ކުޅިވަރުގެ ދާއިރާއިން ހިތްވަރުދިނުމުގެ ގައުމީ އިނާމު ފަސް ބޭފުޅަކަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްވައިފިއެވެ.

މި އިނާމު ރައީސް ދެއްވީ ދިވެހި ދައުލަތުން ދެއްވާ އެކިއެކި އިނާމުތައް ދެއްވުމަށާއި، ދިވެހިންގެ އެއްބައިވަންތަކަމުގެ ދުވަހާ ގުޅިގެން ޖުމްހޫރީ މައިދާނުގައި ހޮނިހިރު ދުވަހުގެރޭ ބޭއްވި ރަސްމީ ޖަލްސާގައެވެ.

1. އަލީ ޚުޝްރުވާން އަޙްމަދު (ކުޑަ އައްޔަ)

ރާއްޖޭގެ އެއް ނަންބަރު ބޮޑީބޯޑަރު އަލީ ޚުޝްރުވާން އަޙްމަދު (ކުޑަ އައްޔަ) އަށް މި އިނާމު ލިބިވަޑައިގެންނެވީ މޫދު ކުޅިވަރު އާލާކޮށް ތަރައްގީކުރުމުގެ ރޮނގުންނެވެ. އުމުރުން އެންމެ 12 އަހަރުގައި މަޅުގަނޑުގައި ރާޅާއަޅަން ފެށި ކުޑަ އައްޔަ ވަނީ ބައިނަލްއަގުވާމީ އެތައް މުބާރާތެއްގައި ރާއްޖެ ތަމްސީލުކޮށްފައެވެ. މީގެ އިތުރުން ކުޑަ އައްޔައަކީ މޯލްޑިވްސް ބޮޑީބޯޑިންގ އެސޯސިއޭޝަނުގެ ކޯ ފައުންޑަރެވެ.

2. އަބްދުﷲ އަރީފް (ފުކޫ)

އަބްދުﷲ އަރީފް އެންމެ ފުރަތަމަ މޫދު ކުޅިވަރު ނުވަތަ ރާޅާ އެޅަން ފެށީ އުމުރުން އެންމެ ހަ އަހަރުގައެވެ. ފުކޫ އެންމެ ފުރަތަމަ ރާޅާ އަޅަން ފެށީ މަޅުގަނޑުގައެވެ. މިހާރު މޯލްޑިވްސް ބޮޑީބޯޑިންގ އެސޯސިއޭޝަނުގެ ރައީސްކަން ކުރައްވަމުން އަންނަ ފުކޫ ވަނީ ބައިނަލްއަގުވާމީ މުބާރާތްތަކަށް ރާއްޖޭގެ ބޮޑީބޯޑަރުން ފޮނުވުމުގައި އިސް ދައުރެއް އަދާކުރައްވާފައެވެ. ހަމައެހެންމެ ގައުމީ ބޮޑީބޯޑިންގ ޓީމެއް އެކުލަވާލާފައިވަނީ ފުކޫގެ ރައީސްކަމުގެ ދަށުން މި އަހަރުއެވެ.

3. އިބްރާހީމް ހުސައިން (އިއްބަޑޭ)

އިބްރާހީމް ހުސައިން (އިއްބަޑޭ) ރާއްޖޭގެ ފަތުރުވެރިކަމުގެ ސިނާއަތުގައި މޫދު ކުޅިވަރު ކުރިއެރުއްވުމަށް ގިނަ މަސައްކަތްތަކެއް ކުރައްވަމުން އަންނަ ފަރާތެކެވެ. އެގޮތުން އެންމެ ފުރަތަމަ އިއްބަޑޭ ފެނިގެން ގޮސްފައިވަނީ ޑައިވިރެއްގެ ގޮތުގައެވެ. އޭގެ ފަހުން 2013 ވަނަ އަހަރު ފްލައިބޯޑް ޕްރޮފެޝަނަލް ލެވަލްއެއްގައި ރާއްޖޭގައި ކުރިއަރުވަން މަސައްކަތް ކުރެއްވިއެވެ. އަދި ފްލައިބޯޑުގެ ބައިނަލްއަގުވާމީ އެތައް މުބާރާތެއްގައި ރާއްޖެ ވަނީ ތަމްސީލުކޮށްފައެވެ. އިއްބަޑޭ އަކީ ހައިޑްރޯފްލައިޓުގެ ދުނިޔޭގެ ހަތަރުވަނައިގައި ރޭންކް ކުރެވިފައިވާ އެތުލީޓެވެ.

4. ޝުޖާއު ސަލީމް

ކުޅިވަރުގެ ދާއިރާއަށް ޝުޖާއު ސަލީމް ވަދެވަޑައިގެންނެވީ 1988 ވަނަ އަހަރު ސޯލް އޮލިމްޕިކްސްގައި ވާދަކުރި ރާއްޖޭގެ އެތުލީޓުން ދިން ހިތްވަރުންނެވެ. އެ ހިސާބުން ގައުމީ އެތުލެޓިކްސް ޓީމާއި ގުޅިވަޑައިގެން ބައިނަލްއަގުވާމީ މުބާރާތްތަކުގައި ރާއްޖެ ތަމްސީލުކުރުމުގެ ފުރުސަތު ޝުޖާއުއަށް ވަނީ ލިބިފައެވެ. އާންމުންގެ ތެރެއަށް ޝުޖާއު ފާހަގަވެގެން ގޮސްފައިވަނީ ކުޅިވަރުގެ ދާއިރާއިން ކުދިން ތަމްރީނުކުރި ކޯޗެއްގެ ގޮތުގައެވެ. އެގޮތުން ތަފާތު އެކި ކުޅިވަރުތަކުގެ ކޯޗުކަން އޭނާ ވަނީ ކޮށްދެއްވާފައެވެ.

5. ޔޫސުފް ޢަޡީމް

ޔޫސުފް ޢަޡީމަކީ ފުޓުބޯޅަ އަދި އެތުލެޓިކްސްއިން ގައުމީ ފެންވަރުގައި ގިނަ ކާމިޔާބީތަކެއް ހޯދާފައިވާ ކުޅުންތެރިއެކެވެ. ގައުމީ ފުޓްބޯޅަ ޓީމުން ޖާގަ ހޯއްދަވާ ގިނަ ދުވަސްތަކެއް ވަންދެން ގައުމީ ޓީމަށް ވަނީ ކުޅުއްވާފައެވެ. މިހާރު ފުޓްބޯޅަ ކޯޗެއްގެ ގޮތުގައި ކުޑަކުދިންނަށް ފުޓްބޯޅަ ދަސްކޮށްދިނުމުގެ ޕްރޮގްރާމުތައް އޭނާ އަންނަނީ ހިންގަމުންންނެވެ.