ޕޮޒިޓިވްވާ މީހުންގެ ތެރެއިން ކޮންމެ އުމުރެއްގެ މީހެއް ވެސް ކްރިޓިކަލް ހާލަތަށް ގޮސްދާނެ: ޑރ.މުހައްމަދު އަލީ
28 ޑިސެމްބަރު 2020 | ހޯމަ 08:2157 އަހަރުގެ ކޮވިޑްގެ ޕޭޝަންޓަކު ހާލު ސީރިއެސްވެ، ވެންޓިލޭޓަރަށް ވަނީ ލެވިފައި
އައިޖީއެމްއެޗްގެ ޑރ. މުހައްމަދު އަލީ
ކޮވިޑް-19ށް ޕޮޒިޓިވްވާ މީހުންގެ ތެރެއިން ކޮންމެ އުމުރުފުރައެއްގެ މީހެއް ވެސް ކްރިޓިކަލް ހާލަތަށް ގޮސްދާނެ ކަމަށް އައިޖީއެމްއެޗްގެ ޑރ. މުހައްމަދު އަލީ ވިދާޅުވެއްޖެއެވެ.
ކޮވިޑް-19ގެ މަސައްކަތުގައި އިސް ސަފުގައި ހަރަކާތްތެރިވަމުންދާ ޑރ.މުހައްމަދު ވިދާޅުވީ ކޮވިޑަށް ޕޮޒިޓިވްވެ އައިސީޔޫގައި 82 އަހަރު އަދި 79 އަހަރުގެ މީހަކަށް ފަރުވާ ދެމުންދާ ކަމަށާއި، އެދެމީހުންގެ ހާލު މަޑުމަޑު ރަނގަޅުވަމުންދާ ކަމަށެވެ.
ކޮންމެ އުމުރެއްގެ މީހެއް ވެސް ކްރިޓިކަލް ހާލަތަށް ގޮސްދާނެކަން ފާހަގަކުރައްވައި ޑރ.މުހައްމަދު ވިދާޅުވީ 57 އަހަރުގެ ކޮވިޑްގެ ޕޭޝަންޓަކު ހާލު ސީރިއެސްވެ މިހާރު ވެންޓިލޭޝަންއަށް ލެވިފައިވާ ކަމަށެވެ.
ރާއްޖޭގެ ކޮވިޑް-19ގެ ހާލަތަށް ބަލާއިރު މިހާރު ކޭސްތައް ރިޕޯޓު ކުރެވޭ މިންވަރު ވަނީ މަދުވެފައެވެ. ނަމަވެސް ބަލީގެ ނުރައްކާ ކުޑަ ނުވާ ކަމަށާއި، ރައްކާތެރިކަމަށް އަޅާފައިވާ ފިޔަވަޅުތަކަށް ޚާއްސަ ސަމާލުކަމެއް ދިނުމަށް ޑޮކްޓަރުން ގެންދަވަނީ ތަކުރާރުކޮށް އިލްތިމާސް ކުރަމުންނެވެ.
އެޗްޕީއޭ އިން ބުނީ މިދިޔަ 24 ގަޑިއިރުގެ ތެރޭގައި ނެގި 2613 ސާމްޕަލްގެ ތެރެއިން ކޮވިޑަށް ޕޮޒިޓިވްވީ، މާލެ ސަރަހައްދުން 22 މީހަކާއި އަތޮޅު ތެރެއިން އެކަކު އަދި ރިސޯޓްތަކުން ތިން މީހުން ކަމަށެވެ. މި ކޭސްތަކާއެކު ރާއްޖޭގައި ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 13،644 އަށް އަރައިފައެވެ. އަދި ބައްޔަށް ފަރުވާ ހޯދަމުން އަންނަ 517 މީހަކު ތިބި އިރު، ހޮސްޕިޓަލުގައި އެޑްމިޓްކޮށްގެން ފަރުވާދޭ 33 މީހަކު އެބަތިއްބެވެ.
އެޗްޕީއޭ އިން ބުނީ ހޮނިހިރު ދުވަހު ހަވީރު 6:00 އިން އާދިއްތަ ދުވަހު ހަވީރު 6:00 އަށް ރާއްޖޭގައި ކޮވިޑަށް ފަރުވާ ހޯދަމުންދިޔަ އިތުރު 22 މީހަކު ރަނގަޅުވެ، ބަލިން ފަސޭހަވި މީހުންގެ ޖުމުލަ 13،072 އަށް އަރާފައިވާ ކަމަށެވެ.
ރާއްޖޭގައި ކޮވިޑަށް ޕޮޒިޓިވްވި މީހުންގެ ތެރެއިން 48 މީހަކު ވަނީ މަރުވެފައެވެ. އެއީ 41 ދިވެއްސަކާއި ބަންގުލަދޭޝްގެ ހަ މީހަކާއި ފިލިޕީންސްގެ މީހެކެވެ.
