އަނަސްގެ މަރުގެ މައްސަލަ: ޝަރީއަތުގެ އަޑުއެހުމެއް މާދަމާއަށް ތާވަލްކޮށްފި

ރ. މީދޫ ފެންފިޔާޒުގޭ މުޙައްމަދު އަނަސްގެ މަރުގެ މައްސަލައިގެ ޝަރީއަތުގެ އަޑުއެހުމެއް ބުދަ ދުވަހަށް ކްރިމިނަލް ކޯޓުގައި ތާވަލްކޮށްފިއެވެ.

އަނަސްގެ މަރުގެ މައްސަލަ ކްރިމިނަލް ކޯޓުގައި ތާވަލްކޮށްފައިވަނީ ބުދަ ދުވަހުގެ 10:00އަށެވެ.

އެންމެފަހުން އަނަސްގެ މަރުގެ މައްސަލައިގެ އަޑުއެހުމެއް ބާއްވާފައިވަނީ މި ޑިސެމްބަރު މަހުގެ ތިންވަނަ ދުވަހުއެވެ. އެދުވަހުގެ އަޑުއެހުމުގައި ވަނީ ސިއްރު ނޫން ހެކިވެރިންގެ ތެރޭގައި ހިމެނޭ މޫސާ ސިލްވީނުގެ ހެކިބަސް ނަގާފައެވެ. މޫސާ ސިލްވީނަކީ މި މައްސަލައިގައި ސީން އޮފް ކްރައިމް ރިޕޯޓު ތައްޔާރު ކުރެއްވި ފޮރެންސިކް އޮފިސަރެކެވެ.

އެ އަޑުއެހުމުގައި ދައުލަތުން ކުރި ސުވާލުތަކަށް ޖަވާބުދެއްވައި މައްސަލައިގައި ހެކިބަސް ދެއްވަމުން ސިލްވީނު ވިދާޅުވީ، ފުރަތަމަ "ކްރައިމް ސީނަށް" ވަޑައިގެންނެވިއިރު، ލިޓަސް ސާރވިސް ސެންޓަރުގެ ގަރާޖު ތެރޭގައި ގިނަ އަދަދެއްގެ ލޭ ހުރި ކަމަށާއި، އެތަނުގެ ކައިރީގައި ދެ ފައިވާން ކިބައާއި، ތަޅުދަނޑިއެއްގެ އިތުރުން ލޭ ހޭކިފައި އޮތް ރިހި ފަށެއް އޮތް ކަމަށެވެ. އަދި އޭގެ ތެރޭގައި ހިމެނޭ ތަކެތީގެ ތެރެއިން މާއްދީ ހެކިތަކެއް ފެނުނުކަން އޭނާ ފާހަގަ ކުރެއްވިއެވެ.

އޭގެ އިތުރުން ދިފާއީ ވަކީލުވެސް ވަނީ ސީންއަށް ދިޔައިރު ފާހަގަވި ކަންކަމާ ގުޅޭގޮތުން ސުވާލުކޮށްފައެވެ. އެގޮތުން ސީންއަށް ދިއުމަށްޓަކައި ގަރާޖު ތެރެއަށް ވަތް ގޮތާއި، އެތެރޭގައި ހުރި ބިއްލޫރި ދޮރުތަކުން އެތެރެއަށް ވަތް ގޮތާމެދު ދިފާއުން ވަނީ ހެކިވެރިޔާއާ ސުވާލު ކޮށްފައެވެ. އަދި ސީނުން މާއްދީ ހެކި ނަގާފައިވާއިރު، ސީން ރައްކާތެރި ކުރެވިފައި އޮތީ ކިހާ ވަރަކަށްތޯ ދިފާއީ ވަކީލު އާދަމް އާސިފް ސުވާލު ކުރެއްވިއެވެ. އެކަމާ ގުޅޭގޮތުން ސިލްވީން ވިދާޅުވީ، އެ ސަރަޙައްދު ސީދާ ޓޭޕް ދަމައި ކޯރޑަން ކޮށްފައި ނުވި ނަމަވެސް، އެ ތަނުގައި އެވަގުތު ފުލުހުން ޙަރަކާތްތެރި ވަމުން ދިޔަ ކަމަށެވެ.

ސީނުން ނަގާފައިވާ މާއްދީ ހެކިތަކާ ގުޅޭގޮތުންވެސް ދިފާއީ ވަކީލު އާސިފް ސުވާލު ކުރެއްވިއެވެ. އެގޮތުން ނެގުނު މާއްދީ ހެކިތަކުން ދައުވާ ލިބޭ ފަރާތްތަކުގެ ފިންގަރ ޕްރިންޓް ނުވަތަ ޑީއެންއޭ ހުރިތޯ ބެލުމަށް ފޮނުވިތޯ އާސިފް ސުވާލު ކުރެއްވިއެވެ. އެކަމާ ގުޅޭގޮތުން ސިލްވީން ވިދާޅުވީ، މާއްދީ ހެކިތައް ނެގުމަށްފަހު އެތަކެތި ފިންގަރ ޕްރިންޓާއި ޑީއެންއޭ ހޯދުމަށް ފޮނުވި ކަމަށެވެ.

އޭގެ އިތުރުން، ތަޅުދަނޑިފައްޗެއް ފެނުނުކަން ފާހަގަ ކޮށްފައިވާއިރު، އެ ތަޅުދަނޑިފަތި ހޯދީ ކްރައިމް އޮފް ސީން އޮފިސަރެއް ނޫން ކަމަށްވާއިރު، އެކަން ހިނގައިދިޔަ ގޮތާ ގުޅޭގޮތުން އާސިފް ސުވާލުކުރެއްވިއެވެ. އެކަމާ ގުޅޭގޮތުން ސިލްވީން ވިދާޅުވީ، ތަޅުދަނޑިފަތި ނެގީ އެތަނުގައި ހުރި އިންވެސްޓިގޭޓިވް އޮފިސަރ (އައިއޯ) ކަމަށެވެ.

މި މައްސަލައިގައި ސިލްވީންގެ ހެކިބަސް ނަގާ ނިމިފައިވާއިރު، ސިއްރު ނޫން ހުރިހާ ހެކިވެރިންގެ ހެކިބަސްތައް މިހާރު މިވަނީ ނަގާ ނިންމާފައެވެ. އެގޮތުން މި މައްސަލައިގައި މީގެ ކުރިން ވަނީ ސިއްރު ނޫން 3 ހެކިވެރިއެއްގެ ހެކިބަސް ނަގާފައެވެ.

އަނަސްގެ މަރުގެ މައްސަލައިގައި ދައުވާ ލިބޭ ޖުނައިޙް އަބްދުﷲ ގެ ލޮލުގެ ބޭސްފަރުވާގެ ކަންކަން ރާއްޖެއިން ބޭރުން ކުރިއަށް ގެންދިއުމަށް ޑޮކްޓަރުންވެސް ލަފާ ދީފައިވާއިރު، އޭނާ މިހާރު ހުރީ ފުރުމުގެ ކުރިން މާލޭ ޖަލުގައި ބަހައްޓާފައެވެ. އެހެންނަމަވެސް އޭނާގެ ޓްރެވަލް ޑޮކިއުމަންޓެއް ނެތުމުގެ ސަަބަބުން ފުރުން ލަސްވަމުންދާކަން ފާހަގަކޮށްފައިވެއެވެ.

މި މައްސަލައިގައި ދައުވާލިބޭ ފަރާތްތަކުގެ ވަކީލުން ވަނީ ސިއްރު ނޫން ހެކިންގެ ހެކިބަސް ނަގާ ނިމިފައިވުމާއެކު، ބަންދަށް ލުއެއް ދިނުމަށް އެދިފައެވެ. އެގޮތުން ބަންދު މުރާޖައާ ކުރުމާ ގުޅޭގޮތުން ކުރެވުނު މަޝްވަރާތަކަށްފަހު މައްސަލަ ބައްލަވާ ގާޒީ މުޙައްމަދު ސަމީރު ވިދާޅުވީ، ސިއްރު ނޫން ހެކިންގެ ހެކިބަސް ނެގިފައިވާ ކަމަށާއި، ސިއްރު ހެކިންގެ ހެކިބަސް ނެގުމަށް ޑިސެމްބަރު މަހު އަޑުއެހުމެއް ބާއްވާނެކަމަށެވެ. އަދި މި ވަގުތު ބަންދުގައި ބަހައްޓަންޖެހޭ ބައެއް ސަބަބުތައް ހުރުމާއެކު ބަންދު އަމުރު ދެމެހެއްޓެވި ނަމަވެސް، މައްސަލަ އަވަހަށް ކުރިއަށް ގެންދިއުމަށް ބާރު އަޅުއްވާނެކަމަށް އެންމެފަހުން ބޭއްވި ޝަރީއަތުގެ އަޑުއެހުމުގައި ފަނޑިޔާރު ވިދާޅުވެފައިވެއެވެ.