މިދިޔަ އަހަރު އެޓާނީ ޖެނެރަލްގެ އޮފީހުން އެންމެ ގިނަ ލަފާ ދީފައިވަނީ އެއްބަސްވުންތަކުގައި ސޮއިކުރުމާ ގުޅޭ ގޮތުން ކަމަށް ތަފާސްހިސާބުތަކުން ދައްކައިފިއެވެ.

އޭޖީ އޮފީހުން ނެރެފައިވާ ތަފާސްހިސާބުތައް ދައްކާ ގޮތުން ދައުލަތުގެ މުއައްސަސާތަކުން ލަފާ ހޯދުމަށްޓަކައި ޖުމްލަ 842 މައްސަލައެއް ހުށަހަޅާފައިވާއިރު 841 ކަމަކާއި ގުޅޭ ގޮތުން މިދިޔަ އަހަރު ލަފާ ދީފައިވާ ކަމަށެވެ.

އޭގެތެރެއިން ބިލް ތަސްދީގު ކުރުމާއި ގުޅޭ ގޮތުން 34 ލަފާދީފައިވާއިރު އެއްބަސްވުންތަކުގައި ސޮއި ކުރުމާއި ގުޅޭ ގޮތުން 267 ލަފާ ވަނީ ދީފައެވެ. ޤަވާއިދުތަކާއި ގުޅޭ ގޮތުން 102 ލަފާ ދީފައިވާއިރު އުސޫލުތަކާއި ގުޅޭ ގޮތުން 40 ލަފާ ވަނީ ދީފައެވެ. އަދި މުއާހަދާތަކާއި ގުޅޭ ގޮތުން 7 ލަފާ ދީފައިވާއިރު އެހެނިހެން ކަންކަމާއި ގުޅޭ ގޮތުން 391 ލަފާ ވަނީ ދީފައެވެ.

މިދިޔަ އަހަރު އެޓާނީ ޖެނެރަލް އިބްރާހީމް ރިފްއަތު ވިދާޅުވެފައިވަނީ އެއީ ހުރިހާ ގޮތަކުންވެސް ދަތި އުނދަގޫވި ދުވަސްވަރެއް ކަމަށެވެ. އެގޮތުން މަސައްކަތްތައް އައު ގޮތްތަކަކަށް ބައްޓަން ކުރަން ޖެހުނު ކަމަށާއި ޤާނޫނީ ލަފާ ދިނުމާއި މައްސަލަތަކާ ގުޅިގެން މުވައްޒަފުން ކުރި މަސައްކަތަށް ވެސް ތަޢުރީފު ޙައްޤު ކަމަށް ވިދާޅުވިއެވެ.

މިދިޔަ އަހަރު އޭޖީ އޮފީހުން ގިނަ މައްސަލަތަކަށް ލަފާ ދީފައިވާއިރު މިދިޔަ އަހަރު ވަނީ މޯލްޑިވްސް އިންޓަރނޭޝަނަލް އާބިޓްރޭޝަން ސެންޓަރު (އެމްއައިއޭސީ) ޤާއިމުކޮށް ހިދުމަތް ދޭން ފަށާފައެވެ.

އާބިޓްރޭޝަން ސެންޓަރަކީ ރާއްޖޭގައި އާބިޓްރޭޝަން ކުރިއަރުވައި، އެކަމަށް މަގުފަހިކޮށްދިނުމާއި އެކަމާބެހޭ އުސޫލުތައް ކަނޑައަޅާ ސެންޓަރެވެ.