އޮސްޓްރިއާ ސަރުކާރުން ހުޅުވާލައިފައިވާ ސްކޮލަރޝިޕްތަކަށް ކުރިމަތިލުމުގެ ފުރުސަތު ހުޅުވާލައިފިއެވެ.
ހަޔަރ އެޑިޔުކޭޝަން މިނިސްޓްރީން ބުނީ 2021/2022 ވަނަ އަހަރަށް އޮސްޓްރިއާ ސަރުކާރުން ހުޅުވާލައިފައިވާ ސްކޮލަރޝިޕް ފުރުސަތުތަކުގައި ދިވެހިރާއްޖޭގެ ދަރިވަރުންނަށް ބައިވެރިވުމުގެ ފުރުސަތު އޮތް ކަމަށް އެ ފަރާތުން އަންގާފައިވާ ކަމަށެވެ.
ހަޔަރ އެޑިޔުކޭޝަނުން ބުނީ ކޯސްތަކާ ބެހޭ މައުލޫމާތާއި، ކޯސް ކުރިއަށްގެންދާ ޔުނިވަރސިޓީތަކުގެ މައުލޫމާތުތައް www.grants.at ވެބްސައިޓުން ލިބޭނެ ކަމަށެވެ.
މީގެ އިތުރުން މިކޯސްތަކަށް ހޮވޭ ފަރާތްތަކުން، ކޯހުގައި ބައިވެރިވުމުގެ ކުރިން ކޯސް ހިންގާ އިންސްޓިޓިއުޓަކީ މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ގަބޫލުކުރާ ޔުނިވަރސިޓީއެއްތޯ ބަލަން ޖެހޭ ކަމަށެވެ. އަދި ހޮވިފައިވާ ކޯހަކީ އެމްކިޔުއޭއިން ގަބޫލުކުރާ ކޯހެއްތޯ ކަށަވަރު ކުރުމަށްވެސް ވަނީ އިލްތިމާސްކޮށްފައެވެ.
ބޭރުގެ ގައުމުތަކުން ރާއްޖެއަށް ގިނަ ސްކޮލަރޝިޕްގެ ފުރުސަތުތައް ލިބިމުންދާއިރު، މިހާރުވެސް ގިނަ އަދަދެއްގެ ދަރިވަރުން ދަނީ ބޭރުގެ ޔުނިވަރސިޓީތަކުގައި ތައުލީމު ހާސިލުކުރަމުންނެވެ. އަދި ތައުލީމު ހާސިލުކުރުމަށް ލޯނުތަކުގެ އެހީތެރިކަން ބޭނުންވާ ދަރިވަރުންނަށް އެފުރުސަތުތައްވެސް ހަޔަރ އެޑިޔުކޭޝަނުން ދަނީ ފަހިކޮށްދެމުންނެވެ.
