އިތުރު 33 މީހަކު ޕޮޒިޓިވްވެ، 25 މީހަކު ބަލިން ރަނގަޅުވެއްޖެ
3 ޖެނުއަރީ 2021 | އާދީއްތަ 17:2231 މީހަކަށް މިހާރު ހޮސްޕިޓަލުގައި ދަނީ ފަރުވާ ދެމުން
މަޖީދީމަގު- ކޭސްތައް މަދުވި ނަމަވެސް ރައްކާތެރިވުމުގެ ފިޔަވަޅުތަކަށް ސަމާލުވުމަށް އިލްތިމާސްކޮށްފައިވޭ
އިތުރު 33 މީހަކު އާދިއްތަ ދުވަހު ކޮވިޑް-19 އަށް ޕޮޒިޓިވްވެ، 25 މީހަކު ބަލިން ރަނގަޅުވެއްޖެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނީ ހޮނިހިރު ދުވަހުގެ އިރުއޮއްސި 6:00ން އާދިއްތަ ދުވަހުގެ އިރުއޮއްސި 6:00ށް 1،734 ސާމްޕަލެއް ނަގާފައިވާ ކަމަށެވެ. އޭގެ ތެރެއިން ޕޮޒިޓިވް ވެފައިވަނީ 33 މީހަކު ކަމަށްވެސް ވަނީ ބުނެފައެވެ.
އެއީ މާލެ ސަރަހައްދުން 24 މީހަކާއި، ރިސޯޓުތަކުން ހަ މީހަކާއި، އަތޮޅުތެރޭގެ ރަށަކުން އެކަކު އަދި އިންޑަސްޓްރިއަލް މަސައްކަތްތައް ކުރާ ރަށަކުން އެކަކު ޕޮޒިޓިވްވެފައިވާ ކަމަށްވެސް އެޗްޕީއޭއިން ބުނެއެވެ.
އެޗްޕީއޭއިން ބުނީ 31 މީހަކަށް މިހާރު ހޮސްޕިޓަލުގައި ފަރުވާ ދެމުންދާ ކަމަށާއި، މި ވަގުތަށް ރާއްޖޭގައި 621 އެކްޓިވް ކޭސް ހިމެނޭ ކަމަށެވެ.
ކޮވިޑް-19ށް ރާއްޖެއިން މިހާތަނަށް ޖުމްލަ 13،867 މީހަކު ޕޮޒިޓިވް ވެފައިވާއިރު، 13،191 މީހުން ވަނީ ބަލިން ރަނގަޅުވެފައެވެ. އަދި މިހާތަނަށް ބަލީގައި 48 މީހަކު ވަނީ ނިޔާވެފައެވެ.
ކޮވިޑް-19 ގެ ކޭސްތައް މަދުވުމާއި ގުޅިގެން ރައްކާތެރިވުމަށް އަޅާފައިވާ ފިޔަވަޅުތަކަށް ސަރުކާރުން އަންނަނީ ބޮޑެތި ލުއިތަކެއް ދެމުންނެއެވެ. ނަމަވެސް ބަލި ކުއްލިއަކަށް ފެތުރިގެން ހިނގައިދާނެކަމުގެ ބިރު އޮތުމުގެ އިތުރުން ބޭރުގެ ގައުމުތަކުން އައު ވޭރިއެންޓެއް ފެނިފައިވާތީ ލުއިތައް ދިން ނަމަވެސް، އެކުލަވާލާފައިވާ އުސޫލުތަކާ އެއްގޮތަށް އަމަލުކުރުމަށާއި، ހާއްސަކޮށް މާސްކް އެޅުމާއި، އިޖުތިމާއީ ގައިދުރުކަމަށް ހާއްސަ ސަމާލުކަމެއް ދިނުމަށް ހެލްތު އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) ން ވަނީ އިލްތިމާސްކޮށްފައެވެ.
