކާއެކު އަސްކަރީ ހަރަކާތްތަކާއި އެއްބަސްވުންތައް ހަދާ ހިންގަމުންދާއިރު އެކަން ހިނގަނީ ޤާނޫނުގެ ތެރެއިންތޯ ކުރީގެ ޑިފެންސް މިނިސްޓަރު އަދި މިހާރުގެ މަޑުއްވަރީ ދާއިރާގެ ރައްޔިތުންގެ މަޖިލީހުގެ މެމްބަރ އާދަމް ޝަރީފު އާއި ރައްޔިތުންގެ މަޖިލީހުގެ ހިތަދޫ މެދު ދާއިރާގެ ކުރީގެ މެމްބަރ ބްރިގޭޑިޔާ ޖެނެރަލް ރިޓަޔާޑު އިބްރާހިމް މުހައްމަދު ދީދީ އާ ދެމެދު ބަހުގެ ހަމަލާތަކެއް ބަދަލުކުރައްވައިފިއެވެ.
މަޑުއްވަރީ ދާއިރާގެ މެމްބަރ އާދަމް ޝަރީފް ކުރެއްވި ޓްވީޓެއްގައި ވިދާޅުވީ ބޭރުގެ ގައުމުތަކާއެކު އަސްކަރީ ހަރަކާތްތަކާއި އެއްބަސްވުންތައް ހަދާ ދިވެހި ފަސްގަނޑުގައި އެމީހުންނާއެކު ތަމްރީނުތައް ބާއްވާއިރު އެކަމުގެ ފުރިހަމަ މައުލޫމާތު ހިއްސާ ކުރެވެންޖެހޭނެކަމަށެވެ. އެއީ އެމެރިކާ، އިންޑިޔާ ނުވަތަ ޗައިނާ ވިޔަސް އެކަން އެގޮތަށް ކުރަން ޖެހޭނެކަމަށް އާދަމް ޝަރީފް ވިދާޅުިއެވެ. އަދި ބޭރު ގައުމުތަކާއެކު ރާއްޖެއިން އަސްކަރީ މުއާމަލާތްތައް ހިންގަންވާނީ ޤާނޫނު އަސާސީގައިވާ ގޮތުގެ މަތިން ކަމަށް އާދަމް ޝަރީފް ވިދާޅުވިއެވެ.
މީގެއިތުރުން އިސްލާމީ ދީނާއި ދިވެހިރާއްޖޭގެ މިނިވަންކަމާއި ސިޔާދަތު ރައްކާތެރިކުރުމާއި އިންޑިޔާ ކަނޑުގެ ހަމަޖެހުން ގާއިމުކުރުމުގައި ދިވެހިންގެ ދައުރު ފުރިހަމައަށް އަދާކުރެވޭނެ ގޮތަކަށް ކަމަށެވެ. މިހާރު ސަރުކާރުން ހިންގަމުންދާ އަސްކަރީ މުއާމަލާތްތަކުގައި މިކަންކަން ކަށަވަރު ކުރޭތޯ ވަނީ ސުވާލު އުފައްދަވާފައެވެ.
އާދަމް ޝަރީފުގެ މިޓްވީޓަށް ޖަވާބު ދެއްވަމުން ކުރީގެ މެމްބަރ އިބްރާހީމް ދީދީ ވިދާޅުވީ ބޭރު ގައުމެއްގެ އަސްކަރީ މަރުކަޒެއް ރާއްޖޭގައި ހިންގުމަށް މުޅި މަޖިލީހުގެ އިއްތިފާގު ބޭނުންވާނެކަމަށް ޤާނޫނު އަސާސީގައިވާ ކަމަށެވެ.
ޤާނޫނު އަސާސީގެ 251 ވަނަ މާއްދާގެ ނ ގައި ބުނެފައިވަނީ ރައްޔިތުންގެ މަޖިލީހުގެ ޖުމްލަ މެމްބަރުންގެ އަޣްލަބިއްޔަތުން ފާސްވެގެން މެނުވީ ރާއްޖެއިން ބޭރުގެ ފަރާތްތަކަށް ރާއްޖޭގެ ސަރަހައްދުގެ އެއްވެސް ބައެއް އަސްކަރީ ބޭނުމަކަށް ދީގެންނުވާނެ ކަމަށެވެ.
މިކަމަށް ޖަވާބު ދެއްވަމުން އާދަމް ޝަރީފް ވިދާޅުވީ ޤާނޫނު އަސާސީގައި ބަޔާންވެގެން ވަނީ އެހެން ނޫންކަމަށެވެ.
އެކަމަށް ޖަވާބު ދެއްވަމުން އިބްރާހީމް ދީދީ ވަނީ ޤާނޫނު އަސާސީގެ 115 ވަނަ މާއްދާގައިވާ ރައީސުލްޖުމްހޫރިއްޔާގެ ބާރުތަކާއި މަސްއޫލިއްޔަތުތަކާއި ގުޅޭ މާއްދާ ހިއްސާކުރައްވާފައެވެ.
އެމާއްދާގެ ފ ގެ 1 ގައި ބުނަނީ ބޭރު ޤައުމުތަކާއި ބައިނަލްއަގްވާމީ ޖަމިއްޔާތަކާއެކު ރާއްޖެއިންވާ މުއާހަދާތަކާއި އެއްބަސްވުންތަކުގެ ތެރެއިން ރައްޔިތުން އެއްވެސް އިލްތިމާޒެއް އުފުލާން ނުޖެހޭބާވަތުގެ އާންމު އެއްބަސްވުންތަކުގައި ސޮއިކުރުމެވެ.
ރާއްޖޭގައި އަސްކަރީ ބޭސް އެއް އޮންނަކަމަށާއި މިސަރުކާރުން ބޭރުގެ ފަރާތްތަކާއި ގުޅިގެން އަސްކަރީ ހަރަކާތްތަކެއް ބާއްވަމުން އަންނަކަމަށް އިދިކޮޅު ފަރާތްތަކުން އަންނަނީ ތަކުރާރުކޮށް ތުހުމަތުކުރަމުންނެވެ. އެކަމާއި ގުޅިގެން ހަދާފައިވާ އެއްބަސްވުންތައް ހާމަކުރުމަށްވެސް ވަނީ ގޮވާލާފައެވެ.
